HECHOS 23

1Huan Pablo quintlachili nopa huejhueyi israelita tequihuejme huan quinilhui: --¡Noicnihua! Hasta ama ni tonal ninejnentoc cuali iixpa Toteco Dios huan ax tleno nijchijtoc tlen ica noyolo nechteilhu'ia. 2Huajca Anan'ias, nopa hueyi totajtzi quinnahuati tlen itztoya nechca Pablo ma quimaquilica ipan icamac. 3Huan Pablo quiilhui: --Toteco ma mitzmaquilis ta, tijpiya ome moxayac. Tiitztoc nica para tinechtlajtolsencahua queja quiijtohuaj tlanahuatili huan tiquinixpano nopa tlanahuatili pampa titlanahuati ma nechmaquilica. Huan niyon se tlanahuatili ax mitzcahuil'ia ya nopa xijchihua. 4Huan sequin tlen itztoyaj nepa quiilhuijque Pablo: --¿Quej nopa tijcamanajnanquil'ia ne hueyi totajtzi tlen iaxca Toteco? 5Huan Pablo quiijto: --Noicnihua, ax nijmatiyaya intla yajaya eliyaya nopa hueyi totajtzi. Intla nijmajtosqu'ia, ax niquijtojtosqu'ia pampa ijcuilijtoc ipan Itlajtol Toteco: 'Amo xijtlaijilhui se tlayacanquetl ipan motlacajhua.' 6Huan Pablo quiitac itztoyaj ipan nopa tlasentilistli sequin saduceos huan sequin fariseos, yeca quiijto chicahuac ipan nopa tlasentilistli: --Noicnihua, na nifariseo. Notata nojquiya eltoya se fariseo. Nechhualicatoque nica huan nechteilhu'iaj pampa nijneltoca para se tonal nochi tlacame tlen mictoque, moyolcuise. 7Huan quema quicajque tlen Pablo quiijto, nopa fariseos huan saduceos pejque mocualan'iaj huan monajnanquil'iaj, huan nopa tlasentilistli motlajcoxelo. 8Pampa nopa saduceos moilhu'iaj axaca moyolcuisqu'ia, huan ax aquij elhuicac ehuani huan moilhu'iaj axaca quipiya itonal. Pero nopa fariseos quineltocaj nochi nopa tlamantli. 9Huan nel'ia chicahuac tlahuejchijque nopa tlacame. Huajca sequin fariseos moquetzque huan pejque tlanajnanquil'iaj chicahuac, huan quiijtojque: --Ax tleno tlen ax cuali quichijtoc ni tlacatl. Huelis se acajya itonal o se elhuicac ejquetl quicamahuijtoc, pero intla queja nopa panotoc, ma ax ticualanica ica tlen Toteco quichijtoc. 10Huan tlahuejchijque nopa tlacame pampa tlahuel cualaniyayaj hasta nopa tlayacanquetl tlen soldados quiimacasiyaya quicocototzasqu'iaj Pablo. Yeca quinnahuati isoldados ma quihuicaca ipan cuartel huan quitzacuase. 11Huan nopa tlayohua Tohueyiteco monexti iixtla Pablo huan quiilhui: "Amo ximajmahui. Queja titeyolmelajtoc tlen na nica ipan Jerusal'en, nojquiya monequi tijchihuas ipan altepetl Roma." 12Huan quema tlanesqui mosentilijque sequin israelitame huan tlatestigojquetzque para quimictisqu'iaj tlen hueli inijuanti tlen tlacuasqu'ia o atlisqu'ia quema aya mictoc Pablo. 13Huan pano 40 tlacame tlen queja nopa motlajtolmacatoyaj. 14Huan yajque iniixtla nopa tlayacanani tlen totajtzitzi huan nopa huehue tlacame huan quinilhuijque: --Timotlajtolmacatoque ax titlacuase huan ax tiatlise hasta tijmictise Pablo. Intla titlacuase o tiatlise huan aya mictoc, ma techmictica. 15Huajca imojuanti ininhuaya nochi nopa tlasentilistli tlen tequihuejme xiquilhuica nopa tlayacanquetl tlen soldados ma inmechhualiquilica Pablo nica. Xiquilhuica inquinequij m'as inquitlajtlanise. Huan tijchiyase ipan ojtli huan tijmictise quema noja polihui para ajsis. 16Huan imachcone Pablo quicajqui tlen nopa tlacame quisencahuayayaj huan yajqui tequicalco quiilhuito Pablo. 