3 JUAN 1

1Na nieli nopa huehue tlacatl nimitztlajcuilhuil'ia, tinohuampo Gayo, tlen nel'ia nimitzicnel'ia. 2Noicni tlen nimitzicnel'ia, quema nimomaijtohua, nijtlajtlan'ia Toteco para nochi ma yohui nel'ia cuali para ta ipan nochi tlamantli. Nijtlajtlan'ia Toteco para xiitzto cuali ipan motlacayo queja nojquiya moalma eltoc cuali iixtla. 3Nel'ia nipajqui quema hualajque toicnihua huan techilhuijque quej tijtoquil'ia tlen melahuac huan tijchihua tlen xitlahuac. 4Ax tleno huelis nechmacas m'as paquilistli, pampa miyac nipaqui quema nijcaqui para noconehua nemij ipan se ojtli tlen xitlahuac. 5Noicni Gayo tlen nimitzicnel'ia, nel'ia tijchihua tlen cuali quema tiquinsel'ia huan tiquinpalehu'ia toicnihua tlen tlamachtijtinemij, huan quema tiquinsel'ia tlen ax tlaixmatilme. 6Yajuanti techyolmelahuacoj titlaneltocani nica ipan ni totiopa quejatza titeicnel'ia. Cuali para tiquinpalehuis ipan iniojhui tlen quitequipanohuaj Toteco, pampa ya nopa quinamiqui ma tijchihuaca ica tlen quitequipanohuaj Toteco. 7Pampa nopa tlamachtiani yohuij campa hueli pampa quiicnel'iaj Toteco. Huan ax tleno quisel'iaj tlen sequinoc tlen ax quineltocaj Toteco. 8Huajca monequi tiquinpalehuise tlen quitequipanohuaj Toteco para queja nopa yajuanti huan tojuanti san sejco tijchihuase para ma momoyahua tlen melahuac. 9Niquijcuilo para xiteselica ipan seyoc amatlajcuiloli huan nijtitlanqui para nopa tiopamitl tlen tlaneltocani nepa. Pero Di'otrefes tlen quipact'ia tlayacanas nopano, ax quisel'ia totequihuejcayo huan ax quichihuil'ia cuenta tlen tiquijtohuaj. 10Quema niajsiti nopano, nimechyolmelahuas tlen fiero quichihua, huan quejatza techilnamictinemi huan techistlacahuijtinemi. Huan ax paqui san para ya nopa quichihua, yajaya nojquiya ax quinsel'ia toicnihua tlen tlamachtijtinemij itlajtol Toteco. Huan quintzacuil'ia sequinoc tlen quinequij quinselise, huan intla acajya quinsel'ia totlamachtijcahua, quintojtoca ipan tiopa. 11Noicni tlen nimitzicnel'ia, amo xijtoquili se tlen ax cuali. Xijtoquili tlen cuali. Ajqueya quichihua tlen cuali quinext'ia para yajaya iaxca Toteco, huan tlen quichihuaj tlen ax cuali quinext'iaj ax quiixmatij Toteco. 12Nochi tlaneltocani camatij cuali tlen toicni Demetrio huan melahuac inintlajtol. Tojuanti nojquiya timechyolmelahuaj para Demetrio quihuica se cuali ojtli huan inquimatij melahuac tlen tiquijtohuaj. 13Nijpixqui miyac tlamantli tlen nijnequiyaya nimitzilhuis, pero ax niquijcuilos nochi ipan ni amatl. 14Pampa nijnequi niyas nepa achi nimantzi huan timocamahuise timoixtlachilijtose. 15Ma Toteco mitzmaca tlasehuilistli. Mitzontlajpalohuaj mohuampoyohua nica. Xinechontlajpalhuili sesen tohuampoyohua tlen itztoque nopano.

will be added

X\