HECHOS 8

1Huan Saulo quicualitac quema nopa tlacame quimictijque Esteban. Huajca ipan nopa tonal miyac tlacame pejque quintlaijiyohuilt'iaj tlen itztoyaj ipan nopa tiopamitl tlen tlaneltocani ipan altepetl Jerusal'en. Huajca nopa tlaneltocani mosemantiyajque campa hueli ipan nopa estado Judea huan ipan estado Samaria. Huan mocajque ipan altepetl Jerusal'en san nopa tlayolmelahuani. 2Huan sequin tlacame tlen quiicnel'iaj Toteco quitlalpachojque Esteban huan chocaque miyac pampa mijqui. 3Pero Saulo pejqui chicahuac quintlaijiyohuilt'ia nochi tlaneltocani ipan itiopa Toteco. Yajaya calaquiyaya ipan sesen cali campa mosentiliyayaj huan quinquixtiyaya. Huan quinhuahuatatzayaya tlacame huan sihuame huan quintzacuayaya. 4Huan nopa tlaneltocani tlen mosejsemantoyaj tlen Jerusal'en, yajque campa hueli altepetini huan teilhuijque itlajtol Toteco huan quejatza Jes'us temaquixt'ia. 5Huan Felipe yajqui altepetl Samaria huan quincamahui miyac tlacame para Jes'us itztoya nopa Cristo tlen Toteco quititlantoya. 6Huan Felipe tlamachtiyaya huan quichihuayaya miyac huejhueyi tlanescayotl. Huan miyac tlacame mosentiliyayaj para quicaquise tlen quiijtohuayaya huan quitlachilise tlen quichihuayaya. 7Huan quinchicahuayaya miyac tlen quinpixtoyaj iajacahua Axcualtlacatl. Huan nopa ajacame tzajtziyayaj chicahuac quema quisayayaj ipan inintlacayo tlacame. Huan quinchicajqui miyac tlacame tlen huajhuapahuixtoyaj huan tlen metzcuachotique. 8Huan yeca oncac se hueyi paquilistli ipan nopa altepetl. 9Huan itztoya nepa se tlacatl tlen itoca eliyaya Sim'on tlen huejcajquiya momajtoya tetlajchihu'ia ipan nopa altepetl. Huan quincajcayajtoya miyac tlacame ipan nopa estado Samaria. Teilhuiyaya para quipixqui hueyi chicahualistli. 10Huan nochi tlacame huan sihuame nepa yonque teicneltzitzi o tominpiyayayaj momatque quitlacaquil'iaj Sim'on huan quiijtohuayayaj tlen ya: "Ni Sim'on quipiya ihueyi chicahualis Toteco." 11Huan nochi quitoquilijque Sim'on pampa para miyac xihuitl quincajcayajtoya ica itetlajchihuil. 12Pero Felipe ajsico, nochi tlacame quicajque nopa cuali tlajtoli tlen Jesucristo huan itequihuejcayo huan quicajque quejatza Toteco tlanahuatis, huan yeca miyac tlacame quineltocaque. Huan miyac mocuaaltijque, tlacame huan sihuame. 13Huan Sim'on nojquiya quineltocac huan nojquiya mocuaalti huan pejqui nemi ihuaya Felipe. Huan Sim'on san quisentlachiliyaya nopa tlanescayotl huan huejhueyi chicahualnescayotl tlen Felipe quichihuayaya. 14Huan quema nopa tlayolmelahuani ipan altepetl Jerusal'en quicajque para miyac tlacame ipan estado Samaria quiselijtoyaj itlajtol Toteco, quintitlanque Pedro huan Juan ma yaca nepa. 15Huan Pedro huan Juan ajsitoj huan momaijtojque para nopa tlaneltocani ma quiselica Itonal Toteco. 16Aya ajsitoya Itonal Toteco ipan ininyolo, pampa san mocuaaltijque ica itequihuejcayo Jes'us para quitoquilise ya. 17Huajca Pedro huan Juan pejque quintlalil'iaj ininma ininpani huan nopa tlaneltocani quiseliyayaj Itonal Toteco ipan ininyolo. 18Huan Sim'on quiitac quejatza nopa tlayolmelahuani quintlaliliyayaj ininma ininpani tlacame huan quiseliyayaj Itonal Toteco, huan nojquiya quinejqui quichihuas. Huajca quintencahuili tomi Pedro huan Juan para ma quimacaca nopa chicahualistli. 19Quinilhui: --Xinechmacaca ni chicahualistli nojquiya para huelis nijtlalis noma ipan tlen hueli tlacatl huan yajaya quiselis Itonal Toteco. 