2 Samuel 15

1Huan quema ya panotoya tonali, Absal'on mocohui se tepos carro queja se tlanahuatijquetl, huan mocohui cahuayojme para quitilanase huan 50 tlacame para motlalose iixpa para teyolmelahuase para huala. 2Huan Absal'on pejqui mehua ijnaltzi mojmostla huan pejqui moquetza campa cuapuerta ipan itepa nopa altepetl. Huan quema hualayaya se acajya para quiitasqu'ia tlanahuatijquetl David pampa quipiyayaya se cualantli, Absal'on quinotzayaya ica yejyectzi huan quiilhuiyaya: ¿Tlen tlaque altepetl tihuala? Huan yajaya tlen ajsiyaya quiilhuiyaya para eli se israelita. 3Huan teipa Absal'on quiilhuiyaya: "Nel'ia cuali tlen tiquijtohua huan, quena, quinamiqui para se mitztlajtolsencahuas. Pero Tlanahuatijquetl David ax quitlalijtoc niyon se aqui para mitzpalehuis ipan ni tlamantli." 4Tlahuel nechpactisqu'ia intla nechtequitlalisqu'iaj na para nimechtlajtolsencahuas. Queja nopa nochi tlen quipiyasqu'iaj se cualantli hualasqu'iaj nechitaquij huan na niquintlajtolsencahuasqu'ia xitlahuac. 5Huan intla se acajya hualayaya huan mohuijtzomayaya iixpa Absal'on, ya ax quicahuiliyaya. Nimantzi quimaitzquiyaya huan quitzoponiyaya. 6Huan queja nopa quichihuayaya ica nochi israelitame tlen hualayayaj campa nopa tlanahuatijquetl para ma quinsencahuili se tlenijqui. Huajca yeca Absal'on quichijqui para nochi israelitame tlen hualayayaj ipan tlali Israel ma quiicnelica. 7Huan quema quiaxiti nahui xihuitl para ajsitoya ipan Jerusal'en, Absal'on quiilhui David: --Nimitztlajtlan'ia xinechcahua niyas altepetl Hebr'on nijmacati tlacajcahualistli Toteco, pampa queja nopa nimocajtoc ica TOTECO. 8Pampa quema niitztoya ipan altepetl Gesur niquilhui TOTECO intla nechcahuilisqu'ia nimocuepas nica ipan altepetl Jerusal'en, huajca nijtequipanos huan nijmacas tlacajcahualistli. 9Huan Tlanahuatijquetl David quiilhui: --Cualtitoc, xiya huan xijchihua queja tiquijtojtoc. Huan Absal'on yajqui altepetl Hebr'on. 10Huan quema Absal'on onajsitoya Hebr'on quintitlanqui tlacame ipan nochi altepetini campa itztoyaj israelitame huan quinilhuijque para ma quitlacaquilise se tlapitzali. Huan quema quicaquise molinis tlapitzali, quimatise para Absal'on quitequitlalijtoque ipan altepetl Hebr'on para elis tlanahuatijquetl ipan tlali Israel huan monequi teyolmelahuase. 11Huan nojquiya Absal'on quinnotztoya 200 tlacame ipan Jerusal'en ma yaca tlacuatij ihuaya. Huan inijuanti ax tleno quimatiyayaj tlaque teipa quichihuasqu'ia Absal'on. 12Huan quema Absal'on quitlatiyaya tlacajcahualistli, nojquiya tlatitlanqui ma quinotzatij Ahitofel tlen ialtepe Gilo. Yaja eliyaya se tlen quiconsejomacayaya David. Huan Ahitofel ajsico huan moiyocatlali ica Absal'on. Huan nopa tlacame tlen quitoquiliyayaj Absal'on momiyaquiliyayaj pampa tlahuel miyac israelitame calaquiyayaj ihuaya hasta quipixque miyac chicahualistli. 13Huan ajsico se tlacatl tlen quiilhuico David para nochi israelitame ipan tlali Israel quitoquil'iaj Absal'on queja inintlanahuatijca. 14Huajca David quinilhui nochi itlapalehuijcahua tlen itztoyaj ihuaya: --Ma tiisihuica ticholose para timomanahuise, pampa intla axtle, niyon se tlen tojuanti huelis cholos. Xiisihuica para ax techajsis, pampa intla techajsis nica, techtlamimictise tlen tiitztoque ipan ni altepetl. 15Huan nochi itlapalehuijcahua quinanquilijque: --Tiitztoque mohuaya huan tijchihuase tlen ta tiquita para cuali. 16Huan nimantzi quisqui Tlanahuatijquetl David ica nochi ichaj ehuani. San quincajqui majtlactli isihuajhua para quimocuitlahuise nopa caltlanahuatili. 17Huan quema quistiyohuiyayaj Tlanahuatijquetl David ica nochi itlacajhua, moquetzque iteno nopa altepetl. 18Huan panoque nochi nopa soldados para quintlayacanaltise. Huan itztoyaj nojquiya nochi nopa soldados tlen quimocuitlahuiyayaj nopa tlanahuatijquetl huan tlen motlalohuayayaj para quihuicase tlajtoli huan tematiltise. Huan 600 tlacame tlen quistoyaj ipan altepetl Gat huan icxinejnentoyaj hasta Jerusal'en nojquiya panoque. 