HECHOS 7

1Huajca camatqui nopa hueyi totajtzi huan quitlajtlani Esteban: --¿Nel'ia tiquijtojtoc nochi ni tlamantli? 2Huan Esteban quinanquili: "Noicnihua huan notatahua, xinechtlacaquilica. Toteco Dios, yajaya tlen quipiya ihueyitilis, monexti huejcajquiya iixtla tohuejcapan tata Abraham quema itztoya ipan tlali Mesopotamia, quema aya yajtoya altepetl Har'an. 3Huan Toteco quiilhui Abraham: 'Xiquisa ipan ni motlal huan xiquincajtehua mochampoyohua. Xiya ipan nopa tlali campa nimitznextilis para tiitztos.' 4"Huajca Abraham quisqui ipan nopa tlali tlen itoca Caldea, huan yajqui altepetl Har'an. Huan nepa mijqui itata, huan Toteco Dios quihualicac Abraham hasta ni tlali campa tiitztoque ama. 5Huan Toteco ax quimacac Abraham se tlali para iaxca, niyon se pilquentzi. Pero Toteco quitencahuili quinmacasqu'ia ni tlali iteipa ixhuihua Abraham yonque Abraham noja aya quipiyayaya niyon se icone. 6Huan Toteco nojquiya quiilhui Abraham para iteipa ixhuihua itztose ipan sejyoc tlali para nahui ciento xihuitl huan ax quema huelis mochihuase queja se tlen nepa ehuani. Huan quiijto para tlacame tlen ehuaj nopa tlali quintequihuisqu'iaj chicahuac queja elisqu'ia tlatequipanohuani tlen iniaxcahua. Huan quiilhui tlen nopona ehuani tlahuel quintlaijiyohuiltise. 7Pero nojquiya Toteco quiilhui Abraham: 'Niquintlatzacuiltis tlen ehuaj nopa tlali, huan teipa sampa quisase moteipa ixhuihua tlen nopa tlali huan inijuanti nechhueyichihuaquij nica.' 8"Huan Toteco Dios quichijqui se tlajtolsencahuali ica Abraham huan quimacac se tlamachtili tlen itoca circuncisi'on para ma quitequi icuetlaxo ininpiltlacayo nochi ioquichpilhua. Nopa machiyotl quinextis para inijuanti quineltocaj tlen Toteco quintencahuilijtoya. Huajca quema tlacatqui Isaac, icone Abraham, huan quipixtoya chicueyi tonali, quitequili nopa tlanescayotl tlen itoca circuncisi'on ipan ipiltlacayo. Huan quema Isaac motlacachijqui, tlacatqui icone, Jacob. Huan quema Jacob motlacachijqui, tlacatque majtlactli huan ome iconehua. Huan inijuanti tohuejcapan tatahua nochi tiisraelitame. 9"Huan iconehua Jacob quichicoitayayaj Jos'e, se iniicni, huan quinnamaquiltijque sequin tlacame tlen quihuicaque tlali Egipto. Pero Toteco Dios itztoya ihuaya Jos'e, 10huan quimanahui quema tlaijiyohuiyaya huan quimacac miyac itlalnamiquilis. Huan Toteco quichijqui para nopa Tlanahuatijquetl Fara'on, tlen tlanahuatiyaya ipan nochi nopa tlali Egipto, ma quicualita Jos'e. Huan nopa tlanahuatijquetl quitlali Jos'e para ma eli gobernador ipan nopa tlali Egipto hasta nojquiya quinnahuati nochi tlen itztoyaj ipan ichaj Fara'on. 11"Teipa pejqui se hueyi mayantli ipan tlali Egipto huan tlali Cana'an, huan nochi tlaijiyohuiyayaj. Huan tohuejcapan tatahua ax huelque quipantijque tlaque quicuase. 12Pero Jacob quicajqui oncayaya tlacualistli ipan tlali Egipto, huan quintitlanqui itelpocahua, inijuanti tlen tohuejcapan tatahua, para ma yaca nopona. Ya nopa elqui quema yajque tlali Egipto nopa achtohui huelta. 13Huan teipa inijuanti sampa yajque ica ompa. Huan Jos'e quinilhui para yajaya iniicni huan quinnexti iixtla Tlanahuatijquetl Fara'on para yajaya ma quinixmati iicnihua. 