HECHOS 13

1Itztoyaj sequin tiocamanalohuani huan tlamachtiani ipan nopa tlasentilistli tlen tlaneltocani ipan altepetl Antioqu'ia. Itztoyaj Saulo, Bernab'e, Sim'on tlen nojquiya itoca Niger, huan itztoyaj Lucio tlen ejqui Cirene huan Mana'en tlen moscalti ihuaya Herodes tlen quipixqui tequihuejcayotl ipan estado Galilea. 2Huan se tonal nochi quihueyichihuayayaj Toteco huan momaijtohuayayaj, huan mosahuayayaj, huan Itonal Toteco quinilhui: "Xiquiniyocatlalica Bernab'e huan Saulo para ma yaca ipan se tequitl tlen niquintlapejpenijtoc ma quichihuaca." 3Huajca mosajque huan momaijtojque, huan quintlalilijque ininma ininpani Bernab'e huan Saulo para ma quiselica inintequi. Huan quintitlanque ma yaca tequititij. 4Huajca Itonal Toteco quintitlanqui Bernab'e huan Saulo huan inijuanti yajque altepetl Seleucia. Nepa calajque ipan se hueyi barco huan yajque hasta tlali Chipre. 5Huan ajsitoj ipan altepetl Salamina huan pejque tlacamanalohuaj itlajtol Toteco ipan israelita tiopantini. Huan Juan Marcos yajqui ininhuaya para quinpalehuis. 6Bernab'e huan Saulo panotiyajque campa hueli ipan nopa piltlaltzi Chipre tlen mocahua tlatlajco hueyi atl huan teipa ajsitoj altepetl Pafos. Huan nepa quipantijque se israelita tlen itoca Barjes'us tlen eliyaya se tetlajchihuijquetl huan se istlacatica tiocamanalojquetl. 7Huan Barjes'us itztoya ihuaya se hueyi tequihue tlen itoca Sergio Paulo, tlen quipixqui miyac itlalnamiquilis. Huan nopa tequihue quinnotzqui Bernab'e huan Saulo ma hualaca ichaj pampa quinequiyaya quicaquis itlajtol Toteco. 8Pero nopa tetlajchihuijquetl Barjes'us, tlen itoca Elimas ica tlajtoli griego, quintzacuili pampa ax quinequiyaya nopa tequihue ma quineltoca itlajtol Toteco. 9Huajca Saulo, tlen nojquiya itoca Pablo, temitoya ica Itonal Toteco, quitlachili nopa tetlajchihuijquetl, 10huan quiilhui: --Elimas, tiicone Axcualtlacatl. San tijmati titlacajcayahua huan tijchihua nochi tlen ax cuali. Tiicualancaitaca nochi tlen xitlahuac. Nochipa tiquintzacuil'ia tlen quinequij calaquise ipan icualojhui Toteco. 11Huajca xiquita, amantzi Tohueyiteco mitztlaijiyohuiltis huan timocahuas tipopoyotzi huan ax titlachiyas para miyac tonali. Huan nimantzi ixtzintlayohuili huan mocajqui popoyotzi huan pejqui quimatemohua ajqueya quimatilanasqu'ia. 12Huan nopa hueyi tequihue Sergio quiitac tlen panoc ica Elimas, huan quineltocac itlajtol Toteco huan quisentlachili ica nochi tlen quicajqui tlen Jes'us. 13Teipa Pablo ininhuaya ihuampoyohua calajque ipan se barco huan quisque Pafos huan ajsitoj nopa altepetl Perge ipan tlali Panfilia. Huan nepa Juan Marcos quincajtejqui huan mocuepqui Jerusal'en. 14Huan teipa Pablo huan Bernab'e quisque altepetl Perge huan yajque seyoc altepetl tlen nojquiya itoca Antioqu'ia, pero ni Antioqu'ia elqui ipan tlali Pisidia. Huan ipan s'abado, nopa tonal para mosehuise israelitame, Pablo huan Bernab'e calajque ipan nopa israelita tiopamitl nepa huan mosehuijque. 15Huan nopa tequihuejme tlen tiopamitl quipojque tlen itlanahuatil Mois'es huan tlen nopa amatlapohuali tlen quiijcuilojtoyaj itiocamanalojcahua Toteco. Huan teipa nopa tequihuejme quinnotzque Pablo huan Bernab'e huan quinilhuijque: --Toicnihua, intla inquipiyaj se tlajtoli para ica intechyolchicahuase, huajca xitechilhuica ama. 16Huajca Pablo moquetzqui huan quintlamanextili nopa tlacame ma ax molinica. Quiijto: --Xijtlacaquilica inisraelitame huan nochi tlen inquitlepanitaj Toteco. 17Toteco, yajaya tlen toDios tiisraelitame, quintlapejpeni tohuejcapan tatahua, huan quinchihuili para ma momiyaquilica quema itztoyaj ipan nopa tlali Egipto huejcajquiya. Teipa Toteco quinquixti ipan Egipto ica ihueyi chicahualis. 