19Huan David quinotzqui Itai tlen quinyacanayaya nopa altepetl Gat ehuani huan quiilhui: --¿Para tlen tihualajtoc nica? M'as cuali para timocuepas ipan Jerusal'en, huan ximocahua ihuaya nopa yancuic tlanahuatijquetl. Ta tiehua seyoc tlali huan huejca moaltepe. 20San tionajsico huan ax quinamiqui para nimitzfuerzajhuis ticalaquis ica tojuanti. Niyon ax nijmati canque tiajsitij. M'as cuali para ximocuepa huan nojquiya nochi inijuanti tlen hualajtoque mohuaya. Huan ma TOTECO mitztiochihua huan ma itzto mohuaya nochipa. 21Huan Itai quinanquili: --Na nijtestigojquetza Toteco Dios, para campa hueli ta tiyas, na niyas mohuaya, yonque nimiquis mohuaya o noja niitztos. 22Huajca Tlanahuatijquetl David quinanquili: --Cualtitoc, xitlayacantiyaca huan inyase tohuaya. Huan Itai huan nochi isoldados, huan ichaj ehuani, huan iconehua yajque ihuaya David. 23Huan oncac se hueyi choquistli ipan nochi nopa tlali quema Tlanahuatijquetl David huan nochi tlen itztoyaj ihuaya quisque. Huan apanoque nopa atlajtli Cedr'on para calaquise ipan nopa huactoc tlali. 24Huan ininhuaya yahuiyayaj nojquiya nopa totajtzitzi Abiatar huan Sadoc huan nochi nopa levitame. Huan inijuanti quihuicayayaj icaxa Toteco Dios huan quitlalijque ojtentli hasta quema nochi panoque. 25Huan Tlanahuatijquetl David quiilhui Sadoc: --Xijhuica icaxa Toteco Dios sampa ipan altepetl Jerusal'en huan intla TOTECO nechcahuilis, nimocuepas huan sampa niquitas icaxa Toteco huan iYoyon Tiopa. 26Huan intla TOTECO nechilhuis para ayoc quipact'ia tlen nijchihua, huajca ma nechchihuili tlen yajaya quinequi. 27Huan nojquiya Tlanahuatijquetl David quiilhui nopa totajtzi Sadoc: --¿Ax ta tise tlachixquetl? Nimitzilhu'ia sampa xiya ipan Jerusal'en huan ximocahua ica tlasehuilistli ica mocone, Ahimaas, huan ica Jonat'an, icone Abiatar. 28Huan na nimitzchiyas nica huan aya nicalaquis ipan nopa huactoc tlali hasta quema innechyolmelahuase tlaque pano ipan nopa altepetl. 29Huajca Sadoc huan Abiatar sampa quihuicaque icaxa Toteco Dios ipan Jerusal'en, huan nopona mocajque. 30Huan David ixtlejcoc nopa tlaixtlejcolis ipan nopa tepetl Olivos. San chocatiyajqui huan motzontzactiyajqui, niyon ax quihuicayaya itecac, pampa tlahuel mocuesohuayaya. Huan nochi tlen itztoyaj ihuaya nojquiya motzontzajque huan chocatinenque. 31Huan teipa se quiilhui David para Ahitofel nojquiya motlalijtoya ihuaya Absal'on. Huajca David momaijto ica TOTECO huan quiilhui: "Se favor, TOTECO, xijchihua para itlajtol Ahitofel ma nesi queja tlajtoli tlen ax tleno ipati para ax aqui quichihuas tlen quiijtohua." 32Huan quema David ajsito iixco ne tepetl campa tlacame quihueyitlaliyayaj Toteco Dios, quinamijqui se huehuentzi itoca Husai tlen nopa familia Arquita. Quihualicayaya iyoyo tzayantoc huan tlali ipan itzonteco pampa tlahuel mocuesohuayaya ipampa tlen ipantic David. 33Huan David quiilhui: --Achi cuali amo xicholo tohuaya, pampa monequi timitzchixtiyase. 34M'as cuali sampa xiya Jerusal'en huan xiquilhui notelpoca Absal'on para tijtequipanos. Xiquilhui para miyac xihuitl tinechmacayaya consejos huan tinechtequipanohuayaya huan ama tijpalehuis ya. Huan queja nopa quema Ahitofel quiilhuis ma quichihua se tlenijqui, ta tiquilhuis ma quichihua seyoc tlamantli para ax quitoquilis itlajtol Ahitofel. 35Huan nojquiya itztoque ipan Jerusal'en nopa totajtzitzi Abiatar huan Sadoc tlen mocahuaj tohuaya. Xiquinilhui nochi tlen tijcaqui tlen Absal'on quisencahua para quichihuas. 36Huan inijuanti quipiyaj ome ininconehua tlen itztoque nopona ininhuaya: Jonat'an, icone Abiatar huan Ahimaas, icone Sadoc. Huajca hueli nechtitlanilise ininconehua para ma nechmatiltica nochi tlen inquimatij. 37Huajca Husai ihuampo David yajqui ipan altepetl Jerusal'en huan ajsito quema Absal'on oncalaquiyaya ipan nopa altepetl.

will be added

X\