1 Teipa Pablo quisqui altepetl Atenas huan yajqui altepetl Corinto. 2 Nepa quipanti se israelita tlacatl tlen itoca eliyaya Aquila tlen ejqui tlali Ponto huan yajqui quipaxaloto ichaj. Aquila ihuaya isihua Priscila yancuic hualajtoyaj tlen altepetl Roma ipan tlali Italia pampa Tlanahuatijquetl Claudio ipan Roma tlanahuati ma quisaca ipan ialtepe nochi israelitame. 3 Huan Pablo quimatiyaya quejatza quiijtzomas tilahuac yoyomitl para quichihuas yoyon caltini. Huan Aquila ihuaya isihua nojquiya san se tequitl quichihuayayaj. Yeca Pablo mocajqui ininchaj huan tequitque san sejco. 4 Huan ipan sesen s'abado Pablo yajqui ipan nopa israelita tiopamitl huan quincamahuiyaya israelitame huan griegos tlen mosentiliyayaj nepa para ma quineltocaca Jes'us. 5 Pero quema Silas huan Timoteo ajsicoj ipan Corinto tlen tlali Macedonia, Pablo quicajqui itequi para quichihuas yoyon caltini huan san tepohuili itlajtol Toteco mojmostla. Quinilhuiyaya israelitame ica chicahualistli para Jes'us nel'ia itztoya nopa Cristo tlen Toteco quititlanqui. 6 Pero quema nopa israelitame ax quiselijque itlajtol huan quitlaijilhuijque, Pablo san quitzejtzelo iyoyo para quinnextilis quincajtehuayaya, huan quinilhui: --Imotlajtlacol imojuanti intla inmiquise huan inyase mictla. Ax notlajtlacol na, pampa ya nimechilhui tlen melahuac tlen inmechmanahuijtosqu'ia. Ama huan teipa san niquincamahuiti tlacame tlen ax israelitame. 7 Huan Pablo quincajtejqui huan yajqui ichaj se tlacatl tlen ax israelita. Yajaya itoca eliyaya Justo huan quitlepanitac Toteco miyac. Huan quipixtoya ichaj nechca nopa israelita tiopamitl. 8 Huan Crispo, se tlayacanquetl ipan inintiopa israelitame, nojquiya quineltocac Toteco ihuaya nochi ichampoyohua. Huan miyac tlacame nepa Corinto quicajque itlajtol Pablo huan quineltocaque huan mocuaaltijque. 9 Huan se tlayohua Tohueyiteco quiilhui Pablo ipan se tlanextili queja se temictli: "Amo ximajmahui. Xitepohuilijtinemi tlen na huan amo xijcahua. 10 Na niitztoc mohuaya, huan axaca huelis mitzchihuilis tleno, pampa niquinpiya miyac tlacame ipan ni altepetl tlen nechneltocase." 11 Huajca Pablo mocajqui altepetl Corinto para se xihuitl huan tlajco tlamachtiyaya itlajtol Toteco. 12 Teipa ipan nopa tonali quema Gali'on elqui gobernador ipan tlali Acaya, mosentilijque sequin israelitame tlen quicocolijque Pablo. Quiitzquijque huan quihuicaque iixtla Gali'on para quiteilhuise. 13 Huan quiilhuijque: --Ni tlacatl quinmacht'ia tlacame ma quihueyichihuaca Toteco, pero ax queja totlanahuatilhua quiijtohuaj ma tijchihuaj. 14 Huan quema Pablo pehuayaya camatis, Gali'on achtohui quinilhui israelitame: --Intla inquiteilhuisqu'iaj ni tlacatl ica se hueyi tlaixpanoli o se tlamantli tlen fiero quichijtoc, huajca notequi para nimechcaquis. 