2 Kings 25

1Huajca ipan 10 itequi nopa metztli majtlactli ipan toisraelita calendario, quema Tlanahuatijquetl Sedequ'ias yohuiyaya para chicnahui xihuitl ipan itequi, Tlanahuatijquetl Nabucodonosor tlen Babilonia hualajqui ica nochi isoldados para quitehuis altepetl Jerusal'en. Huan quiyahualojque nopa altepetl huan pejque quitemaj tlali iixmelac nopa tepamitl para quisencahuase se tlaixtlejcolis para huelis panose itzonpac nopa huejcapantic tepamitl tlen quiyahualojtoya nopa altepetl. 2Huan nopona mocajque isoldados quiyahualojtoyaj itepa nopa altepetl hasta quema Tlanahuatijquetl Sedequ'ias yohuiyaya para 11 xihuitl tlanahuat'ia huan ax quincahuayayaj tlen tzactoyaj nopona ma quicalaquica tlacualistli. 3Huan ipan 9 itequi nopa nahui metztli ipan toisraelita calendario, nochi tlacame ya apismiquiyayaj ipan nopa altepetl pampa ya tlantoya nochi tlacualistli. 4Huajca nopa Jerusal'en ehuani quicoyonijque nopa tepamitl huan yonque nopa soldados quiyahualojtoyaj nopa altepetl, nopa tlanahuatijquetl tlen Jerusal'en huan nochi isoldados cholojque tlen nopa altepetl ica tlayohua para ax apismiquise. Huan quisque ipan nopa puerta tlen eltoya tlatlajco nopa ome tepamitl iica ixochimil nopa tlanahuatijquetl, huan cholojtejque. Huan quipanoque nopa mila huan yajque ipan ojtli para nopa atemitl Jord'an. 5Pero nopa soldados tlen Babilonia quintoquilijque huan quiajsito Tlanahuatijquetl Sedequ'ias ipan nopa tlamayamitl tlen Jeric'o. Huan nochi isoldados ya quitlahuelcajtoyaj huan mosemantoyaj campa hueli. 6Huan nopa Babilonia soldados quiitzquijque Sedequ'ias huan quihuicaque campa itztoya Tlanahuatijquetl Nabucodonosor tlen Babilonia ipan altepetl Ribla. Nopona Nabucodonosor quinpohuili tlaque tlatzacuiltili quiselisqu'ia Sedequ'ias. 7Huan nopa Tlanahuatijquetl Nabucodonosor tlanahuati ma quinmictica nochi iconehua Sedequ'ias iixtla para Sedequ'ias ma quiitas. Huan teipa quiijto ma quiquixtilica iixtiyolhua Sedequ'ias huan ma quiilpica ica tepos cadena para ma nejnemis hasta tlali Babilonia. 8Ipan 7 itequi nopa macuili metztli ipan toisraelita calendario, quema Tlanahuatijquetl Nabucodonosor yohuiyaya para 19 xihuitl tlanahuat'ia, ajsico Nabuzarad'an ipan altepetl Jerusal'en. Yajaya eliyaya itemach tlen m'as hueyi nopa tlanahuatijquetl tlen Babilonia huan itlayacanca soldado. 9Huan yajaya quitlati ihueyi tiopa TOTECO huan icaltlanahuatil nopa tlanahuatijquetl huan nochi caltini tlen oncayaya nopona. Nochi tlen cuali quitlati. 10Huan nopa hueyi tlayacanquetl Nabuzarad'an quinyacanqui nochi soldados tlen Babilonia para quisemanque nopa tepamitl tlen ica moyahualojtoya altepetl Jerusal'en. 11Teipa Nabuzarad'an itemach nopa tlanahuatijquetl quinhuicac ilpitoque nochi tlacame tlen noja mocajtoyaj ipan altepetl, ihuaya nochi sequinoc tlacame huan soldados tlen ya motemacatoyaj para quitequipanose nopa tlanahuatijquetl tlen Babilonia. 12Pero nopa tlatequipanojquetl, Nabuzarad'an, quincahuili sequin tlen tlahuel teicneltzitzi ma mocahuaca ipan tlali Jud'a para ma tequitica ipan nopa mili huan xocomeca mili ipan nopa tlali. 13Huan nopa Babilonia ehuani quinpostejque nopa huejhueyi tlaquetzali tlen bronce tlen eltoya ipan ichaj TOTECO, ihuaya nopa carretillas ica yantas tlen bronce. Nojquiya quipostejque nopa hueyi paila tlen itoca "hueyi atl" tlen quichijtoyaj ica bronce. Huan nochi bronce quihuicaque para tlali Babilonia. 14Huan nojquiya quihuicaque nopa tepostli tlen ipan quitemaj cuanextli, huan nopa palas, huan nopa hueyi tepos cucharas tlen ica quisehuiyayaj tlahuili, huan trastes huan nochi sequinoc tlamantli tlen bronce tlen quitequihuiyayaj quema quimacayayaj tlacajcahualistli TOTECO. 