HECHOS 15

1Huan quema Pablo huan Bernab'e noja itztoyaj nepa Antioqu'ia ipan tlali Siria, ajsicoj sequin tlacame tlen hualajque estado Judea. Inijuanti pejque quinmacht'iaj nopa tlaneltocani para tlacame tlen ax israelitame ax huelis momaquixtise tlen inintlajtlacol intla ax motequilise nopa tlanescayotl tlen itoca circuncisi'on ipan inintlacayo queja tlamachti Mois'es. 2Huan Pablo huan Bernab'e chicahuac quincamahuijque nopa tlacame para ax melahuac inintlamachtil. Huajca nopa tlaneltocani nepa Antioqu'ia moilhuijque para elisqu'ia cuali intla Pablo huan Bernab'e ininhuaya sequinoc tlacame ma yaca hasta altepetl Jerusal'en para quincamahuitij nopa tlayolmelahuani huan huehue tlacame tlen tlaneltocani, huan san sejco quisencahuase ni tlamantli. 3Huajca nopa tlasentilistli tlen tlaneltocani ipan Antioqu'ia quintitlanque Pablo huan Bernab'e huan nopa sequinoc tlacame ma yaca. Huan inijuanti quisque huan panotiyajque tlaltini Fenicia huan Samaria. Huan quinyolmelajque tlaneltocani nopona para tlacame tlen ax israelitame quicajtehuayayaj inintlamachtil tlen huejcajquiya huan quineltocayayaj Jes'us. Huan nochi tlaneltocani nepa pajque miyac quema quicajque ni tlajtoli. 4Teipa Pablo huan Bernab'e ajsitoj Jerusal'en huan nopa tlasentilistli tlen tlaneltocani nepa, huan nopa tlayolmelahuani huan huehue tlacame quinselijque ica paquilistli. Huan Pablo huan Bernab'e quinpohuilijque nochi tlen Toteco quinpalehuijtoya ma quichihuaca ica tlen ax israelitame. 5Pero moquetzque ipan nopa tlasentilistli sequin fariseos tlen quineltocaque Jes'us huan quiijtojque para monequi tlen ax israelitame ma motequilica nopa tlanescayotl tlen itoca circuncisi'on huan nojquiya monequi quintoquilise itlanahuatil Mois'es para Toteco quinmaquixtis tlen inintlajtlacolhua. 6Huajca nochi tlayolmelahuani huan huehue tlacame tlen tlaneltocani mosentilijque ininselti para quisencahuase nopa tlamantli. 7Huan monajnanquilijque para miyac hora, huan teipa Pedro moquetzqui huan quinilhui: --Noicnihua, inquimatij quejatza huejcajquiya Tohueyiteco nechtlapejpeni na ma niquinilhui tlacame tlen ax israelitame itlajtol Toteco para huelis quineltocase. 8Huan Toteco yajaya tlen quiixmati ininyolo nochi tlacame quinexti para quinselijtoya nopa tlacame tlen ax israelitame pampa nojquiya quinmacac Itonal queja techmacac tiisraelitame achtohuiya. 9Yajaya quinchihuili san se queja techchihuili tojuanti, huan quinyolpajpajqui quema quineltocaque Jes'us. 10Huajca ┬┐para tlen ax inquisel'iaj tlen Toteco quinchihuili? ┬┐Para tlen inquinequij para nopa tlaneltocani tlen ax israelitame ma quintoquilica nopa miyac tlanahuatili tlen tlahuel ohui tlen niyon tojuanti, niyon tohuejcapan tatahua, ax tihuelque tijtoquilijque? 11Tijmatij para hueyi iyolo Toteco ica nochi tojuanti. Huan Toteco techtlajtlacolquixti tiisraelitame huan tlen ax israelitame quema tijneltocaque Tohueyiteco Jes'us. 12Huajca nochi nopa tlaneltocani ayoc tleno m'as quiijtojque. San m'as quitlacaquilijque quema Bernab'e huan Pablo pejque quinpohuil'iaj quejatza Toteco Dios quinpalehuijtoya quichihuase huejhueyi tlanescayotl huan chicahualnescayotl iniixtla nopa tlacame tlen ax israelitame. 13Huan quema Pablo huan Bernab'e tlanque camatij, Jacobo quiijto: --Noicnihua, xitechtlacaquilica. 14Sim'on Pedro ya techilhuijtoc queja Toteco achtohuiya pejqui quinnotza tlacame tlen ax israelitame para quiniyocaquixtis sequin inijuanti para quihueyichihuase. 15Huan tlacame tlen ax israelitame monequi quiixmatise Toteco para quitlamiltis tlen itiocamanalojcahua Toteco huejcajquiya quiijcuilojque para teipa panosqu'ia Pampa huejcajquiya Toteco quiijto: 16'Quema tlamis nochi ni tlamantli, teipa na nimocuepas huan sampa nijsencahuas campa David tlanahuatiyaya tlen ama eltoc queja se cali tlen huetztoc. Quena, yonque sosolijtoc campa David tlanahuati, nijcualtlalis huan nijsencahuas queja ipa eltoya para nopona nitlanahuatis. 17Para nopa israelitame tlen mocahuaj ma nechtemoca para nechixmatise, ininhuaya nochi nopa tlacame tlen ax israelitame tlen niquiniyocatlalijtoc para noaxcahua. 18Quej ni na niquijtohua, niimoTeco. Na tlen nimechmatilti tlen huejcajquiya ni tlamantli tlen nijchihuas teipa.' 19Jacobo noja quincamahui huan quinilhui: --Huajca na nimoilhu'ia ayoc tiquincuatotonise tlen ax israelitame tlen quinequij quitoquilise Tohueyiteco. 