2 Samuel 21

1Ipan nopa tonali quema David eliyaya tlanahuatijquetl oncac se hueyi mayantli, huan queja nopa elqui eyi xihuitl. Huan David momaijto ica TOTECO huan quitlajtlani: "¿Ajqueya itlajtlacol para hualajtoc nopa mayantli?" Huan TOTECO quiilhui: "Hualajtoc ipampa itlajtlacol Sa'ul huan ichaj ehuani tlen quinpacti temict'iaj, huan yeca quinmictijque nopa gabaonita tlacame." 2Huajca David quinnotzqui nopa gabaonitame tlen noja itztoyaj, huan camatic ininhuaya. (Nopa gabaonitame ax eliyayaj israelitame. Inijuanti eliyayaj tlen noja mocajque tlen nopa amorreos. Huejcajquiya israelitame ininca mocajque ica se amatlajcuiloli para ax quinmictisqu'iaj. Pero Sa'ul, quena, quinmicti sequin pampa quincualancaitayaya pampa ax israelitame. Ax ejque ipan tlali Israel, niyon ipan tlali Jud'a.) 3Huajca David quintlajtlani nopa gabaonitame: --¿Tlaque huelis nimechchihuilis para quentzi nimechcuepilis por nopa tlen fiero inmechchihuili Sa'ul? ¿Tlaque nimechmacas para intechtlapojpolhuise tiisraelitame huan inquitlajtlanisqu'iaj TOTECO ma techtiochihua sampa? 4Huajca nopa gabaonitame quinanquilijque David: --Ax tijnequij tomi, niyon oro, niyon plata, pampa Sa'ul ax techtlahuiquil'ia ya nopa. Niyon ax quinamiqui tipehuase tiquinmictise israelitame ipampa itlajtlacol. Huajca David quinilhui: --Huajca ¿xinechilhuica tlaque inquiitaj cuali ma nijchihua huan ya nopa nijchihuas? 5Huan inijuanti quinanquilijque: --Nopa mijcatzi Tlanahuatijquetl Sa'ul eliyaya nopa tlacatl tlen quinequiyaya techtlamimictis para niyon se tlen tojuanti ax mocajtosqu'ia tiyoltoque ipan nochi tlali Israel. 6Huajca xitechmaca chicome iixhuihua ya. Huan tiquincuapilose tlamiyacapa iixpa TOTECO ipan Gabaa tlen eliyaya ialtepe Sa'ul, yajaya tlen TOTECO achtohui quitlapejpeni para elis tlanahuatijquetl. Huajca David quinilhui: --Cualtitoc, nimechmacas. 7Pero Tlanahuatijquetl David ax quinmacac Mefi Boset, icone nopa mijcatzi Jonat'an huan iixhui nopa mijcatzi Sa'ul, pampa ica mocajtoya Jonat'an iixpa TOTECO para quinmocuitlahuis iconehua. 8Huajca David quinitzqui ome tlacame tlen eliyaya iixhuihua Sa'ul, se itoca Armoni huan seyoc tlen nojquiya itoca Mefi Boset. Pero inijuanti quipixque ininnana Rizpa tlen eliyaya iichpoca Aja, se iompaca sihua Sa'ul. Huan David nojquiya quinitzqui seyoc macuilti iixhuihua Sa'ul tlen eliyayaj itelpocahua iichpoca Sa'ul tlen itoca Mical, huan inintata elqui Adriel, tlen eliyaya icone Barzilai nopa meholatita tlacatl. 9Huan David nochi quinmactili nopa gabaonitame, huan inijuanti quincuapilojque ipan se tepetl iixpa TOTECO. Huan nochi chicome mijque ica sampa quema tlacame sanoc pejtoyaj quipixcase cebada. 10Huan Rizpa, iichpoca Aja, quicuito se yoyomitl tlen fiero huan quipatlajqui ipan se hueyi tetl nechca campa quincuapilojtoyaj itelpocahua huan nopona mocajqui. Huan ax quincahuili totome ma monechcahuica tonaya campa inintlacayohua, niyon tlapiyalime ma monechcahuica ica tlayohua. Huan queja nopa quichijqui tlen quema pejqui pixcaj huan hasta quema pejqui tlaahuetzi huan nochi quimachilijque para nopa tlali ayoc quihuicayaya tlajtlacoli iixpa TOTECO. 