1 Huan TOTECO quititlanqui itiocamanalojca Nat'an, ma quiitati David. Huan quema Nat'an ajsito iixpa David, quipohuili se tlajtoli huan quiilhui: --Ipan se altepetl itztoyaj ome tlacame; se rico huan se tlen teicneltzi. 2 Huan nopa rico quinpiyayaya miyac huacaxme huan borregojme. 3 Pero nopa teicneltzi ax tleno m'as quipiyayaya, san se pilsihua borregojtzi tlen quicojtoya huan quimocuitlahuijtoya. Huan nopa pilborregojtzi moscaltijtoya ihuaya iteco iconehua. Huan iteco quitlamacayaya ica tlen ya itlacualis huan quiamacayaya tlen itaza. Huan hasta cochiyaya imaco huan nopa tlacatl quiicneliyaya nopa pilsihua borregojtzi queja elisqu'ia se icone. 4 Huan se tonal se tlacatl paxaloto ipan ichaj nopa rico huan yajaya ax quinejqui quimictis se huacax, o se borrego tlen iaxca para quitlamacas nopa paxalojquetl, huajca nopa rico yajqui quicuilito nopa teicneltzi ipilborrego. Huan quimicti huan quicualtlalili nopa paxalojquetl. 5 Huajca David quema quicajqui nopa huicalotl, tlahuel cualanqui ica nopa tlacatl tlen rico huan quiilhui Nat'an: --Nel'ia quinamiqui ma miqui nopa rico. 6 Huan quinamiqui para quicuepilis nopa tlacatl teicneltzi nahui borregojme queja ipatlaca nopa se tlen quicuilijtoya. Pampa quichijqui tlen fiero huan ax tetlasojtlac. 7 Huajca Nat'an quiilhui: --¡Ta tiitztoc nopa tlacatl rico! TOTECO Dios tiisraelitame mitzilhu'ia ya ni: 'Najaya tlen nimitztequitlalijtoc titlanahuatijquetl tlen Israel. Na tlen nimitzmanahuijtoc tlen Sa'ul. 8 Na nimitzmacac icaltlanahuatil moteco Sa'ul, huan isihuajhua. Nimitzmacac tlanahuatili ica nochi israelitame campa hueli ipan tlali Israel huan tlali Jud'a. Huan intla tiquitasqu'ia nochi ya nopa para pilquentzi, nimitzmacatosqu'ia tlahuel miyac m'as. 9 Huajca ¿para tlen tijtlahuelcajtoc notlanahuatil huan tinechixpanotoc ica ni tlamantli tlen tlahuel fiero? Tijmicti Ur'ias, nopa heteo tlacatl, huan tijcuili isihua. Tiquintequihui amonita tlacame para ma quimictica. 10 Huajca ama nochipa oncas tlatehuijcayotl ipan mochaj ehuani pampa tinechtlahuelcajtoc huan tijchijtoc mosihua tlen eliyaya isihua Ur'ias. 11 Na nijchihuas para motelpocahua huan tlacame tlen itztoque mocalijtic motlalanase para mitztehuise. Huan na nimitzcuilis mosihuajhua moixpa huan niquinmactilis sequinoc huan inijuanti cochise ininhuaya tlamiyacapa. 12 Ta tijchijqui nochi ni tlamantli ixtacatzi, pero na nijchihuas tlamiyacapa para nochi israelitame quimatise.' 13 Huajca David quiilhui Nat'an: --Quena, nel'ia nitlajtlacolchijtoc iixpa TOTECO. Huan Nat'an quiilhui: --TOTECO mitztlapojpolhuijtoc motlajtlacol huan ax timiquis por ya ni. 14 Pero pampa tlahuel tiquixpanotoc TOTECO ica ni tlamantli, tiquinmacatoc lugar icualancaitacahua TOTECO para quihuetzquilise huan quimahuispolose itoca. Huajca nopa mocone tlen ontlacatqui miquis. 15 Huan Nat'an mocuepqui ichaj. Huan TOTECO quimacac se hueyi cocolistli nopa conetl tlen isihuacahual Ur'ias quitlacatilti ica David. 16 Huan David pejqui momaijtohua huan quitlajtlani Toteco ma quichicahuas nopa conetl. Huan mosajqui huan mixtlapacho tlalchi seyohual. 