2 Samuel 13

1Huan David quipixqui se itelpoca itoca Absal'on huan yajaya quipiyayaya se isihua icni tlen tlahuel yejyectzi eliyaya tlen itoca Tamar. Huan ica seyoc isihua David quipixqui seyoc itelpoca tlen itoca eliyaya Amn'on. Huan Amn'on nel'ia quiixtocac Tamar yonque eliyaya itepotzicni. 2Huan Amn'on nelpano quiixtocayaya Tamar hasta mococoliscuic. Huan Tamar eliyaya se ichpocatl huan ipan nopa tonali tlahuel momatiyayaj quinmocuitlahu'iaj ichpocame para ax aqui quinajsis. Huajca yeca Amn'on moilhuiyaya para elis ohui para quicajcayahuas. 3Huan Amn'on quipiyayaya se ihuampo tlen itoca eliyaya Jonadab tlen eliyaya nojquiya imachicni pampa yajaya eliyaya icone Simea, tlen eliyaya David iicni. Huan Jonadab tlahuel quimatiyaya quejatza tlacajcayahuas. 4Huan se tonal quitlajtlani Amn'on: --Amn'on, ta tiitelpoca nopa tlanahuatijquetl, ¿para tlen m'as timocuesohua mojmostla? ¿Tlaque tijpiya? ¡Xinechilhui! Huan Amn'on quinanquili: --Na niquixtoca Tamar, iicni Absal'on. 5Huajca Jonadab quiilhui: --Na nimitzilhuis quejatza tijchihuas. Ximotecati ipan motlapech huan ximococoxcanequi. Huan quema yas motata David mitzpaxaloti, xiquilhui quej ni: 'Nimitztlajtlan'ia xijtitlani noicni Tamar ma nechcualtlaliliqui se tlacualistli para nijcuas.' 6Huajca queja nopa quichijqui Amn'on. Huan quema itata yajqui quipaxaloto quiilhui: --Nimitztlajtlan'ia para xijtitlani noicni Tamar para ma nechcualtlaliliqui noixpa se ome pantzi, huan ma nechtlamaca. 7Huajca David quititlanqui Tamar ichaj Amn'on, huan quiilhui: --Xiya ichaj moicni Amn'on huan xijcualtlaliliti itlacualis para ma tlacua. 8Huan Tamar yajqui ichaj Amn'on huan yajaya mococoxcanectoya ipan itlapech. Huan Tamar nimantzi pejqui quixacualohua harina, huan quichijqui pantzi huan quiicxiti. 9Huan quema ya eltoya, quitequili itlacualis huan quihualiquili Amn'on, pero ya ax quinejqui tlacuas. Huan quinnahuati nochi itlatequipanojcahua ma panquisaca, huan nochi quisque. 10Huan Amn'on quiilhui Tamar: --Ama, xinechhualiquili notlacualis nica ipan nocuarto huan xinechtlamaca. Huan Tamar quihuiquili. 11Huan quema Tamar monechcahui campa Amn'on itztoya, Amn'on quinajnahuajqui huan quiilhui: --Xicochiqui nohuaya. 12Huan Tamar quinanquili: --Axtle, noicni, amo xinechfuerzajhui pampa tijmati se tlajtlacoli tlen nel'ia fiero ipan totlal Israel. ¡Amo xinechixpano! 13Ax quema tlamis nopinahualis. ¿Canque niyas para nimotlatis? Huan ica ta, teipa mitzixmatise queja se tlen m'as tifiero ipan Israel. M'as cuali san xijcamahui nopa tlanahuatijquetl para ma techcahuili timonamictise huan temachtli techcahuilis. 14Huan Amn'on ax quinejqui quitlacaquilis. Huan pampa eliyaya m'as tetic, quifuerzajhui huan quiichpocapolo. 15Huan nimantzi Amn'on tlahuel quicualancaitac ica se hueyi cualantli. Quicualancaitac teipa hasta onpano queja quiicneliyaya achtohui, huan quiilhui: --Ximoquetza huan xiya. 16Huan Tamar ax quinejqui quisas huan quiilhui: --Noja m'as hueyi elis motlajtlacol para tinechpanquixt'ia que quema tinechixpanoc. Pero Amn'on ax quitlacaquili, 17huan quinotzqui se itlatequipanojca huan quiilhui: --Xijpanquixti ni sihuatl huan xijtzacua cuali nopa puerta. 18Huan itlatequipanojca quipanquixti Tamar. Huan yajaya moyoyontijtoya cuali ica iyoyo huehueyac huan yejyectzi queja nochi iichpocahua nopa tlanahuatijquetl moquentiyayaj. 