HECHOS 1

1Noicni Te'ofilo, achtohui nimitztlajcuilhui huan nimitzilhui nochi tlen Jes'us quichijtiyajqui huan nochi tlen tlamachtijtiyajqui tlen pejqui itequi, 2hasta nopa tonal quema tlejcoc elhuicac. Nimitzilhui quejatza quintlapejpeni nopa tlacame para elise itlayolmelajcahua huan quejatza quinnahuati ica ichicahualis Itonal Toteco tlaque tequitl monequi ma quichihuaca. 3Jes'us nel'ia tlaijiyohui huan mijqui, pero teipa monextiyaya yoltoc iniixtla itlayolmelajcahua miyac hueltas para cuarenta tonali para quinnextilis para yoltoc. Huan yonque inijuanti quitlalilijque miyac tlayejyecoli para quimatise intla nel'ia yoltoc, yajaya cualquisqui ipan nopa tlayejyecoli huan yeca inijuanti quimatque temachtli para nel'ia moyolcuitoya. Huan ipan nopa cuarenta tonali Jes'us quinilhuiyaya quejatza elis quema Toteco tlanahuatis. 4Huan quema Jes'us noja itztoya ininhuaya itlayolmelajcahua, quinnahuati ma mocahuaca ipan altepetl Jerusal'en hasta hualas Itonal Toteco. Quinilhui: --Ximochiyaca nica hasta hualas Itonal Toteco tlen Notata inmechtencahuili inmechtitlanilis. Xiquilnamiquica na nojquiya nimechilhuijtoc tlen ya. 5Juan nel'ia tecuaalti ica atl, pero ica se ome tonal Toteco inmechmacas Itonal ipan imoyolo. 6Huan quema itlayolmelajcahua noja itztoyaj ihuaya Jes'us, quitlajtlanijque: --Tohueyiteco, ┬┐ipan ni tonali titechtojtomas tiisraelitame tlen altepetl Roma tlen ama technahuat'ia? ┬┐Sampa tijchihuas ma tijpiyaca toisraelita tlanahuatijca para technahuatis ipan nochi ni totlal queja tijpixque huejcajquiya? 7Huan Jes'us quinnanquili: --Ax monequi inquimatise tlaque hora, niyon tlaque tonali noTata quichihuas nochi ni tlamantli tlen san yajaya quipiya tequihuejcayotl para quichihuas. 8Pero quema ajsis Itonal Toteco ipan imoyolo, inquipiyase chicahualistli huan inyase intlayolmelahuatij tlen na ipan ni altepetl Jerusal'en, huan ipan estados Judea huan Samaria. Huan teipa intlayolmelahuatij tlen na hasta campa m'as huejhuejca pilaltepetzitzi ipan ni tlaltepactli. 9Huan Jes'us tlanqui quincamahu'ia huan tlejcoc elhuicac. Huan itlayolmelajcahua san quitlachilijtoyaj quema hualajqui se mixtli tlen quitlamitzacuaco, huan ayoc quiitaque. 10Huan itlayolmelajcahua noja tlachixtoyaj elhuicac campa tlejcotoya huan nimantzi monextijque ome elhuicac ehuani tlen quipixtoyaj ininyoyo nelchipahuac. 11Huan quinilhuijque: --Xijtlacaquilica inGalilea ehuani, ax monequi inmoquetztose nica intlachixtoque elhuicac. Yajaya ni Jes'us tlen ama tlejcoc elhuicac teipa hualasoc san se queja inquiitztoque yajqui. 12Huajca nopa tlayolmelahuani quisque campa nopa tepetl tlen itoca Olivos, huan mocuepque altepetl Jerusal'en. Jerusal'en mocahua queja se kil'ometro ihuejcanca tlen tepetl Olivos, huan eliyaya queja ihuejcanca itlanahuatil Mois'es quincahuil'iaj israelitame ma nejnemica ipan se tonal para mosehuise. 