HECHOS 24

1Huan teipa quema panotoya macuili tonali, ajsico altepetl Cesarea Anan'ias nopa hueyi totajtzi. Huan nojquiya ihuaya hualajque sequinoc huehue tlacame tlen israelitame huan se tlatempalehuijquetl tlen itoca eliyaya T'ertulo. Huan nochi yajque iixtla Gobernador F'elix para quiteilhuitij Pablo. 2Huan quema nopa soldados quihualicaque Pablo, T'ertulo pejqui quiteilhu'ia huan quiilhui nopa gobernador: --Timitztlajpalohuaj, Gobernador. Timitztlascamatij miyac pampa nochi tiitztoque ica cuali, huan ica motlalnamiquilis miyac tlamantli nemi cuali ipan totlal. 3F'elix, timitztlascamatij miyac para nochi ni tlamantli tlen titechchihuilijtoc. Nochi tlacame campa hueli paquij ica motequi. 4Ax nijnequi nimitzcuatotonis ica miyac tlajtoli, pero xinechchihuili se favor huan xinechtlacaquili se tlalochtli. 5"Nel'ia ni tlacatl Pablo se tlaajcomanquetl. Ipan campa hueli tlali, yajaya yohui campa israelitame huan tlamacht'ia seyoc tlamachtilistli para techxejxelos. Nojquiya quinyacana tlacame tlen quineltocaj Jes'us tlen ejqui altepetl Nazaret. 6Huan se tonal ipan altepetl Jerusal'en Pablo quinejqui quichihuas ax tlapajpactic tohueyi tiopa tiisraelitame huan yeca tiquitzquijque. Huan tijnequiyayaj tijtlajtolsencahuasqu'ia queja quiijtohuaj totlanahuatilhua tiisraelitame, 7pero ajsico Lisias, nopa hueyi tlayacanquetl tlen miyac soldados huan quiitzqui ica miyac chicahualistli huan techquixtili. 8Huan tinechilhui intla tijnequiyayaj tijteilhuise, ma tihualaca hasta nica. Huan intla tijnequi tijtemolis nochi ni tlamantli, tijmatis xitlahuac nochi tlen timitzilhu'iaj." 9Queja nopa quiijto T'ertulo, huan nopa israelitame tlen itztoyaj ihuaya nojquiya quiilhuijque F'elix para melahuac tlen quiijto. 10Huajca nopa elhuicac ejquetl quitlamanextili Pablo ma camati huan Pablo quiijto: --Nipaqui tinechcahuilijtoc nimitzilhuis tlen panoc pampa nijmati ya quipiya miyac xihuitl titlanahuatijtoc ipan ni totlal. 11Ni tlacame huelis mitzilhuise san quipiya majtlactli huan ome tonali niajsito nepa Jerusal'en para nijhueyichihuas Toteco. 12Huan axaca nechpantijtoc nitlanajnanquil'ia, niyon niteajcomana nepa. Ax nijchijqui tlen ax cuali ipan nopa hueyi tiopamitl, niyon ipan sequinoc tiopantini, niyon ipan nopa altepetl. 13Ni tlacame ax huelis mitznextilise para nel'ia nijchijtoc nopa tlaixpanoli ica tlen nechteilhu'iaj pampa ax nijchijtoc. 14Pero nimitzyolmelahua para quena, nijtoquil'ia Nopa Yancuic Ojtli. Quinequi quiijtos nijhueyichihua Toteco Dios queja Jes'us tlamachti, huan ya nopa inijuanti quiijtohua ax cuali. Pero queja nopa nijhueyichihua Toteco Dios tlen tohuejcapan tatahua quitoquilijque. Huan nijneltoca nochi tlen ijcuilijtoc ipan totlanahuatilhua tiisraelitame huan nochi tlen itiocamanalojcahua Toteco quiijcuilojque. 15Nojquiya nijneltoca Toteco quinyolit'ia tlacame tlen ya mictoque, tlen cuajcualme huan tlen ax cuajcualme. Huan ni tlacame tlen nica itztoque nojquiya ya nopa quineltocaj. 16Yeca ica nochi nochicahualis nijchihua tlen cuali para noyolo ma ax nechteilhuis para nijchijtoc tlen ax cuali iixpa Toteco, niyon iniixtla tlacame. 17"Quema tlanqui niquinpaxalojtinemi sequinoc tlaltini para se ome xihuitl, sampa nihualajqui Jerusal'en niquinmacato tomi tlen teicneltzitzi nepa huan para nijmacas Toteco tlacajcahualistli. 18Huajca nijchijqui nochi tlen monequi para nimotlapajpacchihuas iixpa Toteco, huan niyajqui tiopan calijtic huan nijmacayaya Toteco se tlacajcahualistli quema sequin israelitame tlen tlali Asia nechitaque. Pero axaca aquiyaya nohuaya huan axaca nicajcomanayaya. 19Monequi nopa israelitame tlen nel'ia nechitaque nepa ma hualasqu'ia nica para nechteilhuiqui intla moilhu'iaj nijchijqui tlen ax cuali. 20O ma quiijtoca ni tlacame nica tlaque notlaixpanol quipantijque ipan nopa hueyi tlasentilistli tlen israelita tequihuejme quema nimonexti iniixtla. 21San ipan nopa tlasentilistli chicahuac niquijto: 'Innechteilhu'iaj ama pampa nijneltoca para nochi tlacame tlen mictoque, teipa moyolcuise.' " 22Huajca F'elix nimantzi quinejqui quicahuas ni tlamantli hasta seyoc tonal pampa cuali quimatqui queja tlaneltocani quineltocaque Nopa Ojtli quinequi quiijtos Jes'us. Huajca F'elix quinilhui: --Nijtlajtolsencahuas Pablo quema hualas Lisias nopa hueyi tlayacanquetl tlen soldados. 23Huajca F'elix quiilhui nopa tlayacanquetl tlen soldados tlen quimocuitlahuiyaya Pablo ma quicahuili ma quichihua tlen ya quinequi huan para ma quipaxaloca ihuampoyohua huan ma quimacaca tlen ica panos. 24Huan ica se ome tonali sampa ajsico F'elix ipan altepetl Cesarea ihuaya isihua Drusila tlen eliyaya se israelita. Huan quititlanqui se tlacatl ma quicuiti Pablo pampa quinequiyayaj quicaquise queja quineltocatoya Jesucristo. 25Huan Pablo pejqui quinilhu'ia quejatza Toteco Dios quipact'ia san tlen xitlahuac. Huan quinequi para nochi ma nejnemica ica cuidado para ma ax quichihuaca tlen ax cuali. Huan nojquiya quinilhui para se tonal nochi tlacame monextise iixpa Toteco para yajaya quintlajtolsencahuas. Huajca ica nopa tlajtoli momajmati F'elix huan quiilhui Pablo: --Xiya ama, huan seyoc tonal quema ax tleno nijchihuas, nimitznotzas xinechcamahuiqui. 26Nojquiya F'elix quichiyayaya para Pablo ma quitlaxtlahuisqu'ia para quimajcahuasqu'ia, yeca miyac huelta quinotzayaya para quicamahuis. 27Huan panoc ome xihuitl, huan tlanqui itequi F'elix queja gobernador huan pejqui tlanahuat'ia Porcio Festo. Huan F'elix quinequiyaya mocahuas cuali ica israelitame, huajca quicajtejqui Pablo ipan tlatzactli.

will be added

X\