17Huan Pablo quinotzqui se tlayacanquetl tlen soldados huan quiilhui: --Xijhuica ni oquichpil hasta nopa hueyi tlayacanquetl pampa quinequi quiilhuis se tlamantli. 18Huajca quihuicac hasta nopa hueyi tlayacanquetl tlen nochi soldados huan quiilhui: --Pablo tlen tzactoc, nechnotzqui huan nechtlajtlani ma nimitzhualiquili ni oquichpil pampa quinequi mitzilhuis se tlamantli. 19Huajca nopa hueyi tlayacanquetl quimaitzqui nopa oquichpil huan quihuicac sejcoyoc para axaca ma quicaqui huan quitlajtlani: --¿Tlaque tijnequi tinechilhuis? 20Huan quinanquili: --Nopa israelitame san sejco quisencajtoque mitztlajtlanise para mostla xijhuica Pablo iixtla nopa hueyi tlasentilistli tlen tequihuejme para m'as quitlajtlanise tlen itlaixpanol, pero ax neli. 21Amo xiquinneltoca pampa pano 40 tlacame quichiyaj para quimictise ipan ojtli. San sejco motlajtolmacatoque ax tlacuase, niyon ax atlise, hasta quimictise Pablo. Huan amantzi mocualtlal'iaj pampa moilhu'iaj para quena, tijhuicas. 22Huajca nopa hueyi tlayacanquetl tlen nochi nopa soldados quinahuatijtejqui nopa oquichpil huan quiilhui: --Axaca xiquilhui intla tinechyolmelahuaco. Huan nopa oquichpil yajqui. 23Huan nopa hueyi tlayacanquetl tlen nochi soldados quinnotzqui ome tlayacanca soldados huan quinilhui: --Ma mocualtlalica ome ciento imosoldados tlen san icxinejnemise, huan setenta tlen yase cahuajtipa huan ome ciento tlen quihuicase tepos tlamintli. Nochi inyase altepetl Cesarea a las nueve ica tlayohua. 24Nojquiya quinilhui ma quincualtlalica cahuajme para mocahuajsehuis Pablo, huan quinilhui ma quihuicaca ica cuali hasta campa itztoc Gobernador F'elix. 25Huan nopa hueyi tlayacanquetl quitlajcuilhui F'elix se amatlajcuiloli tlen quiijto: 26"Tohueyi Gobernador F'elix, "na niClaudio Lisias nimitztlajpalohua. 27"Ica ni amatlajcuiloli nijtitlani ni tlacatl Pablo. Tijpantijque quema sequin israelitame quiitzquitoyaj huan quinequiyayaj quimictise. Huan niquinquixtili pampa nijcajqui yajaya se romano. 28Huan nijnequiyaya nijmatis tlaque tlaixpanoli quichijtoya huan yeca nijhuicac ipan nopa hueyi israelita tlasentilistli tlen tequihuejme. 29Huan nijpanti para quiteilhuijque ica se tlamantli tlen inintlanahuatilhua israelitame, pero ax tleno quichijtoya tlen ax cuali para ma quimictica, niyon para ma quitzacuaca. 30Nojquiya nijcactoc, sequin israelitame motlajtolmacaque san sejco para quimictise; huajca yeca nimantzi nimitztitlanil'ia. Niquinilhuijtoc nopa tlacame tlen quinequij quiteilhuise ma yaca moixtla. Ma nochi yohui cuali campa ta. San ya nopa." 31Huajca nopa soldados quihuicaque Pablo hasta altepetl Ant'ipatris ica tlayohua queja inintlayacanca quinilhuijtoya. 32Huan tonili nopa soldados tlen icxinejnemiyayaj quincajtejque huan mocuepque cuartel ipan Jerusal'en, pero nopa sequinoc tlen yajque cahuajtipa quihuicaque Pablo hasta campa Gobernador F'elix. 33Huan quema ajsitoj altepetl Cesarea, quitemactilitoj Pablo ica Gobernador F'elix, huan quimacaque nopa amatlajcuiloli. 34Huan Gobernador F'elix quipojqui nopa amatlajcuiloli huan quitlajtlani Pablo campa ejqui. Huan Pablo tlananquili para ejqui ipan tlali Cilicia, 35huan quiilhui: --Nimitztlacaquilis teipa quema hualase tlen mitzteilhuiquij. Huajca quinnahuati isoldados ma quimocuitlahuica Pablo ipan nopa hueyi tequicali campa nopa Tlanahuatijquetl Herodes tequitic.

will be added

X\