14Huan Jos'e quinilhui iicnihua ma quinotzatij inintata huan nochi ichampoyohua para ma hualaca tlali Egipto. Huan setenta y cinco tlacame hualajque. 15Yeca queja nopa tohuejcapan tata Jacob yajqui huan mocajqui ipan tlali Egipto. Huan teipa Jacob mijqui nepa. Huan nojquiya teipa mijque nepa nochi tohuejcapan tatahua tlen eliyayaj iconehua Jacob. 16Huan teipa nopa israelitame quihuicaque nochi iniomiyo hasta altepetl Siquem. Nepa quintlalijque ipan se mijca tlacajcahuaya tlen eltoya iaxca Abraham pampa quincohuili iconehua Hamor. 17"Huan monechcahuiyaya nopa tonali para Toteco quichihuas tlen huejcajquiya quitencahuilijtoya Abraham para quichihuasqu'ia huan quinquixtis nopa tlacame ipan Egipto. Huan nopa israelitame nel'ia itztoyaj miyaqui pampa momiyaquilijtoyajya tlahuel miyac ipan Egipto. 18Huan pejqui tlanahuat'ia seyoc tlanahuatijquetl ipan Egipto tlen ax quema quicactoya tlen Jos'e pampa ya quipixtoya miyac xihuitl para mijqui Jos'e. 19Huan nopa yancuic tlanahuatijquetl quincajcayajqui nopa israelitame tlen eliyayaj tohuejcapan tatahua huan quintlaijiyohuilti miyac. Quinnahuati ma quintlahuelcahuaca ininpiloquichpilhua para ma miquica. 20"Huan ipan nopa tonali tlacatqui Mois'es tlen quiyolpacti Toteco. Huan inana huan itata quiiscaltijque eyi metztli ipan ininchaj. 21Huan quema inana Mois'es monejqui quitlahuelcahuas ioquichpil para ma miqui, iichpoca nopa yancuic tlanahuatijquetl Fara'on quipanti huan quihuicac ichaj huan quiiscalti queja icone. 22Yeca Mois'es momachti nochi tlalnamiquilistli tlen nopa egipcios quimatiyayaj. Huan Mois'es hueliyaya camati cuali huan quipixqui chicahualistli quichihuas miyac tlamantli tequitl. 23"Pero quema Mois'es quiaxiti 40 xihuitl, quinequiyaya quinpaxaloti iisraelita icnihua. 24Huan quiitac se egipcio tlacatl quihuitequiyaya se tlacatl israelita. Huan Mois'es quimanahui nopa israelita huan quimicti nopa tlacatl egipcio. 25Huan Mois'es moilhuiyaya para nopa israelitame quimachilisqu'iaj para Toteco quititlantoya para quinquixtisqu'ia campa tlatequipanohuayayaj san tlapic, pero inijuanti ax quimachilijque. 26Huan tonili Mois'es yajqui quinpaxaloto nopa israelitame sampa. Huan quinpantito ome israelita tlacame motehuiyayaj. Huan quinequiyaya quinyoltlalis huan quinilhui: 'Tlacame, inicnime, ¿para tlen inmotehu'iaj?' 27"Pero nopa tlacatl tlen quimaquiliyaya ihuampo quicuatopejqui Mois'es huan quiilhui: '¿Ajqueya mitztequimacatoc para xitechnahuatiqui huan xitechtlajtolsencahuaqui? 28¿Tijnequi tinechmictis queja yalhuaya tijmicti nopa egipcio?' 29Huan quema Mois'es quicajqui tlen nopa tlacatl quiijto, cholojtejqui tlahuel huejca hasta tlali Madi'an. Mocajqui ipan nopa tlali queja se sejcoyoc ejquetl, huan mosihuajti huan nepa tlacatque ome iconehua. 30"Huan quema Mois'es quipixtoya 40 xihuitl ipan tlali Madi'an, se tonal nejnemiyaya ipan nopa huactoc tlali nechca nopa tepetl tlen itoca Sina'i. Huan monexti se elhuicac ejquetl iixtla ipan ixochiyo se tlitl ipan se xihuitzontli tlen tlatlayaya. 