17 Huan nopa huehue tlacame tlen m'as quipiyayayaj tequihuejcayotl ipan icaltlanahuatil yajque quiitatoj huan quiilhuijque ma mehua huan ma tlacua ininhuaya, pero David ax quinejqui. 18 Huan quema panotoya chicome tonali, nopa conetl mijqui, huan nopa tlacame majmahuiyayaj quiilhuise David. Moilhuiyayaj: "Quema noja yoltoya nopa conetl huan tijyoltlaliyayaj, ya ax quinejqui techtlacaquilis, huajca ama intla tiquilhuise para ya mijqui, hueli m'as fiero mochihuilis." 19 Huan quema David quiitac para mocamahuiyayaj ixtacatzi nopa tlacame, quimachili para ya mictoya nopa conetl. Huajca quintlajtlani intla ya mictoya nopa conetl, huan quiilhuijque para, quena. 20 Huajca David mejqui campa huilantoya, huan malti, huan mopatlac huan mocualtlali. Teipa yajqui calaquito ipan itiopa TOTECO huan quihueyitlali. Teipa mocuepqui ichaj huan tlacuajqui. 21 Huan itlatequipanojcahua quisentlachilijque huan quiilhuijque: --¿Para tlen queja nopa titlachihua? Quema mocone noja yoltoya, ax titlacuayaya huan tlahuel tichocayaya. Huan quema mijqui, timejqui huan titlacuajqui. 22 Huan David quinnanquili: --Quema noja yoltoya nopa conetl nichocayaya huan nimosahuayaya pampa nimoilhuiyaya huelis Toteco Dios quipiyas hueyi iyolo ica na huan quichicahuas nocone. 23 Pero ama ya mijqui. ¿Para tlen nimosahuas huan nichocas? ¿Huelis na sampa nijyolitis? ¡Axtle! Na niyas teipa campa yajaya itztoc, pero yajaya ayoc mocuepas campa niitztoc na. 24 Huan David quiyoltlali isihua, Betsab'e, huan cochqui ihuaya. Huan quipixqui seyoc icone tlen quitocajtlali Salom'on. Huan TOTECO quiicneli ni conetl. 25 Huan TOTECO quititlanqui Nat'an ma quiitati David. Huan pampa TOTECO quiicneli, Nat'an quiilhui ma quitocajti nopa conetl Jedid'ias. (Jedid'ias quinequi quiijtos Yajaya Tlen TOTECO Quiicnel'ia.) 26 Huan Joab ica isoldados yajque huan quintehuijque nopa amonitame ipan altepetl Rab'a. Huan quitlanque nopa pilaltepetzi campa huala nopa atl tlen quitequihuiyaya hueyi altepetl Rab'a. 27 Huajca Joab quintitlanqui tlacame para ma quiilhuitij David: "Ya nijyahualojtoc altepetl Rab'a huan niquincuilijtoc nopa altepetl tlen quimaca atl altepetl Rab'a. 28 Huajca ama xiquinsentili nochi nopa israelita soldados tlen mocajtoque huan xihualaca, ximoaxcatiquij ni altepetl para ta tielis nopa tlatlanquetl, huan ax quihuicas notoca na queja elisqu'ia na nijtlanqui." 29 Huajca David quichijqui queja Joab quiilhuijtoya. Quinsentili nochi isoldados, huan yajqui altepetl Rab'a huan quitehuijqui. Huan moaxcati nopa altepetl. 30 Huan quicuilijque icorona nopa tlanahuatijquetl huan quitlalijque ipan itzonteco David. Huan nopa corona hueyi ipati eliyaya pampa nochi elqui tlen oro huan quipiyayaya piltetzitzi yejyectzitzi tlen pajpatiyo. Huan nopa corona quipixqui 33 kilos ietica. Huan nojquiya ipan nopa altepetl mocuili David miyac tlamantli tlen patiyo. 31 Huan David quinquixti nopa amonitame tlen mocajtoyaj yoltoque ipan nopa altepetl huan quintlali ma tequitica ica sierras, picos huan hachas. Huan nojquiya quinchijqui ma quichihuaca tabiques ipan hornos. Nojquiya quinchijqui itlatequipanojcahua nopa amonitame ipan sequinoc altepetini. Huan teipa David mocuepqui ipan altepetl Jerusal'en ininhuaya nochi isoldados.