18Huan para cuarenta xihuitl Toteco quiijiyohui nochi tlen tohuejcapan tatahua quichihuayayaj ipan nopa huactoc tlali campa ax tleno eli. 19Huan Toteco quinmicti chicome inieso tlacame tlen camatiyayaj sesen tlamantli tlajtoli tlen itztoyaj ipan tlali Cana'an, huan Toteco quinmacac nopa tlali tohuejcapan tatahua. 20Nochi ni panoc para nahui ciento huan cincuenta xihuitl. "Huan teipa Toteco quintlali jueces para tetlajtolsencajque hasta monexti nopa tiocamanalojquetl Samuel. 21Huan teipa tohuejcapan tatahua quitlajtlanijque Toteco ma quitlali se hueyi tlanahuatijquetl. Huan Toteco quitlali Sa'ul, icone Cis, yajaya tlen se iteipa ixhui tohuejcapan tata Benjam'in. Huan Sa'ul tlanahuati para se 40 xihuitl. 22Huan teipa Toteco quiquixti Sa'ul huan quitlali David para elis tlanahuatijquetl. Huan Toteco quiijto: 'Nijpantijtoc David, icone Isa'i, para eli se tlacatl tlen tlahuel nechpact'ia. Yajaya quichihuas nochi tlen nijnequi ma quichihua.' " 23Pablo noja quincamahuiyaya nopa tlacame tlen Antioqu'ia huan quinilhui: --Toteco techtitlanili se iteipa ixhui nopa Tlanahuatijquetl David queja techtencahuili para quichihuas, huan yajaya Jes'us, Totemaquixtijca tiisraelitame. 24Pero quema aya hualayaya Jes'us, hualajqui Juan quinilhuico israelitame ma moyolcuepaca huan ma mocuaaltica. 25Huan quema Juan quitlamiltiyaya itequi, quinilhui tlacame para ax ya Cristo tlen inijuanti moilhuiyayaj. Quinilhui para Cristo hualasqu'ia teipa. Huan Juan quiijto para yajaya ax quinamiqui itztos itlatequipanojca Cristo, niyon para quiquixtilis itecac. 26"Innoisraelita icnihua tlen initeipa ixhuihua tohuejcapan tata Abraham, xijtlacaquilica. Nojquiya xijtlacaquilica imojuanti tlen ax inisraelitame, pero inquitoquil'iaj Toteco, toDios tiisraelitame. Toteco techmacatoc tojuanti nochi ni tlajtoli para techmaquixtis. 27Pero quema ajsico Jes'us nepa, ax quiixmatque Jerusal'en ehuani huan inintequihuejcahua, yonque sesen s'abado momajtoyaj yohui israelita tiopa huan quitlacaquil'iaj nopa tlajtoli tlen itiocamanalojcahua Toteco quiijcuilojque tlen ya. Inijuanti ax quimachilijque nopa tlajtoli quinilhuiyaya tlen Jes'us. Huajca quichijque senquistoc nochi tlen nopa tiocamanalohuani quiijtojtoyaj achtohuiya para quichihuasqu'iaj. 28Huan yonque ax quipantilijque niyon se itlajtlacol, quitlajtlanijque Pilato ma quimicti. 29Huajca nochi panoc queja tlen ijcuilijtoc huejcajquiya ipan iniama nopa tiocamanalohuani para teipa panos. Huan quitemohuijque itlacayo ipan nopa cuamapeli, huan quitlalijque ipan se tlacacahuaya. 30Pero Toteco Dios quiyoliti Jes'us quema ya mictoya, 31huan para miyac tonali Jes'us monexti iniixtla nopa tlacame tlen ipan ipejya itequi quisque ipan estado Galilea ihuaya huan yajque hasta Jerusal'en. Huan inijuanti tlen quiitaque Jes'us quema moyolcuitoya, ama tlayolmelajtinemij tlen ya. 32"Huan tojuanti nojquiya timechilhu'iaj ni cuali tlajtoli tlen Toteco quintencahuili tohuejcapan tatahua achtohuiya para teipa techmacas. 33Huan Toteco techchihuilijtoc tiininteipa ixhuihua queja quinilhuijtoya tohuejcapan tatahua quichihuasqu'ia pampa quiyoliti Jes'us. Eltoc queja ijcuilijtoc ipan nopa Salmo ome: 'Ta tiNocone. Ama nitlayolmelahua tlamiyacapa para na nimoTata.' 34Huan Toteco huejcajquiya quiijto quiyolitisqu'iaj Jes'us huan ax palanisqu'ia itlacayo. Quej ni ijcuilijtoc ipan Itlajtol Toteco campa Toteco quiilhui Jes'us: 'Temachtli nimitzmacas nopa tlatiochihualistli tlen nijtencahuili David para nijmacas.' 