13Huan itlayolmelajcahua ajsitoj ipan Jerusal'en huan tlejcoque ipan se cali tlen quipixqui ome pisos campa mocahuayayaj. Itztoyaj nepa Pedro, Jacobo, Juan, Andr'es, Felipe, Tom'as, Bartolom'e, Mateo huan Jacobo icone Alfeo. Nojquiya itztoya Sim'on tlen moiyocanequiyaya ica partido cananista, huan itztoya Judas, iicni Jacobo. 14Huan nojquiya itztoyaj sihuame huan Mar'ia, inana Jes'us, huan iteipa icnihua Jes'us. Huan nochi inijuanti ajachica momaijtohuayayaj san sejco ica san se ininyolo. 15Huan se tonal quema mosentilijtoyaj queja 120 tlaneltocani, Pedro moquetzqui tlatlajco inijuanti huan quiijto: 16"Noicnihua, monequiyaya panos nochi tlen tiquitztoque ica Judas para ma quitlamiltis tlen ijcuilijtoc ipan Itlajtol Toteco huejcajquiya para teipa panos. Pampa Itonal Toteco huejcajquiya quiilhui tohuejcapan tata David ma quiijcuilo nochi tlen Judas quichihuasqu'ia, yajaya tlen quinyacanqui nopa tlacame tlen quiitzquijque Jes'us para ma quimictica. 17Judas itztoya se tlen tojuanti tlen tiimomachtijcahua Jes'us huan tequitic tohuaya. 18Ica nopa tomi tlen tlacame quitlaxtlahuijque Judas para quitemactilis Jes'us, yajaya quicojqui se tlali huan huetzqui nepa ica itzonteco. Huan tzayanqui iijti huan quisqui nochi icuitlaxcol. 19Huan quema nochi Jerusal'en ehuani quicajque tlen panoc, quitocajtijque nopa tlali 'Ac'eldama', ica inintlajtol tlen quinequi quiijtos, 'Tlali tlen Estli'. 20Quej nopa panoc pampa ya ijcuilijtoc ipan nopa amatl Salmos ipan Itlajtol Toteco campa quiijtohua: 'Ichaj nopa tlacatl ma mocuepa tlatzitzicatoc huan ma axaca itzto nepa.' Nojquiya quiijtohua: 'Ma seyoc tlacatl quihuica itequi.' 21"Huajca ma tijtlapejpenica seyoc tlacatl para quichihuas itequi. Ma elis se tlen nejnentoc tohuaya nochi tonali quema Tohueyiteco Jes'us itztoya tohuaya. 22Ma tijtlapejpenica se tlacatl tlen itztoya tohuaya tlen quema Juan quicuaalti Jes'us hasta teipa quema Jes'us tlejcoc elhuicac. Huan yajaya tlen tijtlapejpenise tequitis tohuaya para teilhuis para nel'ia moyolcuitoc Jes'us." 23Huan quintlalijque ome tlacame. Se tlacatl quipixqui eyi itoca. Itoca Jos'e, Barsab'as, huan Justo. Nojquiya quitlalijque seyoc tlacatl tlen itoca eliyaya Mat'ias. 24Huan momaijtojque huan quiijtojque: "Tohueyiteco, cuali tiquinixmati ininyolo nochi tlacame. Xitechnextili catl'ia ni ome tlacame tijtlapejpenijtoc ta, 25para quichihuas ni tequitl queja motlayolmelajca ipatlaca Judas tlen huetzqui ipan tlajtlacoli huan tlen yajqui campa quinamiqui ma yas." 26Huan teipa mahuiltijque ica piltetzitzi tlen yejyectzitzi para quimatise ajqueya Toteco quinequiyaya ma quichihua nopa tequitl. Huan quinexti para Toteco quinejqui Mat'ias. Huajca Mat'ias pejqui tequiti ininhuaya nopa majtlactli huan se tlayolmelahuani.

will be added

X\