15 Pero ax queja nopa quichijtoc. San incualanij pampa tlamacht'ia tlen ax queja quiijtohuaj imotlanahuatilhua, huajca xijsencahuaca imoseltitzi nopa tlamantli. Ax notequi para nijsencahuas tlamantli queja nopa. 16 Huan quintotocac tlen nopa tequicali. 17 Huan miyac tlen ax israelitame quiitzquijque S'ostenes, nopa tlayacanquetl tlen israelita tiopamitl nepa. Huan quimaquilijque iixtla Gobernador Gali'on, pero yajaya ax quichihuili cuenta. 18 Pablo mocajqui altepetl Corinto miyac m'as tonali huan teipa quinnahuatijtejqui nopa tlaneltocani, huan yajque ipan nopa hueyi barco ininhuaya Aquila huan Priscila hasta tlali Siria. Ipan Cencrea Pablo motzoncalxintoyaya pampa tlanqui quichihua tlen quitencahuilijtoya Toteco quichihuasqu'ia queja israelitame momajtoque quichihuaj. Huan teipa calajque ipan barco huan yajque tlali Siria. 19 Huan quema ajsitoj altepetl 'Efeso, Pablo quincajqui Aquila huan Priscila. Huan Pablo yajqui ipan nopa israelita tiopamitl huan quincamahui nopa israelitame tlen mosentilijtoyaj. 20 Huan nopa israelitame quinequiyayaj Pablo ma mocahua m'as tonali ipan 'Efeso huan yajaya quinilhui para axtle. 21 San quinnahuatijtejqui huan quinilhui: "Monequi niitztos ipan Jerusal'en para nopa Pascua Ilhuitl, pero teipa nimocuepasanoc intla Toteco quinequis." Huan Pablo calajqui ipan se hueyi barco huan quisqui altepetl 'Efeso. 22 Huan nopa barco nejnenqui ipan hueyi atl hasta Cesarea. Huan tlen nepa Pablo yajqui quinpaxalotoj nopa tlasentilistli tlen tlaneltocani ipan altepetl Jerusal'en. Huan teipa nejnenqui hasta altepetl Antioqu'ia. 23 Pablo mocajqui ipan altepetl Antioqu'ia se quesqui tonali huan quisqui huan panotiyajqui ipan nopa tlaltini Galacia huan Frigia. Huan campa hueli quinyolchicajtinenqui nochi tlaneltocani tlen nepa itztoyaj. 24 Teipa ajsito altepetl 'Efeso se israelita tlen itoca Apolos tlen ejqui altepetl Alejandr'ia. Yajaya quipixqui miyac yajatili para camatis ica chicahualistli huan cuali quimatqui Itlajtol Toteco. 25 Sequinoc quimachtijtoyaj cuali quejatza iojhui Tohueyiteco Jes'us. Huan ica paquilistli camatiyaya huan tlamachtiyaya xitlahuac ajqueya Jes'us, pero san mocuaaltijtoya queja Juan tecuaalti achtohuiya. 26 Huan Aquila huan Priscila quicajque quema Apolos camatqui ica chicahualistli ipan nopa israelita tiopamitl. Huan teipa quihuicaque iyoca huan quiilhuijque Apolos quentzi m'as xitlahuac quejatza eltoc iojhui Toteco. 27 Huan Apolos quinequiyaya yas tlali Acaya, huan nopa tlaneltocani tlen altepetl 'Efeso quiyolchijcajque ma yohui. Huan quiijcuilojque se amatlajcuiloli para quinilhuise tlaneltocani ipan Acaya ma quiselica. Huan Apolos ajsito nepa huan quinpalehui miyac tlacame tlen quineltocatoyaj Jes'us pampa hueyi iyolo ininhuaya. 28 Huan ica chicahualistli Apolos tlanajnanquili tlamiyacapa ininhuaya israelitame campa miyac tlacame mosentilijtoyaj. Huan quinnextili ipan Itlajtol Toteco para Jes'us nel'ia nopa Cristo tlen israelitame quichiyayayaj ma huala.
