2 Samuel 11

1Huan teipa quema pejqui yancuic xihuitl, ipan nopa tonal quema nochi tlanahuatiani momatij quisaj para tlatehuitij, David san quititlanqui Joab huan nopa israelita soldados ma tlatehuitij. Huan quiyahualotoj altepetl Rab'a huan pejqui quintehu'iaj nopa amonitame. Pero David mocajqui ipan Jerusal'en. 2Huan se tiotlac David mejqui campa mosiyajcajtoya huan pejqui paxalohua calpani icaltlanahuatil. Huan quiitac se sihuatl tlen maltiyaya ipan seyoc calpani. Huan David quiitac para tlahuel yejyectzi eliyaya. 3Huajca tlajtlani tlaque itoca ne sihuatl, huan quiilhuijque para itoca Betsab'e huan eliyaya icone Eliam huan isihua Ur'ias, se heteo tlacatl. 4Huan David tlatitlanqui para ma quinotzaca nopa sihuatl huan ma quihualiquilica. Huan Betsab'e hualajqui huan David cochqui ihuaya. Huan teipa nopa sihuatl mopajpajqui queja quiijtohuayaya itlanahuatilhua Mois'es para monequi quichihuas se tlen ya nopa quichijtoc huan mocuepqui ichaj. 5Huan teipa momacac cuenta para quiconemacatoya David huan quititlanili se amatlajcuiloli para ma quimati David. 6Huan David quitlajcuilhui Joab para ma quititlanili Ur'ias, nopa heteo tlacatl tlen eliyaya ihuehue Betsab'e, pampa Ur'ias eliyaya se isoldado David. Huan Joab quititlanqui Ur'ias ma yas ichaj David. 7Huan quema Ur'ias ajsico ichaj David, David quitlajtlani quejatza itztoc Joab huan isoldados, huan tlaque oncatoc ipan ne tlatehuijcayotl. 8Huan teipa David quiilhui: --Xiya mochaj, huan ximalti huan ximosiyajcahua. Huan quema quistoya, David quititlanili se tlacualistli tlen cuali queja se regalo. 9Pero Ur'ias ax yajqui ichaj. Yaja san cochqui nechca puerta ipan icaltlanahuatil David campa cochij itlatequipanojcahua. 10Huan quiilhuijque David: --Ur'ias ax yajqui cochito ichaj. Huajca David quinotzqui Ur'ias huan quiilhui: --¿Para tlen ax ticochito mochaj? Pampa ya huejcajtoc para ax ticochtoc ipan mochaj. 11Huan Ur'ias quinanquili: --Icaxa Toteco, huan noteco Joab, huan nochi israelita soldados tlen tlali Israel huan tlali Jud'a, mocahuaj ipan cuatitlamitl ipan pilxajcaltzitzi. ¿Quejatza huelis niyas nochaj nitlacuati, huan nitlaiti huan nicochis ihuaya nosihua? ¡Axtle! Ax quema nijchihuas ya nopa. 12Huajca quiilhui David: --Cualtitoc. Ximocahua ama nica huan mostla nimitzcahuilis timocuepas ipan tlatehuijcayotl. Huajca Ur'ias mocajqui nopona. 13Huan David quinotzqui ma tlacua huan ma tlai ihuaya, huan David quiihuinti. Huan quema tlayohuixqui, Ur'ias quisqui huan cochito sampa campa itlatequipanojcahua David, huan ax yajqui ichaj. 14Huan hualmostla David quitlajcuilhui Joab huan quititlanili nopa tlajcuiloli ica Ur'ias. 15Huan ipan nopa tlajcuiloli quiilhuiyaya ya ni: "Xijtlalica Ur'ias ipan nopa achtohui pamitl tlen soldados iixmelac campa m'as mahuilili nopa tlatehuijcayotl. Huan teipa ximoquixtica huan xijcajtehuaca iselti para ma quicococa huan ma quimictica." 16Huajca queja nopa quichijqui Joab. Quema quiyahualojque nopa altepetl para quitehuise, Joab quitlali Ur'ias campa quimatiyaya itztoyaj nopa soldados tlen m'as temachme tlen inincualancaitacahua. 17Huan teipa quisque inincualancaitacahua ipan nopa altepetl huan quinmictijque miyac isoldados David, huan nojquiya mijqui Ur'ias, nopa heteo tlacatl. 18Huan Joab quititlanqui se tlacatl ma quiilhuiti David nochi tlen panotoya ipan nopa tlatehuijcayotl. 19Huan Joab quiilhui itlatitlanil: "Huan quema titlamis tijpohuil'ia David nochi tlen panotoc, 20intla yajaya cualanis huan mitzilhuis: '¿Para tlen inmonechcahuijque ipan itepa nopa altepetl? ¿Ax inquimatiyayaj para huelis tlejcose tepanixco huan quimajcahuasqu'iaj tlen hueli tepostli?' 21O intla quiijtos: '¿Ax inquiilnamiquij tlen panoc ipan altepetl Tebes quema se sihuatl quimicti Abimelec, icone Jerobaal, ica se metlatl tlen quimajcahuili tlen huejcapa? Huajca ¿para tlen inmonechcahuijque tlahuel?' Huajca intla queja nopa mitzilhuis David, xiquilhui: 'Nojquiya mijqui motlatequipanojca, Ur'ias, nopa heteo tlacatl.' " 22Huan nopa tlatitlanili quisqui iixpa Joab huan yajqui quiitato David. Huan quema ajsito, nochi quipohuili David queja Joab quiilhuijtoya. 23Quiilhui: --Tocualancaitacahua hualajque para techtehuisqu'iaj cuatitla, pero tiquintoquilijque hasta campa calaquitoj ipan inialtepe. 24Huan nopona ininsoldados tlen moquetztoyaj tepanixco pejque techmaquil'iaj ica inincuatlamin. Huan huajca mijque se quesqui tlen mosoldados, huan nojquiya mijqui Ur'ias nopa heteo tlacatl. 25Huajca David quiilhui nopa tlacatl: --Quej ni xiquilhui Joab: Amo ximocueso ica tlen panotoc. Quemantzi miquij soldados ipan tlatehuijcayotl queja nopa. San ximoyolilhui quejatza huelis tiquintetzopas teipa ica noja m'as soldados hasta tiquintzontlamiltis nochi tocualancaitacahua. Quej nopa xijyolchicahua Joab. 26Huan quema nopa sihuatl tlen eliyaya isihua Ur'ias quicajqui para mictoya ihuehue, mocueso huan tlahuel quichoquili. 27Huan quema tlanqui nopa tonali para quichoquilis, David tlatitlanqui ma quihualiquilica ichaj huan quichijqui isihua. Huan teipa quitlacatilti se oquichpil. Pero TOTECO quiitac para fiero ni tlamantli tlen David quichijqui.

will be added

X\