2 TIMOTEO 2

1Nocone Timoteo, tijmati para nel'ia hueyi iyolo Toteco ica ta ipan Cristo Jes'us huan mitzmacatoc miyac yajatili. 2Nopa tlamachtili tlen tijcajqui nitlamachti iniixpa miyac tlacame, ama xiquinmachti sequinoc tlen temachme para teipa inijuanti no huelise quinmachtise sequinoc. 3Nojquiya xiquijiyohui tlaijiyohuilistli nohuaya queja se cuali soldado tlen Jesucristo. 4Xijchihua queja se tlacatl tlen mosoldadojchihua. Yajaya ax hueli moilpis ica tlamantli ipan ininyolis sequinoc tlacame. San hueli moyolilhu'ia quejatza quipactis iteco tlen quisoldadojchijqui. 5Huan xijchihua queja se motlalojquetl tlen motlalohua ica sequinoc para quiitase ajqueya tlatlanis. Monequi motlalos senquistoc xitlahuac queja quiijtohua tlanahuatili o ax huelis tlatlanis huan quiselis nopa xochi corona. 6Huan milchihuani monequi achtohui ma tequitica chicahuac para huelis teipa quicuase tlen quipixcase. 7Huajca ximoyolilhui miyac ica tlen nimitzilhuijtoc nica huan Toteco mitzpalehuis tijmachilis nochi. 8Xiquilnamiqui Jesucristo quema titlaijiyohu'ia. Yajaya tlen tlacatqui queja iteipan ixhui Tlanahuatijquetl David tlen huejcajquiya huan yajaya tlen sampa moyoliti quema mictoya. Ya ni nopa cuali tlajtoli tlen nitlacamanalohua, 9huan yeca niquijiyohu'ia miyac tlaohuijcayotl huan niilpitoc ica tepos cadena queja se tlaixpanoquetl tlen temajmati. Pero yonque na niilpitoc ica tepos cadena, Toteco itlajtol ax ilpitoc. 10Huan niquijiyohu'ia nochi tlen huala pampa niquinicnel'ia inijuanti tlen Toteco quintlapejpenijtoc nojquiya para iaxcahua. Nijnequi inijuanti ma momaquixtica ipan Cristo Jes'us para huelis itztose para nochipa nepa campa tlatlanextli. 11Ya ni se tlajtoli tlen melahuac: Intla timijque quema Cristo mijqui, nojquiya tiyoltose ihuaya. 12Intla tiquijiyohu'iaj tlaohuijcayotl pampa tiquixmatij, se tonal titlanahuatise ihuaya. Intla tiquijtohuaj ax tijchihuase tlen Cristo techilhu'ia, huajca yajaya quiijtos ax techmacas nopa tlatlancayotl. 13Intla tojuanti ax tiitztoque titemachme, yajaya mocahua temachtli pampa ax hueli quiijtos ax moixmati ica iselti huan yajaya itztoc ipan toyolo. 14Xiquinilnamiquilti tlaneltocani tlen ni tlamantli. Xiquinnahuati iixpa Toteco ma ax tlanajnanquilica tlen quiijtosnequi sesen tlajtoli, pampa ax ipati huan quitlaminenpolos ininyolis tlen quitlacaquilise. 15Xitequiti chicahuac para quema ajsis nopa tonal quema timonextis iixpa Toteco, yajaya hueli quiijtos para tijchijqui tlen quipact'ia. Xiitzto se icual tlatequipanojca tlen ax monequi mopinahuas pampa cuali quimati quejatza quitequihuis huan quiixtomas Itlajtol tlen melahuac. 16Xiquincajtehua tlacame tlen tlamacht'iaj tlen ax quinamiqui huan tlen ax ipati, pampa ica inintlajtol quinyacanaj tlacame ma quichihuaca m'as tlamantli tlen ax quipact'ia Toteco. 17Inintlamachtil tlen ax melahuac tlamahuas queja se cocolistli tlen tlamahua. Queja nopa inintlamachtil Himeneo huan Fileto. 18Inijuanti chicoquistoque tlen nopa tlajtoli tlen melahuac. Ama tlamacht'iaj para moyolcuitoquejya nochi tlacame tlen mictoque tlen moyolcuise. Yeca sequin tlen tlaneltocayayaj ayoc quimatij tlaque quineltocase. 19Pero ipan ichaj Toteco quitlalijtoc se tlatzinpehualtili tlen temachtli huan nepa ijcuilijtoc ya ni: "Toteco quinixmati inijuanti tlen nel'ia iaxcahua"; huan nojquiya quiijtohua: "Nochi tlacame tlen motemachijtoque ipan Tohueyiteco Jesucristo ma ayoc quichihuaca tlen ax cuali." 20Ipan se hueyi cali tlen iaxca se tlacatl tlen tlapijpixtoc onca miyac tlamantli tlen inijuanti quitequihu'iaj. Onca sequin tlamantli tlen ax patiyo queja huajcali huan soqui chachapali, huan nojquiya onca sequin tlen patiyo tlen quichijtoque ica oro huan ica plata. Nopa caltecojtli quitequihu'ia huajcali huan tlamantli tlen soquitl ica se tequitl tlen quejhueltzi. Huan quitequihu'ia tlamantli tlen patiyo quema monequi tlen yejyectzi para tlacame quitlepanitase. 21Intla se tlaneltocaquetl moiyocacahuas ica inijuanti tlen tlamacht'iaj tlen ax cuali, yajaya elis queja se tlamantli tlen nel'ia patiyo ipan ichaj Toteco, huan Toteco quitequihuis ipan se cuali tequitl huan tlacame tlen quiitase, quitlepanitase Toteco. 22Huajca xicholojtehua quema se tlamantli mitzyoltilana para xijchihua queja telpocame tlen ni tlaltepactli quinpact'ia quichihuaj. Xijtoquili tlen xitlahuac. Xijneltoca Toteco ica nochi moyolo, huan xiquinicneli tlacame. Xiitzto ica cuali ica nopa tlaneltocani tlen motemach'iaj ipan Toteco ica ininyolo cuali iixpa. 23Xiquintlalcahui tlacame tlen camatij huihui tlajtoli pampa teipa san pehuaj mocamaijixnamiquij. 24Se tlen itlatequipanojca Tohueyiteco ma ax quitemos para mocamaijixnamiquis ica sequinoc. Monequi ma quinchihuili nochi tlacame tlen cuali. Monequi tlamachtis cuali para tlacame ma quimachilica itlamachtil huan monequi ma quipiya iyolo ica nochi tlacame. 25Se itlatequipanojca Tohueyiteco monequi quinmachtis ica yamanic tlajtoli nopa tlacame tlen quicocol'iaj. Huelis Toteco quinpatilis ininyolo para huelis moyolpatlase huan quimatise tlen melahuac. 26Huan queja nopa, cholose tlen campa quintlaquechilijtoc Axcualtlacatl, pampa yajaya quinmasiltijtoc para ma quichihuaca tlen yajaya quinequi.

will be added

X\