Amos 7

1TOTECO Tlen M'as Quipiya Tlanahuatili nechnextili ni ipan se tlanextili. Niquitac TOTECO quincualtlaliyaya chapolime para quintitlanilis ipan tosacamilhua quema nopa tlanahuatijquetl ya quipixcatoya nopa sacatl tlen iaxca huan pehuayaya sampa moscaltis. 2Huan teipa quema niquitac para ya quitlamicuajtoya nochi nopa sacatl tlen elisqu'ia para titlacajme, huajca niquijto: --Oh TOTECO Tlen M'as Tijpiya Tlanahuatili, techtlapojpolhui tiisraelitame. Amo xijtitlani ni tlatzacuiltili pampa ax huelis tiquijiyohuise. Ama tiisraelitame ax timiyaqui titlacajme huan nochi titlamimiquise ica ni tlatzacuiltilistli. 3Huan TOTECO moyolcuepqui tlen nopa tlamantli tlen quinectoya quichihuas, huan quiijto: --Cualtitoc, ax nijchihuas huajca. 4Teipa TOTECO Dios nechnextili seyoc tlamantli ipan seyoc tlanextili. Niquitac TOTECO Dios quicualtlalijtoya se hueyi tlitl para techtlatzacuiltis. Nopa tlitl quitlamihuatzqui nopa hueyi atl tlen m'as huejcatla huan quitlamitlatiyaya nochi tlaltini. 5Huajca na niquilhui: --¡Axtle, TOTECO ta Tlen M'as Tijpiya Tlanahuatili, amo xitechtlatzacuilti tiisraelitame ica tlitl! Ax huelis tiquijiyohuise pampa ax timiyaqui. 6Huajca TOTECO Dios sampa moyolcuepqui ica tlen moilhuiyaya quichihuas huan quiijto: --Huajca niyon ya nopa ax nijchihuas. 7Huan Toteco nechnextili seyoc tlamantli. Niquitac TOTECO ijcatoya nechca se tepamitl tlen quiquetztoyaj nel'ia xitlahuac pampa tlasencahuali ica se tepanchijquetl iplomada. Huan TOTECO ipan ima quipixtoya se plomada huan quiitayaya intla xitlahuac. 8Huajca TOTECO queja ni nechilhui: --¿Tlachque tiquita, Am'os? Huan na nijnanquili: --Niquita se plomada queja tlen quitequihu'iaj tepanchihuani para quiitase intla xitlahuac inintequi. Huan TOTECO quiijto: --Xiquita, na niquinyejyecos Israel ehuani para niquitas intla xitlahuac ininnemilis. Huan intla axtle, huajca ax niquintlapojpolhuis, niyon ayoc nijchiyas para niquintlatzacuiltis. 9Huan nijtlamixolehuas nochi nopa tlaixpamitl ipan tepetl campa Isaac huejcajquiya quichijqui tlaixpamitl para nechhueyitlali huan ama, inIsrael ehuani, inquinhueyichihuaj imotiotzitzi ipan tlaixpamitl nopano. Huan nijxolehuas nochi nopa tlamantli tlen tlatzejtzeloltique. Huan Tlanahuatijquetl Jeroboam huan nochi iixhuihua niquintzontlamiltis ica machete. 10Quema nopa totajtzi Amas'ias ipan altepetl Betel quicajqui tlen na, niAm'os, niquijtojtoya, tlatitlanqui ma quiilhuitij Tlanahuatijquetl Jeroboam ipan tlali Israel ni tlajtoli: "Am'os quinyolajcomana israelitame nica tlatlajco motlal para ma mitzmictica, huan tojuanti ayoc hueli tiquijiyohu'iaj nochi tlen quiijtojtoc. 11Tepohuil'ia para se ma mitzmicti ta, Jeroboam, ica machete, huan quiijtohua nochi tiisraelitame techhuicase tiilpitoque huejca ipan seyoc tlali para titlatequipanotij san tlapic." Queja nopa Amas'ias quititlanqui tlajtoli para nopa tlanahuatijquetl. 12Huan nojquiya Amas'ias nechtitlanili se tlajtoli na, niAm'os, huan nechilhui: --Xiya seyoc lado, titiocamanalojquetl. Ximochololti hasta tlali Jud'a. Nepa huelis tiquitas tlen teipa panos huan titomintlanis. 13Ayoc tijnequij para titepohuilis nica ipan altepetl Betel tlen timoilhu'ia para panos teipa, pampa nica huala nopa tlanahuatijquetl para quinhueyichihuas itiotzitzi ipan inintiopa huan nojquiya nica quipiya ichaj. 14Huajca na, niAm'os, nijnanquili Amas'ias huan queja ni niquilhui: --Na ax nel'ia nise tiocamanalojquetl queja sequinoc tlen ica ya nopa quitlanij tlen inintechmonequi. Niyon ax nimomachtijtoc imaco seyoc para nielis se nitiocamanalojquetl. Notequi na niquinmocuitlahuiyaya borregojme huan nijsentil'ia higos tlen campa hueli moscalt'ia. 15Pero TOTECO nechnotzqui ma niquincahua noborregojhua huan nechilhui: 'Xiya ipan tlali Israel huan xiquincamahui notlajtol huan xiquinilhui tlachque ininpantis.' Queja nopa nechilhui TOTECO. 16"Huajca Amas'ias, xijtlacaquili TOTECO itlajtol pampa yonque ta tinechilhu'ia ma ax niquincamahui Israel ehuani itlajtol TOTECO, huan ax ma niquinilhui tlen tlamantli fiero quinchiya, 17huajca ya ni tlen TOTECO mitzilhu'ia ta: 'Pampa ax tijnequi tijtlacaquilis notlajtol, mosihua mocuepas se tlacanenca sihuatl ipan nopa altepetl. Huan motelpocahua huan moichpocahua nochi miquise ica machete. Quiyejyecose motlal sequinoc tlaltini ehuani huan quixejxelose para moaxcatise. Huan ta timiquis ipan seyoc tlali campa tlacame ax nechixmatij. Huan nochi sequinoc Israel ehuani nojquiya quinhuicase ilpitoque para tlatequipanose san tlapic huejca tlen inintlal.' "

will be added

X\