20Huan Pedro quiilhui: --Ma Toteco mitztzontlamilti ihuaya motomi pampa timoilhu'ia huelis tijcohuas nopa tlen san Toteco hueli temaca huan yajaya temaca queja se regalo. 21Ax tleno tijpiya ihuaya ni tequitl pampa ax cuali moyolo iixpa Toteco. 22Huajca xijpatla moyolo huan xijcahua nopa tlajtlacoli. Huan xijtlajtlani Toteco ica nochi moyolo intla huelis mitztlapojpolhuis ica tlen timoyolilhuijtoc, 23pampa niquita tlahuel tiyolquentzi huan tlajtlacoli motlatzquilijtoc ipan moyolo. 24Pero Sim'on quiilhui Pedro: --Xijtlajtlanica Toteco ma nechtlapojpolhui para ax nechtzontlamiltis queja tiquijtojtoc. 25Huan nopa tlayolmelahuani tepohuilijque itlajtol Toteco huan teilhuijque tlen quiitztoyaj. Huan teipa mocuepque altepetl Jerusal'en. Huan ipan ojtli quipanotiyajque miyac pilaltepetzitzi ipan estado Samaria huan nepa nojquiya tlayolmelahuayayaj itlajtol Toteco. 26Teipa ajsico se ielhuicac ejca Toteco huan quiilhui Felipe: "Xiya ica tlani hasta nopa ojtli tlen onquisa Jerusal'en huan pano ipan nopa huactoc tlali huan yohui hasta Gaza." 27Huajca Felipe nima quistejqui. Huan nepa quipanti se eunuco tlacatl tlen elqui se ihueyi tequitica nopa sihua tlanahuatijquetl, Candace, ipan tlali Etiop'ia. Quimocuitlahui nochi itomi nopa hueyi tlali. Nopa tlacatl yajtoya Jerusal'en para quihueyichihuas Toteco, 28huan mocuepayaya itlal ipan se cuacarro tlen cahuajme quitilanayayaj. Huan ipan ojtli quipohuayaya nopa amatl tlen quiijcuilo tiocamanalojquetl Isa'ias huejcajquiya. 29Huan Itonal Toteco quiilhui Felipe: --Xiya, xijnechcahuiti nopa cuacarro. 30Huan Felipe quinechcahui huan quicajqui quipohuayaya iama Isa'ias. Huan Felipe quitlajtlani: --┬┐Tijmachil'ia tlen tijpohua? 31Huan nopa tlacatl quiilhui: --Ax huelis nijmachilis intla axaca nechixtomilis. Huan quiilhui Felipe ma tlejco huan ma mosehui ihuaya ipan icuacarro. 32Huan yajaya quipohuayaya ipan Itlajtol Toteco campa quiijtohua: "Tlacame quihuicase queja quihuicaj se borrego para quimictise. Huan queja se pilborregojtzi ax tzajtzi quema tlacame quiximaj, nojquiya ax tleno quiijtos quema quihuicase para quimictise. 33Quipinahualtise huan ax quichihuilise tlen xitlahuac. Axaca huelis camatis tlen iteipa ixhuihua, pampa ax quinpiyas. Quimictise huan yajaya quisas ipan totlaltepac." 34Huan nopa eunuco tlacatl quitlajtlani Felipe: --Xinechilhui intla nopa tiocamanalojquetl camatiyaya tlen ya ipantisqu'ia, o camatiyaya tlen seyoc ipantis. 35Huajca Felipe pejqui campa quipohuayaya ipan Itlajtol Toteco huan quiyolmelajqui nopa cuali tlajtoli tlen Jes'us. 36Huan yajtiyohuiyayaj ipan ojtli, huan ajsitoj campa mantoya atl huan nopa tlacatl quiilhui Felipe: --Xiquita, nica onca atl. ┬┐Huelis tinechcuaaltis? 37Huan Felipe quiilhui: --Intla tijneltoca ica nochi moyolo, nimitzcuaaltis. Huan nopa tlacatl quiijto: --Nijneltoca para Jesucristo yajaya Icone Toteco. 38Huajca Felipe quiilhui ma quiquetza icuacarro. Huan temoque nochi ome san sejco huan calajque ipan nopa atl huan Felipe quicuaalti. 39Huan quema inijuanti quisayayaj ipan atl, Itonal Toteco quihuicac Felipe, huan nopa tlacatl ayoc quiitac, pero yajqui ipan iojhui ica paquilistli. 40Huan Felipe mopanti ipan altepetl Azoto. Huan quinpanotiyajqui miyac altepetini tepohuilijtiyajqui itlajtol Toteco hasta ajsito altepetl Cesarea.

will be added

X\