2 Kings 9

1Ipan nopa tonali tiocamanalojquetl Eliseo quinotzqui se telpoca tiocamanalojquetl huan quiilhui: --Ximocualtlali para tiquisas. Xijcui ni pilxarrojtzi tlen aceite huan xiya altepetl Ramot ipan Galaad. 2Huan quema tiajsiti nepa, xijtemo Jeh'u, icone Josafat, tlen eliyaya icone Nimsi. Huan xiquiyocaquixtis tlen ihuampoyohua huan xijhuica ipan seyoc cuarto. 3Huan nopona xijcui nopa pilxarrojtzi tlen aceite huan xijtzonalti huan xiquilhui para TOTECO quiijtohua: 'Na nimitztzonalt'ia ica aceite para nimitztequimacas tielis titlanahuatijquetl ipan tlali Israel.' Huan teipa nimantzi xijtlapo puerta huan ximoisihuilti xicholojtehua. 4Huajca nopa telpoca tiocamanalojquetl yajqui nepa altepetl Ramot ipan tlali Galaad, 5huan quema ajsito nopona, quinmelahuato mosentilijtoque nochi tlayacanani tlen soldados. Huajca quiijto: --Nijpiya se tlamantli para nimitzilhuis ta titlayacanquetl. Huan Jeh'u quiijto: --¿Ajqueya tlen tojuanti? Huan nopa telpoca tiocamanalojquetl quiijto: --Ta, tinotlayacanca. 6Huajca Jeh'u moquetzqui huan calajqui ipan se cuarto. Huan nopa tiocamanalojquetl quitzonalti ica aceite huan quiilhui: --TOTECO Dios tlen tiisraelitame quiijtohua: 'Na nimitztzonalt'ia ica aceite para nimitztlalis tielis titlanahuatijquetl ipan noisraelita tlacajhua tlen tlali Israel. 7Monequi tiquintlamimictis nochi iteixmatcahua Acab tlen hasta ama eliyaya moteco. Huan queja nopa tiquincuepilis pampa Jezabel quitoyajqui inieso nochi notiocamanalojcahua huan notlatequipanojcahua. 8Nochi iteipa ixhuihua Acab monequi xiquintlamilti. Xiquinmicti nochi tlacame tlen iteixmatcahua huan itlatequipanojcahua yonque quincojqui o san tequitij ihuaya. Nochi tlen itztoque ica ya campa hueli ipan tlali Israel monequi xiquinmictis. 9Nijchihuas ica iteixmatcahua Acab san se queja nijchijqui ica Jeroboam, icone Nabat, huan ica Baasa, icone Ah'ias. 10Huan chichime quicuase itlacayo nopa sihua tlanahuatijquetl Jezabel ipan se milcahuali ipan altepetl Jezreel huan axaca quitlaltocas.' Queja nopa quiyolmelajqui huan teipa nopa telpoca tiocamanalojquetl quitlapo puerta huan cholojtejqui. 11Huan quema Jeh'u mocuepqui ipan tlasentilistli ininhuaya ihuampoyohua, se ihuampo quitlajtlani: --¿Tlaque onca? ¿Para tlen hualajqui mitzitaco nopa huihui telpocatl? Huan Jeh'u quiijto: --Inquiixmatij huan inquimatij quejatza camati. 12Huan ihuampoyohua quiijtojque: --Amo xitechcajcayahua. Xitechpohuili nochi. Huajca Jeh'u quinilhui: --Nechilhui para TOTECO quiijtohua para ma nechtzonaltica ica aceite para ma nieli nitlanahuatijquetl ipan ni tlali Israel. 13Huajca inijuanti nimantzi moquixtilijque inintlaque huan quitenque iicxitla ipan nopa escalones. Teipa quipitzque nopa tlapitzali huan cuatzajtzique: "¡Jeh'u ya mochijtoc tlanahuatijquetl ipan ni tlali Israel!" 14Teipa Jeh'u, icone Josafat, huan iixhui Nimsi, mosejcotili ica sequinoc para yase quitehuitij Tlanahuatijquetl Joram. (Tiquilnamiqui achtohui Tlanahuatijquetl Joram yajqui altepetl Ramot tlen Galaad ininhuaya iisraelita soldados para quitehuitij Tlanahuatijquetl Hazael tlen tlali Siria, 15pero mococo ipan tlatehuilistli huan yeca mocuepqui hasta altepetl Jezreel para mochicahuas.) Huajca Jeh'u quinilhui ihuampoyohua: "Intla melahuac inquinequij ma nieli niimotlanahuatijca, amo xijcahuaca niyon se tlacatl ma quisa tlen ni altepetl para tlayolmelahuati ipan altepetl Jezreel para nimochijtoc nitlanahuatijquetl." 