11Huan quiyolmelajque David para Rizpa, tlen eltoya se iompaca sihua Sa'ul, quinmocuitlahuiyaya inintlacayo itelpocahua, 12- 14huajca David tlanahuati ma quintlalpachoca ipan altepetl Zela ipan tlali Benjam'in campa quitlalpachojque Cis, itata Sa'ul. Huan nojquiya David tlanahuati ma quicuitij iniomiyohua Sa'ul huan Jonat'an. Nopa tlacame ipan altepetl Jabes Galaad quiichtejque iniomiyohua Sa'ul huan Jonat'an ipan tianquis ipan altepetl Bet S'an campa nopa filisteos quincuapilojtoyaj quema quinmictijque ipan tlatehuijcayotl nepa Gilboa. Huan David tlanahuati para ma quihuicaca iniomiyohua Sa'ul huan Jonat'an huan quitlalpachose ininhuaya iniixhuihua. Huan nochi mochijqui queja Tlanahuatijquetl David tlanahuatijtoya. Huan sampa pejqui quinnanquil'ia TOTECO quema nopa israelitame quitlajtlaniyayaj se tlenijqui huan tlanqui nopa mayantli. 15Huan se tonal quema nopa filisteos sampa quisque para quintehuise israelitame, yajqui David ininhuaya nochi isoldados. Huan quema quintehuiyayaj, David nel'ia tlaxicojqui. 16Huan ajsico se filisteo tlacatl huejcapantic tlen itoca eliyaya Isbi Benob. Eliyaya se iniixhui nopa tlacame tlen tlahuel huejcapantique. Huan quihualicayaya icuatlami tlen huehueyac tlen quipiyayaya 30 kilos ietica huan imachete yancuic tlen oncac tlatentili. Huan monechcahui para quimictis David. 17Huan Abisai, itelpoca Sarvia, quipalehuico David huan quimicti nopa filisteo. Huan teipa nochi isoldados David quiilhuijque ma ayoc quisasqu'ia ininhuaya ipan se tlatehuijcayotl. Quiijtojque intla ya miquis, elis queja sehuis nopa tlahuili ipan tlali Israel. Huajca David ayoc yajqui ipan tlatehuijcayotl. 18Huan teipa quema panoc tonali, sampa oncac seyoc tlatehuijcayotl ica nopa filisteos ipan tlali Gob. Huan Sibecai, se husatita tlacatl, quimicti Saf tlen nojquiya huejcapantic pampa elqui se iniixhui inijuanti tlen tlahuel huejcapantique. 19Huan nojquiya seyoc huelta oncac seyoc tlatehuijcayotl ipan Gob ica nopa filisteos huan Elhan'an, icone Jaare Oregim, tlen altepetl Bel'en quimicti seyoc Goliat tlen altepetl Gat tlen nojquiya huejcapantic huan quihuicayaya icuatlami tlen huehueyac tlen tomahuac. 20Huan oncac seyoc tlatehuijcayotl ipan altepetl Gat huan itztoya nopona se tlacatl tlen nel'ia huejcapantic tlen quipiyayaya 12 imacpilhua huan 12 ixocpilhua, chicuase ipan sese ima, huan chicuase ipan sese iicxi. Huan ya nojquiya eliyaya icone se tlacatl tlen tlahuel hueyi. 21Huan quinhuetzquili israelitame, huan huajca se tlacatl itoca Jonat'an quimicti. Yaja eliyaya icone Simea, iicni David. 22Huan nochi ni nahui huejhueyi tlacame itztoyaj iniixhuihua nopa huejcapantique tlacame ipan altepetl Gat. Huan nochi mijque ininmaco David huan isoldados.

will be added

X\