Esther 7

1Huajca Tlanahuatijquetl Asuero ihuaya Am'an yajque ichaj nopa Sihua Tlanahuatijquetl Ester para nopa tlacualistli. 2Huan quema tlacuayayaj nopa tlanahuatijquetl sampa quiilhui Ester: --Xinechtlajtlani tlen tijnequi huan nimitzmacas, yonque tinechtlajtlanisqu'ia tlajco tlen nochi tlen nijpiya. 3Huan Ester quinanquili: --Totlanahuatijca, intla tinechicnel'ia huan tiquita cuali, san ya ni tlen nimitztlajtlanis. Xinechmaquixti para ax nechmictise. Huan xiquinmaquixtili ininyolis nojquiya nochi notlacajhua. 4Pampa se technamacatoc nochi tiisraelitame para techmictise. Quinequi ma techtzontlamiltica nochi tojuanti. Intla san technamacatosqu'ia para titlatequipanose, huelis ax nimolinijtosqu'ia. Pero intla techmictise nochi tojuanti, quicocos nochi motlanahuatilis pampa miyac tijnenpolos. 5Huajca Asuero quitlajtlani Ester: --¿Ajqueya nopa tlacatl tlen moyolilhuijtoc para quichihuas ni tlamantli? ¿Canque itztoc? 6Huan Ester tlananquili: --¡Ni tlacatl Am'an! ¡Yajaya tlen techcualancaita! Huajca quema Am'an quicajqui ni tlajtoli, tlahuel momajmati iniixpa nopa tlanahuatijquetl ihuaya isihua. 7Huan Asuero moquetztiquisqui ica cualantli, huan quisqui tlen campa momesatlalijtoya para tlacuas huan yajqui campa ixochimil. Huan Am'an momacac cuenta para nopa tlanahuatijquetl moilhuijtoya para quimictis, huajca monechcahui campa itztoya Ester huan chicahuac quitlajtlaniyaya nopa sihua tlanahuatijquetl ma quimaquixti para ax miquis. 8Huan quema nopa tlanahuatijquetl mocuepqui tlen ixochimil huan sampa calajqui campa tlacuayayaj, quiitac Am'an motlancuaquetztoya campa moquespantectoya Ester, huan noja m'as cualanqui huan quiijto: --¿Huelis nojquiya tijnequi tijpinahualtis Ester noixpa ipan nochaj? Huan nimantzi quema ne tlanahuatijquetl quitlamiijto ni tlajtoli, ajsicoj sequin soldados huan quiilpijque Am'an para quihuicase quimictitij. 9Huan Harbona, se itlapalehuijca nopa tlanahuatijquetl, quiijto: --Tlanahuati Am'an para ma quicualtlalica se cuahuitl para ipan quicuapilosqu'ia Mardoqueo nopa tlacatl tlen mitzmaquixtili moyolis. Tlen quisencajtoc eltoc icalteno huan quipiya 22 metros ihuejcapanca. Huajca nopa tlanahuatijquetl quiijto: --¡Huajca nopona xijcuahuiyonica Am'an! 10Huajca quicuapilojque Am'an ipan nopa huejcapantic cuahuitl tlen yajaya quisencajtoya para Mardoqueo. Huan ica ya nopa moyoltlali nopa tlanahuatijquetl huan ayoc cualanqui.

will be added

X\