16Huan teipa Jeh'u tlejcoc ipan itlatehuijca carro huan yajqui altepetl Jezreel campa Tlanahuatijquetl Joram itztoya ipan itlapech. Ocoz'ias, tlen itztoya tlanahuatijquetl ipan tlali Jud'a, nojquiya itztoya nopona ihuaya Joram pampa yajqui quipaxaloto. 17Huan quema nopa soldados tlen tlamocuitlahuiyayaj ipan nopa huejcapantic torre ipan altepetl Jezreel quiitaque monechcahuiyaya Jeh'u ica itlacajhua, chicahuac teyolmelajque: --¡Hualahuij miyac tlacame! Huajca Tlanahuatijquetl Joram quiijto: --Xijtitlani se acajya ipan cahuayo ma quinnamiquiti para ma quimati intla hualahuij ica cuali o axtle. 18Huajca yajqui se soldado cahuajtipa quinamiquito Jeh'u, huan quiilhui: --Nopa tlanahuatijquetl nechnahuatijtoc ma nimitztlajtlaniqui intla inhualahuij ica cuali o axtle. Huan Jeh'u quinanquili: --¿Tlaque tijmati ta tlen tlamantli tlen cuali? Xihuala nohuaya noica. Huajca nopa tlen tlamocuitlahuiyaya ipan nopa torre quiilhui Tlanahuatijquetl Joram: --Yajaya tlen tijtitlanqui quinnamiquito, ajsito campa inijuanti, pero ax nesi intla mocuepa. 19Huajca nimantzi nopa tlanahuatijquetl quititlanqui seyoc tlacatl cahuajtipa, huan yajaya ajsito campa itztoyaj huan quiijto: --Nopa tlanahuatijquetl nechtitlantoc ma nimechtlajtlaniqui intla inhualahuij ica cuali o axtle. Huan Jeh'u quinanquili: --¿Tlaque tijmati ta tlen tlamantli tlen cuali? Xihuala nohuaya noica. 20Huan tlen tlamocuitlahuiyaya ipan nopa torre ipan altepetl sampa tlayolmelajqui ica ompa: --Nopa seyoc tlen tijtitlantoc nojquiya ajsito campa itztoque nopa tlacame, pero ax nesi intla mocuepa. Huan na niquita huelis nopa Jeh'u, iixhui Nimsi, tlen quihualica nopa tlatehuijca carro, pampa quinejnemilt'ia queja se tlen loco, san queja Jeh'u ipa nemi. 21Huajca Tlanahuatijquetl Joram tlanahuati: --¡Nimantzi xijcualtlalica nocarro huan nocahuayojhua! Huajca quicualtlalijque itlatehuijca carro, huan Joram, tlanahuatijquetl tlen tlali Israel, huan Ocoz'ias, tlanahuatijquetl tlen tlali Jud'a, quisque ipan sese inintlatehuijca carros para quinamiquitij Jeh'u. Huan quinamiquitoj campa nopa mili tlen achtohuiya elqui itlal Nabot tlen ejqui altepetl Jezreel. 22Huan quema quiitac Joram nopa Jeh'u, quiilhui: --¿Jeh'u, tihuala ica cuali o axtle? Huan Jeh'u quinanquili: --¿Tlaque tlen cuali huelis onca quema monana, Jezabel, quisenhuiquil'ia quinhueyitlal'ia tlaixcopincayome tlen ax ya Dios huan quisenhuiquil'ia tetlajchihu'ia campa hueli ipan totlal? 23Huajca Tlanahuatijquetl Joram nimantzi quimacac se huelta ica icahuayojhua huan cholo. Huan quiilhuijtejqui Tlanahuatijquetl Ocoz'ias: --¡Techmictise, Ocoz'ias! 24Huan Jeh'u nimantzi quicuic icuahuitol huan quimotlac Joram. Huan nopa cuatlamintli calajqui ipan icuitlapa huan sentlapalo ipan iyolo. Huan Tlanahuatijquetl Joram huetzqui mictoc ipan itlatehuijca carro. 