Ecclesiastes 4

1Sampa niquitac nochi nopa tlaijiyohuilistli, cuesoli huan tlaohuijcayotl tlen onca ipan ni tlaltepactli. Niquinitac tlacame tlen chocaj pampa sequinoc quintlaijiyohuilt'iaj huan ax tleno hueli quichihuase para momanahuise. Axaca quinyoltlal'ia, niyon ax aqui quinpalehu'ia pampa tlen quintlaijiyohuilt'iaj quipiyaj miyac chicahualistli. 2Huajca nijmachili para m'as cuali itztoque nopa tlacame tlen ya mijque huan ax tlen noja yoltoque. 3Huan noja m'as cuali yajuanti tlen ax quema tlacajtoque pampa ax quema quiitztoque nochi tlen ax cuali tlen onca ipan ni tlaltepactli. 4Huan niquitac quema se tlacatl quichihua huejhueyi tequitl huan nochi tlen quichihua quisa cuali, teipa sequinoc tlacame pehuaj quicocol'iaj. Huajca nochi itequi quisa san tlapic huan san quihualicac cuesoli. 5Tlacame tlen huihuitique ax quinequij tequitise huan yeca mocahua ica mayantli. 6Yajuanti moilhu'iaj para m'as cuali motlatzcanequise huan ax tequitise. Ax quinequij tequitise pampa moilhu'iaj nochi tequitl quisas san tlapic huan san quinsiyahuiltis. 7Nojquiya niquitztoc seyoc tlamantli tlen san tlapic ipan ni tlaltepactli. 8Niquita se tlacatl tlen itztoc iseli. Ax quinpiya iconehua, niyon iicnihua, pero mojmostla tequiti chicahuac pampa, yonque miyac tomi quipiya, quinequi para noja m'as moricojchihuas. Huan ax motlatzintoquil'ia: "¿Ajqueya nijcahuilijtehuas noricojyo quema nimiquis? ¿Para tlen tlahuel nimosiyahuilt'ia huan ax nimopaquilismaca ica nochi tlen nijpiya?" San tlapic nochi tlen quichihua nopa tlacatl huan tlahuel ohui inemilis. 9Achi m'as cuali quema ome tlacame tequitij san sejco huan ax tequiti setzi iseli. M'as quitlanise san sejco que quitlanisqu'ia intla tequitisqu'ia iyoca. 10Intla se huetzis, huajca ne se quitlalanas. Pero teicnelti nopa tlacatl tlen itztoc iseli. Pampa intla huetzis, ax aqui quipiyas para quitlalanas. 11Huan nojquiya quema tlaseseya, intla ome motecase san sejco ica se tlaquemitl, huajca momacase tlatotonilotl huan ax sesecuise. Pero se tlacatl tlen itztoc iseli ¿quejatza huelis mototonilis? 12Huan quema se tlacatl itztoc iseli, sequinoc huelis quitehuise huan quitlanise. Pero intla itztoque ome, huajca ax quintlanise. Huan noja m'as cuali intla itztoque eyi. Onca se tlajtoli tlen quiijtohua para se mecatl tlen quixinepalojtoque ica eyi pilmecatzitzi, ax nimantzi cotonis. 13M'as cuali se telpocatl tlen teicneltzi huan tlalnamiqui que se rico tlanahuatijquetl tlen huehuentzi huan huihuitic, huan ayoc quinequi quicaquis consejos. 14Se telpocatl tlen tlalnamiqui huelis quisas tlen se tlatzactli huan quipantis se nemilistli tlen nelcuali. Huelis elis tlanahuatijquetl yonque tlacatqui nelteicneltzi ipan nopa tlali. 15Huan miyac tlacame ipan ni tlaltepactli quipiyasqu'iaj paquilistli para quipalehuise se telpocatl queja nopa, hasta quipalehuisqu'iaj mochihuas tlanahuatijquetl. 16Se telpocatl tlen queja nopa tlalnamiqui huelis quinyacanas tlahuel miyac tlacame, huan nochi quiicnelise. Pero teipa quema tlacajtiyase sequinoc tlacame, yajuanti quihuejcamajcahuase. Yeca tlen quichihuasqu'ia elisqu'ia san tlapic queja san tlapic para se tlen quinequisqu'ia quiitzquis nopa ajacatl tlen tlailpitztoc.

will be added

X\