Ecclesiastes 6

1Onca seyoc tlamantli tlen ax cuali tlen na niquitztoc ipan nochi tlaltepactli. 2Toteco quinmacatoc sequin tlacame huejhueyi ricojyotl huan tlatlepanitacayotl tlen quinpalehuisqu'ia quipiyase nochi tlen yajuanti quinequij, pero ax quinmacatoc chicahualistli para itztose para quitequihuise cuali. Miquij nimantzi huan nochi tlen quipiyaj moaxcat'iaj sequinoc. Ya nopa nel'ia san tlapic huan ax cuali. 3Yonque se tlacatl quinpiyas 100 itelpocahua huan miyac iichpocahua huan huejcahuas itztos hasta elis huehuentzi, intla ax quipant'ia paquilistli ipan inemilis huan quema miquis ax quicajtehuas se quentzi tomi para ica quitlalpachose, na niquijtohua para nopa tlacatl m'as cuali tlacajtosqu'ia mictoc. 4Intla tlacajtosqu'ia mictoc huan ax quiitztosqu'ia tlatlanextli, ax quipiyasqu'ia niyon itoca. 5Ax quiitztosqu'ia tonati, niyon ax tleno quimajtosqu'ia intla onca se tonati. Pero ya nopa noja m'as cuali huan ax tielis se huehuentzi tlen ax quema quimatqui paquilistli. 6Huan yonque nopa tlacatl itztosqu'ia ome mil xihuitl, intla ax quipant'ia paquilistli, huajca san tlapic para itztos. Yajaya san miquis queja miquise nochi sequinoc. 7Nochi tlacame ipan tlaltepactli tlahuel mosiyahuilt'iaj ipan inintequi para quitlanise tlen quicuase, pero yonque ya nopa, ax quema ixhuij ica tlen quinequij quichihuase. 8Intla timoilhu'ia tlen ya nopa, yonque se tlalnamijca tlacatl huan se tlen huihuitic quipanoj ihuical tlamantli, m'as cuali inemilis yajaya tlen tlalnamiqui, pampa yajaya m'as tlamachil'ia. Ax nimantzi quichihua tlen hueli tlamantli tlen quinequi quichihuas. Huan yonque se itztoc teicneltzi, m'as cuali eltoc intla yajaya tlalnamiqui. 9Ximopaquilismaca ica tlen tijpiya. Amo xijnequi tlamantli tlen ax quinamiqui para tijpiyas. Para tijnequis tlamantli tlen ax hueli tijpiyas eli san tlapic queja tijnequisqu'ia tiquitzquis ajacatl tlen tlailpitztoc. 10Nochi tlen ama pano eltoc pampa huejcajquiya queja nopa quisencajqui Toteco para ma pano. Huan hasta huejcajquiya Toteco ipa quimatiyaya tlachque quichihuasqu'ia sesen tlacatl. Yeca san tlapic para timonajnanquilis ihuaya Toteco, pampa yajaya m'as hueyi que ta. 11Intla se tlacatl camati miyac, nel quentzi ipati tlen quiijtohua. Huajca, ax m'as xihuejchihua. 12Toyolis eltoc queja se ecahuilotl tlen ax huejcahua huan tlen ax tleno ipati. Axaca huelis techilhuis quejatza ma tiitztoca ica yejyectzi ipan nopa tonali tlen tijpiyaj nica. Huan ax aqui huelis techilhuis tlachque panos teipa nica ipan ni tlaltepactli quema ya tiixpolijtose.

will be added

X\