35Ipan seyoc Salmo David quiijto: 'Ta tiToteco, ax tijcahuilis ma palani itlacayo Motlatequipanojca Tlen Tlatzejtzeloltic.' 36"Pero ni tlajtoli ax camatqui tlen David pampa David tequitic ica itlacajhua huan teipa mijqui huan quitlalpachojque huan palanqui itlacayo. 37Pero ni tlajtoli camatqui tlen Jes'us tlen Toteco quiyoliti huan itlacayo ax palanqui. 38Huajca noicnihua, xijmatica san yajaya Jes'us tlen timechyolmelahuaj huelis inmechtlapojpolhuis imotlajtlacolhua. 39Nochi tlacame tlen quineltocaj Jes'us, yajaya quinchihua xitlahuaque iixpa Toteco Dios, pero itlanahuatil Mois'es ax quema huelque quichihuase se acajya xitlahuac iixpa Toteco. 40Huajca xijtlacaquilica ni tlajtoli tlen Jes'us huan xijneltocaca. Ximomocuitlahuica para ma ax inmechpanos tlen nopa tiocamanalohuani huejcajquiya quiijcuilojque campa Toteco quiijto: 41'Xiquitaca, imojuanti tlen innechtlaijilhuijtoque. Ximosentlachilica ica tlen nijchihua huan teipa inmiquise. Pampa na niDios nijchihuas huejhueyi tlamantli ipan ni tonali tlen ax inquineltocase yonque sequinoc inmechpohuilise para quiitztoque.' " Huajca Pablo tlanqui quincamahu'ia nopa tlacame. 42Huan quema Pablo ihuaya Bernab'e quisayayaj ipan nopa israelita tiopamitl nopa tonal, nopa tiopan tequihuejme quintlajtlanijque ma sampa hualaca hualchicueyi huan sampa ma quincamahuise tlen Jes'us. 43Huan quema quisque nochi tlacame ipan nopa tlasentilistli, quintoquilijque Pablo huan Bernab'e miyac israelitame huan miyac tlen ax israelitame pero quiselijtoyaj inintiotlajtol israelitame. Huan Pablo huan Bernab'e quinilhuijque ma quitoquilica Toteco pampa nel'ia hueyi iyolo ica nochi tojuanti. 44Huan hualchicueyi sampa ajsico nopa tonal para mosehuise israelitame, huan mosentilijque nechca nochi tlacame tlen itztoyaj Antioqu'ia para quicaquise itlajtol Toteco. 45Pero nopa tlayacanca israelitame quiitaque para hualajtoyaj miyac tlacame para quicaquise itlajtol Toteco huan pejque quixicohuaj Pablo. Quiijtojque para ax neli tlen quiijtohuayayaj huan quintlaijilhuijque. 46Huajca Pablo huan Bernab'e moneltlalijque huan camatque ica miyac chicahualistli huan quinilhuijque: --Monequiyaya achtohui timechilhuise inisraelitame ni tlajtoli tlen Toteco. Pero ax inquinequij inquineltocase. Inmoilhu'iaj ax quinamiqui para inquiselise ni yolistli tlen ax quema tlamis. Yeca amantzi timechcajtehuase huan tiquincamahuitij tlacame tlen ax israelitame, 47pampa Toteco queja nopa technahuati campa ijcuilijtoc: 'Nimitztlapejpeni para tiquinnextilis ni tlajtoli tlacame tlen ax israelitame ipan campa hueli tlali ipan tlaltepactli. Quej nopa quiixmatise tlen monequi para nochi huelise momaquixtise tlen inintlajtlacolhua hasta campa m'as huejca ipan tlaltepactli.' 48Huan inijuanti tlen ax israelitame nepa quicajque tlen Pablo quiijto, huan tlahuel pajque. Huan quitlascamatque Toteco ipampa itlajtol. Huan quineltocaque nochi inijuanti tlen Tohueyiteco ipa quintlapejpenijtoya para itztose para nochipa. 49Huajca queja nopa momajtiyajqui itlajtol Toteco ipan nochi nopa tlali. 50Pero nopa tlayacanca israelitame quinajcomanque tequihuejme ipan nopa altepetl huan sequin sihuame tlen tominpixtoyaj ipan nopa israelita tiopamitl. Huan nochi inijuanti mosisinijque san sejco huan quintlaijiyohuiltijque Pablo huan Bernab'e huan quintotocaque tlen inialtepe. 51Huajca Pablo huan Bernab'e quitzejtzelojque iniicxihua para quinnextilise ax cuali tlen nopa israelitame quinchihuilijtoyaj huan teipa yajque altepetl Iconio. 52Pero nopa tlaneltocani tlen mocajque nepa ipan Antioqu'ia quipixque hueyi paquilistli huan temitoyaj ininyolo ica Itonal Toteco.

will be added

X\