2 Samuel 9

1Se tonal David tlajtlani: "¿Ax mocajtoc yoltoc niyon se ichaj ehuani Sa'ul para huelis nijpalehuis ipampa iteicnelil mijcatzi Jonat'an tlen tlahuel niquicneliyaya?" 2Huan quipanti se tlacatl tlen tlatequipanojtoya ipan ichaj Sa'ul tlen itoca eliyaya Siba. Huajca quinotzque para yas iixpa Tlanahuatijquetl David. Huan quema ajsito David quiilhui: --¿Ta tiSiba? Huan quinanquili: --Quena. 3Huajca David quiilhui: --¿Ax mocajtoc yoltoc se acajya tlen ifamilia Sa'ul tlen huelis nijnextilis itlaicnelijcayo Toteco Dios? Huan Siba quinanquili: --Mocajtoc se icone Jonat'an tlen ax hueli nejnemi pampa metzcuachotic ipan nochi ome iicxihua. 4Huan David quitlajtlani Siba canque itztoc. Huan Siba quiilhui para itztoya ipan altepetl Lodebar ipan ichaj Maquir, icone Amiel. 5- 6Huajca David nimantzi tlanahuati ma quihualicaca Mefi Boset icone mijcatzi Jonat'an huan iixhui mijcatzi Sa'ul. Huan quema Mefi Boset ajsico iixpa David, motlancuaquetzqui ica miyac tlatlepanitacayotl. 7Huan David quiilhui: --Amo ximajmahui. Na nel'ia nijnequi nimitzpalehuis huan nimitzchihuilis tlen cuali pampa tlahuel niquicneli motata Jonat'an. Na nimitzcuepilis nochi nopa tlali tlen eliyaya iaxca mohueyi tata Sa'ul huan ta tiitztos nica ipan nochaj huan nochipa titlacuas nohuaya. 8Huan Mefi Boset mohuijtzonqui tlalchi ica tlatlepanitacayotl. Huan teipa quiilhui David: --Na ax nitleno para tlahuel tinechtlasojtlas. Niitztoc queja san se chichi tlen mictoc. 9Huan teipa David quinotzqui Siba itlatequipanojca Sa'ul huan quiilhui: --Nochi tlen eliyaya iaxca moteco Sa'ul huan nochi ichaj ehuani ama nijmactilijtoc Mefi Boset tlen itztoc iixhui. 10Huan ta, moconehua huan motlatequipanojcahua intequitise ipan nochi itlal para oncas tlen monequi para ichaj ehuani, pero Mefi Boset tlacuas mojmostla ipan nomesa nohuaya. Huan Siba quinpixtoya 15 iconehua huan 20 itlatequipanojcahua. 11Huan Siba quiilhui Tlanahuatijquetl David: --Nimotlatequipanojca nijchihuas nochi tlen tinechilhuijtoc ma nijchihua. Huajca Mefi Boset itztoya ipan ichaj Tlanahuatijquetl David huan tlacuajqui ihuaya queja elisqu'ia se icone. 12Huan Mefi Boset quipixtoya se ioquichpil tlen itoca eliyaya Mica'ia. Huan nochi ichaj ehuani Siba quitequipanohuayayaj Mefi Boset. 13Pero Mefi Boset tlen metzcuachotic ipan nochi ome iicxihua mocajqui para itztos nopona ipan altepetl Jerusal'en huan nochipa tlacuayaya ihuaya Tlanahuatijquetl David.

will be added

X\