31Huan quema Mois'es quiitac, quisentlachili huan monechcahui para cuali quitlachilis. Huan nimantzi quicajqui itos Toteco tlen quiilhui: 32'Na niininTeco mohuejcapan tatahua. Na niininTeco Abraham, Isaac huan Jacob.' Huan Mois'es pejqui huihuipica pampa nel'ia momajmati huan ayoc quinejqui quitlachilis. 33Huan Toteco Dios quiilhui: 'Xijquixti motecac pampa ni tlali campa timoquetztoc tlatzejtzeloltic, pampa nica nojquiya niitztoc. 34Na niquinita queja tlaijiyohu'iaj notlacajhua nepa ipan tlali Egipto, huan nijcactoc quema chocaj huan nitemotoc tlen elhuicac para niquinmanahuis. Huajca xiquita, ama nimitztitlanis ipan tlali Egipto para tiquinmaquixtis.' 35"Huajca Toteco sampa quititlanqui ni Mois'es ma yohui Egipto tlen nopa israelitame achtohui ax quinejque quiitase huan quiilhuijtoyaj: '¿Ajqueya mitztequimacatoc para xitechnahuati huan xitechtlajtolsencahua?' Quena, ica ielhuicac ejca Toteco tlen monexti iixtla ipan nopa xihuitzontli, Toteco quititlanqui Mois'es ma yohui Egipto, pero ama elqui queja se tlanahuatijquetl huan se tlamanahuijquetl. 36Huan Mois'es quichijqui chicahualnescayotl huan tlanescayotl ipan nopa tlali Egipto, huan ipan nopa Hueyi Atl Chichiltic huan ipan nopa huactoc tlali para 40 xihuitl. Huan quinyacanqui nopa israelitame ma quisaca. 37Huan ni Mois'es quinilhui nopa israelitame huejcajquiya: 'Toteco inmechtitlanilis se tiocamanalojquetl queja na nechtitlantoc huan yajaya elis se toisraelita icni.' 38Yajaya ni Mois'es nojquiya tlen itztoya ipan nopa tlasentilistli tlen tohuejcapan tatahua ipan nopa huactoc tlali campa ax tleno eli. Huan motlajcoquetzqui ica nopa elhuicac ejquetl tlen quicamahui ipan tepetl Sina'i huan tohuejcapan tatahua. Huan Mois'es quiseli tlajtoli para ma techpanoltili nochi tojuanti para ma techmaca nemilistli. 39"Pero tohuejcapan tatahua ax quinejque quitlacaquilise Mois'es huan moilhuijque cuali mocuepasqu'iaj ipan tlali Egipto. 40Huajca tohuejcapan tatahua quiilhuijque Aar'on: 'Xitechsencahuili totiotzitzi para ma techyacanaca ipan ojtli, pampa tojuanti ax tijmatij tlaque ipantitoc nopa Mois'es tlen techquixti ipan tlali Egipto.' 41Huajca quichijque se tlamantli tlen oro para quihueyichihuase huan quipixqui itlachiyalis queja se pilhuacaxtzi. Huan quimacaque tlacajcahualistli iixtla nopa teteyotl huan quinpacti tlen mosencahuilijtoyaj. 42Huajca Toteco quintlahuelcajqui huan quincahuili ma quinhueyichihuaca nopa sitlalime tlen elhuicactli. Eltoc queja itiocamanalojcahua Toteco quiijcuilojque ipan nopa libro campa Toteco quinilhui: 'Quema inisraelitame inquinmictiyayaj tlapiyalime, huan intemacayayaj tlacajcahualistli para cuarenta xihuitl ipan nopa huactoc tlali, ax na tlen innechmacayayaj. 43Tlen achi m'as inquiicnelijque elqui imotlaixcopincayo tlen itoca Moloc tlen inquinejnemiltijque imohuaya ipan ipilchaj. Huan inquihuicayayaj se sitlali tlen inmoilhuijque eliyaya iaxca imoteteyo Renf'an. Pero san elque tlaixcopincayome tlen inquichijque ica imoma para inquinhueyichihuase. Huajca nimechquixtis ipan imotlal huan nimechcahuati ipan ne seyoc lado altepetl Babilonia.' " 44Huan Esteban noja camatiyaya iniixpa nopa tequihuejme huan quinilhui: "Tohuejcapan tatahua quipixtoyaj nopa yoyon tiopamitl tlen quihuicaque ininhuaya ipan nopa huactoc tlali. Quisencajtoyaj nopa tiopamitl senquistoc queja nopa iixcopinca tlen Toteco quinextili Mois'es para ma quichihua. 