Ecclesiastes 5

1Quema tiya ipan ichaj Toteco, cuali xitlacaqui huan ax nimantzi xicamati. Amo xijmaca nopa tlacajcahualistli tlen huihui tlacame quimacaj. Pampa huihui tlacame nimantzi quitencahuil'iaj Toteco para quichihuase miyac tlamantli yonque ax quema quinchihuaj. Niyon ax moilhu'iaj intla elqui se tlajtlacoli tlen quiijtojque. 2Huajca amo xicamati nimantzi, niyon ax nimantzi xijtencahuili Toteco para tijchihuas se tlenijqui. Pampa Toteco itztoc nepa elhuicac huan ta tiitztoc ipan ni tlaltepactli. Huajca amo xicamati miyac iixpa. 3Quema se tlahuel motequihu'ia ica miyac tlamantli tequitl, pehua quipiya temictli. Nojquiya se tlacatl tlen quipact'ia camatis miyac, teipa mocuepas se huihui tlacatl. 4Huajca quema tijtencahuil'ia Toteco tlen tijchihuas, nimantzi xijchihua tlen tiquilhuijtoc. Pampa Toteco ax quincualita tlen huihuitique. Monequi xijchihua nochi tlen tijtencajtoc para tijchihuas. 5M'as cuali para ax tijtencahuas para tijchihuas se tlenijqui huan ax tijtencahuas huan teipa ax tijtlamichihuas. 6Quema tijtencahua se tlamantli huan ax tijchihua, nel'ia mocamac tlen mitzchihualti titlajtlacolchihuas. Nojquiya amo ximomanahui huan xiquijto iixpa elhuicac ehuani para timocuapolo quema tijtencahuili tlen tijchihuasqu'ia. Intla queja nopa tiquijtos, tijcualancamacas Toteco huan yajaya hueli quitlamixolehuas nochi tlen tijchijtoc. 7Intla se temiqui tlen miyac tlamantli tlen quinequi quichihuas pero ax tleno quichihua, san huihuitic. Intla camati miyac huan ax tleno quichihua, san tlapic. M'as cuali xijtlepanitaca huan xiquimacasica Toteco. 8Intla ipan se estado ipan ni tlali tiquitas para se rico quitlaijiyohuilt'ia se tlen teicneltzi huan ax quichihuil'ia tlen xitlahuac, amo ximosentlachili. Sesen tequihuejquetl quipiya seyoc tlen quinahuat'ia, huan tlen quinahuat'ia ya nojquiya quipiya seyoc tlen quitlachil'ia. Huan itztoc seyoc m'as huejcapa tlen nopa ome huan teipa itztoc nopa hueyi tlanahuatijquetl. Huan pampa nochi moixmatij, tlahuel ohui para quixitlahuase tlen tetlaijiyohuilt'ia. 9Nopa tlali huan tlen quielilt'ia pano ipan ininma nochi tlen quipiyaj tlanahuatili. Hasta nopa tlanahuatijquetl quisel'ia tlen temaca nopa tlali yonque nel'ia amo xitlahuac queja quichihuaj. 10Pero yonque se tlacatl tlahuel quinequi quipiyas tomi, ax quema quipiyas hasta ayoc quinequis. Huan tlen quinequi elis rico, ax quema moilhu'ia para ya quipiya miyac ricojyotl. 11Pampa quema se tlacatl quimiyaquil'ia itomi, nojquiya momiyaquil'iaj tlen quitequihu'iaj huan quitlamilt'iaj. Huajca ┬┐tlachque mitzpalehuis nopa ricojyotl intla san tlalochtlamis moixpa? 12Se tlacatl tlen tequiti chicahuac, cochi cuali yonque quipiya miyac itlacualis o pilquentzi. Pero se tlacatl tlen rico tlahuel mocuesohua huan ax cochi pampa quiimacasi quipolos nochi tlen quipiya. 13Seyoc tlamantli tlen nojquiya san tlapic tlen niquitztoc ipan ni tlaltepactli eltoc para se tlacatl quiajcocuis itomi huan teipa quitequihuis ipan tlamantli tlen ax cuali para ya. 14Nojquiya hueli quitlalis itomi ipan tlamantli tlen ax quisa cuali huan quitlamis itomi. Queja nopa ax tleno mocahuas para quiselise iconehua teipa. 15Sesen tlacatl tlacati xolotl huan queja nopa sampa mocuepas quema miquis. Axaca huelis quihuicas niyon se tlamantli tlen ica mosiyahuiltijtoc nica. 16Ya nopa nel'ia se hueyi cuesoli pampa san tlapic itequi se tlacatl. Quistehuas tlen ipan ni tlaltepactli ihuical queja ajsico. Nochi itequi san quihuicac ajacatl. 17Huan nochi tonali ipan iyolis, eltoc queja yajaya nemi ipan tzintlayohuilotl huan miyac tlamantli quitzacuil'ia. Mocuesohua huan tlaijiyohu'ia miyac. 18San ni tlamantli tlen cuali para se tlacatl. Monequi ma tlacua cuali, huan ma quii se xocomeca atl tlen ajhuiyac huan ma mopaquilismacas ipan itequi nochi tonali tlen Toteco quimacas para ma itzto. 19Huan nel'ia cuali intla se tlacatl quiselijtoc tlen Toteco ricojyotl huan chicahualistli. Huan intla queja nopa Toteco quimacatoc, ma mopaquilismacas ica tlen quiselijtoc. Intla se tlacatl paqui ipan itequi huan ica nopa tlamantli tlen quipant'ia ipan iyolis, huajca nel'ia cuali. Ipaquilis tlen quipiya eltoc queja se regalo tlen Toteco. 20Se tlacatl tlen queja nopa paqui ipan inemilis, ax mocuesohua ipampa tlen panotoc ipan iyolis, pampa Toteco quitemiti iyolo ica paquilistli.

will be added

X\