HECHOS 14

1Huan teipa ipan altepetl Iconio Pablo huan Bernab'e calajque san sejco ipan nopa israelita tiopamitl huan tecamahuijque ica miyac chicahualistli hasta miyac israelitame huan miyac tlen ax israelitame tlen camatque griego quineltocaque Jes'us. 2Pero israelitame tlen ax quineltocaque pejque quinajcomanaj tlacame tlen ax israelitame para ma cualanica ica Pablo huan Bernab'e. 3Pero Pablo huan Bernab'e motemachijque ipan Toteco, huan mocajque nepa miyac tonali, huan tepohuiliyayaj ica miyac chicahualistli huan quinilhuiyayaj para nelhueyi iyolo Toteco ica tlacame. Huan Tohueyiteco quinmacac chicahualistli ma quichihuaca tlanescayotl huan chicahualnescayotl para tenextilise para Toteco Dios quinmacayaya inintlajtol. 4Pero nopa altepetl Iconio ehuani motlajcoxelojque huan sequin quintoquiliyayaj nopa tlayacanca israelitame, huan sequinoc quintoquiliyayaj nopa tlayolmelahuani. 5Huan nopa tlayacanca israelitame, ininhuaya tlen ax israelitame huan inintequihuejcahua, moyolilhuijque san sejco quejatza quinitzquisqu'iaj Pablo huan Bernab'e huan quintepachosqu'iaj. 6Pero Pablo huan Bernab'e quicajque tlen quinequiyayaj quinchihuilise huan cholojtejque. Yajque hasta tlali Licaonia campa mocahuaj altepetini Listra huan Derbe huan calajque ipan miyac altepetini huan pilaltepetzitzi tlen nechcatzitzi. 7Huan nepa tepohuilijque itlajtol Toteco. 8Huan ipan altepetl Listra itztoya se tlacatl tlen ax quema nejnentoya hasta quema tlacatqui pampa eltoya metzcuachotic. 9Huan nopa tlacatl mosehuiyaya huan quicaquiyaya tlen Pablo quiijto. Huan Pablo quitlachili huan quiitac quineltoca para huelis mochicahuas. 10Huajca Pablo nelchicahuac quiilhui: --Ximoquetza huan xijxitlahua moicxihua. Huan yajaya moquetzqui, huitontejqui huan pejqui nejnemi. 11Huan quiitaque nopa tlacame tlen Pablo quichijtoya, huan pejque tzajtzij ica inintlajtol Licaonia. Quiijtojque: --Ome totiotzitzi mocueptoque tlacame huan ajsicoj nica. 12Huan quitocajtiiyayaj Bernab'e nopa tlaixcopincayotl J'upiter huan Pablo nopa tlaixcopincayotl Mercurio, pampa Pablo camatiyaya miyac. 13Huan eltoya se tiopamitl iteno altepetl Listra campa tlacame quihueyimatque J'upiter. Huan se totajtzi tlen quitequipano J'upiter nepa quinhualicac torojme huan xochi mecatl. Huan yajaya ininhuaya nochi nopa tlacame quinequiyayaj quinmictise nopa torojme, huan quinmacase Pablo huan Bernab'e queja tlacajcahualistli para quinhueyichihuasqu'iaj. 14Pero quema Pablo huan Bernab'e quiitaque tlen quichihuayayaj, quitzayanque ininyoyo para ma quimatica nopa tlacame ax cuali tlen quichihuasnequiyayaj. Huan Pablo ihuaya Bernab'e motlalojque campa itztoyaj nopa tlacame, 15huan tzajtzique: --Tates, ax quinamiqui tlen inquichihuaj. Tojuanti nojquiya titlacame queja imojuanti. San tihualajque timechilhuise para monequi inquicajtehuase imotlaixcopincayohua huan imotiotzitzi tlen ax tleno inmechpalehu'iaj. Monequi xijneltocaca Toteco tlen nel'ia yoltoc, tlen quichijqui elhuicactli, tlaltepactli, nochi hueyi atl, huan nochi tlamantli tlen ininpan itztoque. 16Huejcajquiya Toteco Dios quincahuili nochi tlacame ma nemica queja quinpactiyaya. 17Pero noja Toteco quinnextiliyaya ajqueya yajaya huan quinchihuiliyaya tlacame tlen cuali. Quichijqui ma huetzi atl huan ma onca pixquistli tlen cuali. Huan temacayaya nochi tlen monequiyaya para ma tlacuaca huan para ma yolpaquica. 18Huan yonque Pablo quinilhui nochi ni tlajtoli, noja quinequiyayaj quinmictise torojme para quinmacase queja se tlacajcahualistli. Ica ohui quintzacuilijque para ma ax quichihuaca. 19Pero teipa ajsicoj sequin tlayacanca israelitame tlen hualajtoyaj altepetini Antioqu'ia huan Iconio campa Pablo huan Bernab'e cholojtejtoyaj. Huan tlahuel quinajcomanque nopa miyac tlacame ipan Listra huan san sejco quitepachojque Pablo. Huan moilhuijque ya mictoya, huajca quihuahuatatzque altepeteno huan quicajtejque. 20Pero nopa tlaneltocani quiyahualocoj Pablo, huan nimantzi mejqui huan sampa calaquito ipan nopa altepetl. Huan tonili Pablo huan Bernab'e quisque Listra huan yajque altepetl Derbe. 21Huan tepohuilijque itlajtol Toteco nepa Derbe, huan miyac quineltocaque Jes'us. Huan teipa Pablo huan Bernab'e mocuepque Listra, Iconio, huan Antioqu'ia. 22Huan ipan nopa altepetini quinyolchicajque nopa tlaneltocani huan quinfuerzajmacaque para m'as ma motemachijtinemica ipan Tohueyiteco, quinilhuijque: "Monequi tijpanotiyase miyac trabajojyotl nica, huan teipa ticalaquise campa Toteco tlanahuat'ia." 23Huan Pablo huan Bernab'e quintlapejpenijque huehue tlaca tlaneltocani campa hueli ipan sesen tlasentilistli tlen tlaneltocani. Huan mosajque, huan momaijtojque ininhuaya huan quincajque imaco Toteco tlen ipan motemachijtoyaj. 24Teipa Pablo huan Bernab'e quisque nepa huan panoque ipan tlali Pisidia huan ajsitoj tlali Panfilia. 25Huan tepohuilijque itlajtol Toteco ipan altepetl Perge huan teipa yajque altepetl Atalia. 26Nepa calajque ipan barco huan mocuepque ipan altepetl Antioqu'ia ipan tlali Siria campa nopa tlaneltocani achtohuiya quintlapejpenijtoyaj huan quincajtoyaj imaco Toteco tlen hueyi iyolo tohuaya para ma quichihuaca nopa tequitl para tepohuilise tlen Cristo tlen ama quitlamichijtoyajya. 27Huan quema Pablo huan Bernab'e ajsitoj Antioqu'ia, mosentilijque nopa tlaneltocani nopona. Huan Pablo huan Bernab'e quinpohuilijque nochi tlen Toteco quichijtoya ica inijuanti Huan quinilhuijque quejatza quitlapojqui puerta para tlacame tlen ax israelitame ma nojquiya quineltocaca Jes'us. 28Huan mocajque Antioqu'ia ininhuaya nopa tlaneltocani para miyac tonali.

will be added

X\