45Huan teipa mijqui Mois'es huan tohuejcapan tatahua quiselijque nopa yoyon tiopamitl. Huan inijuanti quihualicaque quema Josu'e quinyacanqui ma moaxcatica ni tlali. Huan Toteco quintotocac nopa tlacame tlen ax israelitame tlen itztoyaj nica. Huan Toteco quinmacac ni tlali tohuejcapan tatahua. Huan quipixtoyaj nopa yoyon tiopamitl hasta nopa tonali quema tlanahuatiyaya David. 46Huan Toteco quicualitac David, huan David quinejqui quichihuas se hueyi cali para ma ipan itzto Toteco, tlen iDios tohuejcapan tata Jacob. 47Pero elqui Salom'on, icone David, tlen quichijqui nopa cali para Toteco. 48Pero tijmatij nel'ia Toteco Tlen M'as Hueyi ax mocahua ipan se tiopamitl tlen tlacame quisencajtoque ica ininma. Eltoc queja quiijto se tiocamanalojquetl tlen huejcajquiya quiijcuilo ni tlajtoli tlen Toteco quiijto: 49'Na nijtemit'ia elhuicac huan tlaltepactli. Ax quema oncas se cali tlen nechaxilis para ipan niitztos pampa ninelhueyi. ¿Quejatza huelis inquichihuase se cali para ipan nimosehuis? 50Na ica noma nijchijqui nochi tlamantli ipan elhuicactli huan tlaltepactli.' Quej nopa quiijto Toteco." 51Huan Esteban quinilhui nopa tequihuejme: "¡Inyoltetique! Ipan imoyolo ax inquiixmatij Toteco. Ax inquinequij inquicaquise tlen melahuac. Nochipa inquihuejcamajcahuaj Itonal Toteco. San se inquichihuaj tlen ax cuali queja tohuejcapan tatahua quichijque huejcajquiya. 52Tohuejcapan tatahua quintlaijiyohuiltijque nochi itiocamanalojcahua Toteco. Quinmictijque nopa tiocamanalohuani tlen quinyolmelajque para teipa hualasqu'ia Yajaya Tlen Xitlahuac tlen Toteco techtitlanilisqu'ia. Huan quema nopa Cristo ajsico, inquitemactilijque ica fiero tlacame huan inquimictijque. 53Ax inquinequij inquitoquilise itlanahuatil Mois'es yonque techmacaque nopa tlanahuatili elhuicac ehuani." 54Huan quema quicajque nopa tequihuejme tlen Esteban quiijto, tlahuel cualanque hasta motlanhuehuechotzque. 55Pero Esteban temitoc ica Itonal Toteco, tlachixqui elhuicac. Huan quiitac ihueyitilis Toteco Dios huan quiitac Jes'us ijcatoya ica inejmatl Toteco. 56Huajca Esteban quiijto: --¡Xijtlachilica! Na niquita tlapojtoc elhuicac huan Jes'us tlen Mocuepqui Tlacatl ijcatoc inejmatl Toteco Dios. 57Pero nopa tlacame tzajtzique chicahuac huan monacastzajque para ayoc quicaquise tlen Esteban quiijtohuayaya. Huan nochi motlalojque huan quiitzquijque. 58Huan quihuicaque Esteban altepeteno huan quicuatepachojque. Huan nopa tlacame tlen quiteilhuijtoyaj para ma miqui quicajtejque ininyoyo ica se telpoca tlacatl tlen itoca eliyaya Saulo para ma quimocuitlahui. 59Huan noja quitepachohuayayaj quema Esteban quinotzqui Tohueyiteco huan quiilhui: "Tohueyiteco Jes'us, xijseli notonaltzi." 60Huan teipa Esteban motlancuaquetzqui huan chicahuac quiijto: "Tohueyiteco, xiquintlapojpolhui ni tlajtlacoli tlen nechchihuil'iaj." Huan quema Esteban tlanqui camati, mijqui.

will be added

X\