19Huajca quitzayanqui iyoyo huan motlalili cuanextli ipan itzonteco huan mocuaitzquitiyajqui huan chocatiyajqui. 20Huan Absal'on, iicni, quiilhui: --¿Mitzixpanotoc Amn'on? ¿Ax que? Ximoyoltlali, noicni. Amo tlahuel ximocueso, pampa yajaya moicni. Huan Tamar mocajqui ichaj iicni Absal'on. 21Huan quema Tlanahuatijquetl David quicajqui tlen quichijtoya Amn'on, tlahuel cualanqui. 22Huan Absal'on tlahuel quicualancaitac Amn'on ipampa nopa tlajtlacoli tlen quichihuili iicni, Tamar, pero ax tleno quiilhuiyaya. 23Teipa quema ya panotoya ome xihuitl, itlatequipanojcahua Absal'on yajtoyaj Baal Hazor ipan tlali Efra'in para quinximase iborregojhua. Huan Absal'on quinnotzqui nochi iicnihua ma yaca para ilhuichihuatij. 24Huan Absal'on nojquiya yajqui quiitato itata, Tlanahuatijquetl David, huan quiilhui: --Notlatequipanojcahua yajtoque quinximatij noborregojhua huan nijnequi para ta xiitzto nohuaya huan nochi motlapalehuijcahua. 25Huan David quinanquili: --Axtle, nocone, ax huelis tiyase tinochime, pampa tlahuel ohui elis para ta. Huan yonque Absal'on nelchicahuac quitlajtlani ma yas, David ax quinejqui pero quitiochijqui miyac. 26Huan Absal'on quiilhui: --Intla ta ax hueli tiyas, nimitztlajtlan'ia xijtitlani noicni Amn'on. Huan David quiilhui Absal'on: --¿Para tlen tijnequi ma yohui moicni Amn'on? 27Pero pampa Absal'on quisenhuiquili quitlajtlan'ia, David quicajqui ma yohui Amn'on huan nochi itelpocahua. 28Huan Absal'on quinilhuijtoya itlatequipanojcahua: "Quema inquiitase para Amn'on ya cuali tlaitoc huan nimechilhuis para xijmictica, huajca amo ximomajmatica. San ximosemacaca huan ximotemacaca xijchihuaca notlajtol". 29Huan itlatequipanojcahua Absal'on quimictijque Amn'on queja quinilhuijtoya. Huan teipa nochi itelpocahua Tlanahuatijquetl David moquetzque huan tlejcoque ipan ininmula huan cholojque. 30Huan quema inijuanti noja hualayayaj ipan ojtli, ajsico campa David se tlacatl tlen quihualiquiliyaya se tlajtoli, huan quiijto: "Absal'on quinmicti nochi motelpocahua huan niyon se ax mocajqui yoltoc." 31Huajca David tlahuel mocueso huan quitzayanqui iyoyo huan motejqui tlalchi huan nochi itlatequipanojcahua nojquiya quichijque. 32Huan teipa tlananquili Jonadab, icone Simea tlen elqui iicni David, huan quiilhui: --Tlanahuatijquetl David, amo ximoilhui para nochi moconehua quinmictijque. ¡Axtle! San Amn'on quimictijque, pampa Absal'on motemacatoya quimictis ipan nopa tonali quema quiixpanoc iicni, Tamar. 33Huajca ama, amo xijneltoca ne tlajtoli para nochi motelpocahua mictoque, pampa san Amn'on mijqui. 34Huan Absal'on cholo. Huan nopa telpocatl tlen tlachixtoya tepanixco quiitac para monechcahuiyayaj miyac tlacame tlen hualayayaj ipan ojtli. 35Huajca Jonadab quiilhui Tlanahuatijquetl David: --Xiquita, ya hualahuij motelpocahua queja nimitzilhuijtoc. 36Ipan nopa tlalochtli ajsicoj itelpocahua David, huan nochi pejque chocaj. Huan David huan nochi itlatequipanojcahua nojquiya chocaque chicahuac. 37Huan Absal'on cholo huan yajqui ipan altepetl Gesur campa itztoya Tlanahuatijquetl Talmai, icone Amiud. 38Huan nopona mocajqui eyi xihuitl. 39Huan David mojmostla mochoquiliyaya pampa quitemohuayaya Absal'on, huan ya moyoltlalijtoya para mijqui Amn'on.

will be added

X\