25Huan Jeh'u quinahuati itlatequipanojca, Bidcar: --Xijquixti itlacayo Joram ipan icarro huan xijmajcahua ipan imilcahual Nabot tlen ejqui nica ipan Jezreel. ¿Tiquilnamiqui quema ta huan na san sejco tijnemiltiyayaj tocarros iica Tlanahuatijquetl Acab, yajaya tlen eliyaya itata ni Joram, huan TOTECO nechyolmelajqui 26para temachtli quicuepilis Acab nica ipan itlal Nabot pampa quinmicti Nabot huan iconehua? Huajca xijcui itlacayo Tlanahuatijquetl Joram huan xijmajcahua ipan imilcahual Nabot san queja quiijto TOTECO. 27Huan quema Ocoz'ias, nopa tlanahuatijquetl tlen tlali Jud'a, quiitac tlen panoc, cholojtejqui ipan ojtli tlen yohui para altepetl Bethag'an. Huan Jeh'u motlalo quitepotztocac huan cuatzajtzitiyajqui: --Xijmotlaca ya nojquiya. Huan se itlatequipanojca quimotlac Ocoz'ias ipan itlatehuijca carro ipan nopa ojtli tlen tlejco para altepetl Gur nechca altepetl Ibleam. Huan noja yoltoya hasta ajsito ipan altepetl Meguido huan nopona mijqui. 28Teipa itlatequipanojcahua quihuicaque itlacayo ipan se cuacarro hasta altepetl Jerusal'en huan quitlalpachojque ininhuaya ihuejcapan tatahua ipan nopa barrio tlen itoca Ialtepe David. 29Huan Tlanahuatijquetl Ocoz'ias quipehualtijtoya tlanahuat'ia ipan tlali Jud'a quema Tlanahuatijquetl Joram, icone Acab, yohuiyaya para 11 xihuitl tlanahuat'ia ipan tlali Israel. 30Huan quema nopa sihua tlanahuatijquetl Jezabel tlen elqui inana Jotam quimatqui tlen panoc huan quimatiyaya hualayaya Jeh'u para quimictis nojquiya, mopajqui nochi yahualtic ipan iixtiyol, huan moyecchihuili itzoncal huan mosehui nechca ventana huan tlachixqui. 31Huan quema Jeh'u ajsito campa puerta ipan itepa nopa altepetl, nopa sihuatl quiilhui: --¿Quejatza tiitztoc ama, titemictijquetl? Ta tiitztoc san se ica Zimri tlen no quimicti iteco. 32Huan nopa Jeh'u tlachixqui ica huejcapa huan quiitac nopa fiero sihuatl mosehuijtoya campa ventana huan quintlajtlani tlen itztoyaj inechca: --¿Ajqueya tlen imojuanti initztoque nohuaya para ma nielis niimotlanahuatijca? Huan ome o eyi tlacame tlen mocaparojtoyaj para quitequipanose nopa sihua tlanahuatijquetl itztoyaj inechca ipan nopa caltlanahuatili, huan tlachixque para tlatzintla para quiitase Jeh'u. 33Huan Jeh'u quinnahuati: --Xijhualmajcahuaca nopa sihuatl nica tlatzintla. Huan inijuanti quimajcajque para tlatzintla huan se achi ieso tzicuinqui ipan tepamitl huan ipan nopa cahuayojme. Huan Jeh'u pejqui ipan moquejquetza itlacayo nopa sihua tlanahuatijquetl Jezabel ica icahuayojhua. 34Teipa Jeh'u calajqui ipan icaltlanahuatil nopa tlanahuatijquetl huan tlacuajqui huan atlic huan teipa quiijto: --Monequi ma yohui se acajya para quitlalpachos nopa sihuatl pampa eliyaya iichpoca se tlanahuatijquetl. 35Pero quema yajque quitlalpachotij, san quipantijque itzoncacahuayo, iicxihua huan ima. 36Huajca mocuepque huan quiyolmelahuaco Jeh'u huan Jeh'u quiijto: --Toteco Dios ya quiijtojtoya ica itlatequipanojca El'ias tlen ehua altepetl Tisbe, para chichime quicuasqu'iaj itlacayo Jezabel tlalchi ipan altepetl Jezreel. 37Huan itlacayo mocahuas pasoltic queja cuitlatl campa hueli ipan ni altepetl hasta axaca huelis quiijtos: 'Ya ni quentzi itlacayo Jezabel.'

will be added

X\