2 Samuel 1

1Quema ya mictoya Sa'ul, David mocuepqui ipan ialtepe Siclag pampa ya tlantoya quintzontlamilt'ia nopa amalecitame huan nopona mocajqui ome tonali. 2Huan ipan ne seyoc tonali, ajsico se tlacatl tlen quisqui tlen isoldados Sa'ul. Yaja quihualicayaya iyoyo tzayantoc huan motlalilijtoya tlaltejpoctli ipan itzonteco pampa quipiyayaya hueyi cuesoli. Huan quema ajsico campa David mohuijtzonqui ica miyac tlatlepanitacayotl. 3Huajca David quitlajtlani nopa tlacatl: --¿Canque tihuala? Huan nopa tlacatl tlananquili: --Na nicholojtejqui campa toisraelita tlacajhua tlatehu'iaj. 4Huan David quiilhui: --Xinechilhui tlaque panotoc ipan nopa tlatehuijcayotl. Huan nopa tlacatl quinanquili: --Miyac toisraelita soldados mictoque huan miyac cholojtejtoque. Huan nojquiya mijqui Sa'ul huan icone, Jonat'an. 5Huan David quitlajtlani: --Huan ¿quejatza tijmatqui para mijqui Sa'ul huan icone? 6Huajca quinanquili: --Na niitztoya ipan tepetl Gilboa huan nopona niquitac para Sa'ul motlatzquiliyaya ipan icuatlami tlen huehueyac. Huan monechcahuiyayaj icualancaitacahua ipan tlatehuijca carros. Nojquiya hualayayaj miyac tlacame ipan cahuayos. 7Huajca ipan nopa tlalochtli Sa'ul nechitac huan nechnotzqui. Huan huajca nimonechcahui campa itztoya. 8Huan yajaya nechtlajtlani ajqueya na huan niquilhui para nieliyaya se niamalecita tlacatl. 9Huajca techilhui: 'Xihuala huan xinechmicti pampa tlahuel nitlaijiyohu'ia, huan noja niyoltoc.' 10Huajca nimonechcahui huan nijmicti pampa nimomacac cuenta para ayoc huelis itztos pampa tlahuel mococojtoya. Huan nijcuili icorona tlen quipixtoya ipan itzonteco huan nopa costli tlen quipixtoya ipan ima huan nimitzhualiquil'ia ta. 11Huan quema quicajqui nochi tlen quiijto, David huan nopa tlacame tlen itztoyaj ihuaya quitzayanque ininyoyo pampa tlahuel mocuesojque. 12Huan pejque quichoquil'iaj Sa'ul huan itelpoca Jonat'an, huan nopa isoldados TOTECO huan nochi sequinoc israelitame, pampa tlahuel miyac tlacame mictoyaj ipan tlatehuijcayotl nopa tonal. Huan mosajqui David huan itlatequipanojcahua, huan ax tleno quicuajque hasta tlayohua. 13Huan David quiilhui nopa tlacatl: --¿Canque tiehua? Huan quinanquili: --Na nisejcoyoc ejquetl, niamalecita. 14Huan David quiilhui: --Huajca ¿para tlen ax timajmajqui timomatlalanqui huan tijmicti Sa'ul tlen TOTECO quitlapejpenijtoya huan quitequitlalijtoya? 15- 16Huajca David nimantzi quinotzqui se soldado huan quiilhui: --Xijmicti ni tlacatl. Huan David quiilhui nopa tlacatl: --Timiquis pampa ta ica moseli tiquijto para tijmicti Sa'ul, nopa tlacatl tlen TOTECO quitlapejpenijtoya para elis tlanahuatijquetl. Huan isoldado hualajqui huan quimicti ica icuatlami tlen huehueyac. 17Huan David quisencajqui se huicatl huan huicac tlen Sa'ul huan icone, Jonat'an, tlen mictoyaj. 18Huan tlanahuati ma quinmachtica nopa soldados tlen tlali Jud'a ehuani. Huan ni huicatl nojquiya mopant'ia ijcuilijtoc ipan nopa amatlajcuiloli tlen itoca Jaser. Huan quej ni quiijtohua: 19"Noisraelita icnihua, nopa tlacatl tlen m'as yejyectzi tijpixque, mictoc. Yaja tlen achi m'as techmacayaya paquilistli quimictijtoque nepa huejcapa campa tepetini. Quena, yajaya tlen m'as tetic huetztoc. 20Amo xiquinilhuica tocualancaitacahua tlen itztoque ipan altepetl Gat. Niyon amo xiquinpohuilica tlen itztoque ipan tianquis ipan altepetl Ascal'on, para ax ma techhuetzquilica nopa filisteo sihuame. Ax tijnequij ma techpinajtica nopa sihuame tlen ax quineltocaj TOTECO. 21Sa'ul mijqui ipan tepetl Gilboa. Huajca ax quema ma tlaahuetzi nopona. Niyon ax quema ma onca ajhuechtli. Ma ayoc tlaelilti pampa nopona mijqui tlen motemacac. Nopona mijqui Sa'ul queja se tlen hueli tlacatl, queja elisqu'ia ax ya tlen quitlapejpeni Toteco. 22Sa'ul huan Jonat'an nochipa tlatlaniyayaj ipan tlatehuijcayotl. Inijuanti quinmictiyayaj inincualancaitacahua, yonque tlahuel motemacayayaj. Ax quema mocuepque ipan se tlatehuijcayotl san ininma, pampa nochipa tlatlaniyayaj. 23Nochi tojuanti tiquinicneliyayaj huan tlahuel tiquinnequiyayaj. Nel'ia se paquilistli para tiquinixmatise. San sejco nemiyayaj quema itztoyaj huan nojquiya san sejco mocajque ipan miquistli. Achi m'as chicahuac huelque motlalojque que ne hueyi cuajtli tlen hueli patlani. Elque m'as tetique inijuanti que se le'on. 24Inisraelita sihuame, xijchoquilica Sa'ul tlen yejyectzi inmechyoyontiyaya ica yoyomitl tlen moradojtic queja motlalil'iaj sihua tlanahuatiani. Quena, Sa'ul quiyejyecchijqui imoyoyo ica oro, huajca xijchoquilica. 25Yaja tlen motemacac ya mijqui ipan tlatehuijcayotl. Mijqui Jonat'an ipan ne tepetl Gilboa. 26Nimitzchoquil'ia noicni, Jonat'an, pampa tlahuel nimitzicneli. Huan tinechicneli miyac nojquiya hasta motlaicnelil quitlani inintlaicnelil sihuame. 27Mictoque tlen m'as motemacayaya. Ayoc quinemilt'iaj inintepos pampa ya mictoque." Queja nopa elqui nopa huicatl tlen David quisencajqui para quichoquilis Sa'ul huan Jonat'an.

will be added

X\