20Cuali tiquintlajcuilhuise huan tiquinilhuise ma ax quicuaca tlacualistli tlen sequinoc quitlalijtoque iniixtla totiotzitzi. Huan ma ax quichihuaca tlamantli ihuaya se tlen ax ininnamic. Nojquiya ma ax quincuaca tlapiyalime tlen san quinquechpatzcatoque. Niyon ma ax quicuaca estli, 21pampa tlen huejcajquiya huan hasta ama ipan sesen altepetl itztoque israelitame tlen tepohuil'iaj itlanahuatil Mois'es ipan sesen tonal para mosehuise huan inijuanti tlahuel quiijiyaj tlen quiij estli. 22Huajca nochi tlayolmelahuani, huan nopa huehue tlacame huan nochi sequinoc tlaneltocani ipan nopa tlasentilistli ipan Jerusal'en quiijtojque cualtitoc tlen quiijto Jacobo. Huan moilhuijque cuali para quintlapejpenise se ome tlacame ma yaca Antioqu'ia ininhuaya Pablo huan Bernab'e. Huan quintlapejpenijque ome tlacame tlen tlayacanayayaj, se itoca eliyaya Silas huan seyoc itoca eliyaya Judas tlen nojquiya itoca eliyaya Barsab'as. 23Huan ininhuaya quititlanque ni amatlajcuiloli tlen quej ni quiijto: Tojuanti titlayolmelahuani huan tihuehue tlacame tlen tlaneltocani nica ipan Jerusal'en timechtlajcuilhu'iaj ica ni amatlajcuiloli. Timechtlajpalohuaj imojuanti intoicnihua tlen ax inisraelitame nepa ipan altepetl Antioqu'ia huan ipan tlali Siria huan Cilicia. 24Tijcactoque sequin tlacame quisque nica huan yajque nepa huan inmechcuatotonijque huan inmechmacaque cuesoli ica tlen inmechilhuiyayaj, pero xijmatica para tojuanti ax tiquintitlantoque. 25Yeca san sejco tiquitaque cuali tiquintlapejpenisqu'iaj sequin tlacame ma yaca nepa ininhuaya Pablo huan Bernab'e tlen tiquinicnel'iaj miyac. 26Inijuanti quipanotoque miyac tlaohuijcayotl hasta mopantijque nechca miquilistlii pampa quineltocaj Tohueyiteco Jesucristo. 27Huan ama timechtitlanil'iaj Judas huan Silas para inmechilhuise tlen tiquijtojque nica. 28Itonal Toteco technextilijtoc para ax cuali timechtlalilise miyac tlanahuatili tlen nel'ia ohui para inquineltoquilise. San timechilhuise ni tlanahuatili tlen m'as monequi: 29Amo xijcuaca tlacualistli tlen sequinoc quitlalijtoque iixtla se totiotzi. Amo xijcuaca estli, niyon tlapiyalime tlen san quinquechpatzcatoque. Huan amo xijchihuaca tlamantli ihuaya se tlen ax imonamic. Intla inquichihuase nochi ni tlamantli, inquichihuase tlen cuali. Xiitztoca ica cuali. Quej nopa quiijto nopa amatl. 30Huajca quej ni nopa tlasentilistli ipan Jerusal'en quintitlanque Pablo, Bernab'e, Judas huan Silas hasta Antioqu'ia. Huan mosentilijque nochi tlaneltocani tlen ejque nepa, huan quinmactilijque nopa amatlajcuiloli. 31Huan nopa tlaneltocani ipan Antioqu'ia quipojque huan nel'ia pajque ica tlen quiijcuilojtoyaj. 32Huan pampa Judas huan Silas nojquiya eliyayaj tiocamanalohuani, inijuanti quincamahuijque nopa tlaneltocani miyac, huan quinyolchicajque huan quinmacaque m'as fuerza ipan Toteco. 33Huajca Judas huan Silas mocajque ipan Antioqu'ia se quentzi tonali, huan teipa nopa tlaneltocani quintitlanque ica paquilistli para ma mocuepaca Jerusal'en ica nopa tlaneltocani tlen quintitlantoyaj. 34Pero teipa Silas quinejqui mocahuas Antioqu'ia. 35Huan Pablo huan Bernab'e nojquiya mocajque ipan Antioqu'ia huan quinpalehuijque nopa sequinoc tlen tlamachtiyayaj huan tepohuiliyayaj itlajtol Tohueyiteco nepa. 36Teipa panoc miyac tonali, huan Pablo quiilhui Bernab'e: --Ma tiyaca sampa, tiquinpaxalotij nochi tlen quineltocaque Jes'us ipan sesen altepetl campa titepohuilijque itlajtol Toteco achtohuiya. Ma tiquitatij quejatza itztoque nopa tlaneltocani. 37Huan Bernab'e quinequiyaya quihuicas Juan Marcos ininhuaya, 38huan Pablo ax quinequiyaya ma yohui Juan Marcos, pampa yaja quincajtejtoya ipan tlali Panfilia quema achtohui yajque ipan ojtli. Ax mocajqui ininhuaya ipan nopa tequitl. 39Huajca Pablo huan Bernab'e tlahuel monajnanquilijque ica ni tlamantli hasta moiyocacajque. Huan Bernab'e quihuicac Juan Marcos huan calajque ipan barco huan yajque tlali Chipre. 40Huan Pablo quitlapejpeni Silas ma yohui ihuaya. Huan nopa tlaneltocani tlen Antioqu'ia quintlalijque imaco Toteco tlen hueyi iyolo para ma quintiochihuas. Huan teipa Pablo huan Silas quisque. 41Huan Pablo huan Silas nejnentiyajque, huan panoque tlaltini Siria huan Cilicia huan quinyolchicajtiyajque sesen tlasentilistli tlen tlaneltocani.

will be added

X\