15Huan nojquiya nopa tlayacanquetl tlen soldados quihuicac nochi tepostli para tlicoli huan copali tlen quichijtoyaj ica oro o ica plata. 16Nopa ome tlaquetzali, huan hueyi paila tlen itoca nopa Hueyi Atl, huan nopa carretillas ica llantas para quihualicase atl, ax huelque quintlamachihuase inietica pampa tlahuel pano etic. Nochi ni tlamantli Tlanahuatijquetl Salom'on quisencajtoya para ichaj TOTECO. 17Ihuejcapanca sesen nopa tlaquetzali eliyaya pano chicueyi metros. Huan quipiyayaya iyejyejca tlen nojquiya elqui senquistoc bronce. Huan iyejyejca tlen quitepachoyaya huejcapa yahualtic nopa tlaquetzali panoyaya ome metros ihuejcapanca. Huan ipan iyejyejca quipixqui granadas tlen quichijchijtoya tlen bronce huan nojquiya queja nopa elqui ipan nopa seyoc tlaquetzali. 18Huan nopa tlayacanquetl tlen isoldados Nabucodonosor nojquiya quihuicac nopa hueyi totajtzi Sera'ias, huan nopa teipa totajtzi tlen itoca Sofon'ias, huan nopa eyi tlacame tlen m'as huejhueyi tlen quimocuitlahuijque ipuerta nopa tiopamitl. 19Huan tlen nopa tlacame tlen noja motlatiyayaj ipan altepetl, quinpanti se tlayacanquetl tlen soldados, huan macuilti tlacame tlen quiconsejomacatoyaj nopa tlanahuatijquetl. Nojquiya quipanti nopa tlayacanca tlajcuilojquetl tlen soldados tlen quinijcuilo nochi tlacame quema mochijque soldados ipan nopa tlali huan ininhuaya quinpanti seyoc 60 tlacame. 20Nabuzarad'an, nopa tlayacanquetl tlen soldados, quinhuicac nochi ipan altepetl Ribla ipan tlali Hamat campa itztoya Tlanahuatijquetl Nabucodonosor tlen tlali Babilonia. 21Huan yajaya quintlamicoco hasta quinmicti nopona ipan Ribla tlen tlali Hamat. Queja nopa elqui quema quinquixtijque Jud'a ehuani tlen inintlal huan quinhuicaque ilpitoque para Babilonia. 22Huan Nabucodonosor nopa tlanahuatijquetl tlen Babilonia quitlali Gedal'ias tlen eliyaya icone Ahicam huan iixhui Saf'an para ma eli iningobernador nopa quentzi tlacame tlen quincajqui ipan tlali Jud'a. 23Huan quema nopa tlayacanani huan ininsoldados tlen mosemantoyaj huan motlatijtoyaj campa hueli ipan tlali Jud'a quicajque para Gedal'ias itztoya gobernador, yajque ipan altepetl Mizpa para ihuaya camatise. Nojquiya itztoyaj ininhuaya Ismael, icone Netan'ias; Johan'an, icone Carea; Sera'ias, icone Tanhumet tlen ejqui Netofa; huan Jaazan'ias, icone se tlacatl tlen ejqui ipan Maaca. Huan ininhuaya itztoyaj miyac ininsoldados. 24Huajca nopa Gedal'ias tlatestigojquetzqui huan quinilhui intla motemacasqu'iaj ica nopa Babilonia ehuani huan quichihuasqu'iaj nochi tlen quinilhuisqu'iaj, huajca nochi elisqu'ia cuali huan quincahuilisqu'iaj ma mocahuaca ipan inintlal. 25Pero ipan metztli chicome ipan toisraelita calendario, yajqui altepetl Mizpa nopa tlacatl tlen itoca Ismael, tlen icone Netan'ias huan iixhui Elisama, huan tlen eliyaya se ininteixmatca nopa tlanahuatiani tlen achtohuiya itztoyaj. Huan Ismael quinhuicac ihuaya majtlactli ihuampoyohua huan quimictijque gobernador Gedal'ias huan nochi tlacame tlen itztoyaj ihuaya yonque tlali Jud'a ehuani o tlali Babilonia ehuani. 26Huajca cholojtejque nochi nopa tlali Jud'a ehuani tlen noja mocajque, yonque tlen m'as teicneltzitzi o tlen m'as huejhueyi. Huan no cholojtejque nopa tlayacanani tlen soldados tlen mocajque. Huan nochi yajque ipan tlali Egipto pampa tlahuel quinimacasiyayaj nopa Babilonia ehuani. 27Huan quema Tlanahuatijquetl Joaqu'in yohuiyaya para 37 xihuitl para quihuicatoyaj hasta tlali Babilonia, pejqui tequiti ipan Babilonia se yancuic tlanahuatijquetl itoca Evil Merodac. Huan yajaya quitlasojtlac Tlanahuatijquetl Joaqu'in huan quiquixti ipan tlatzactli huan quicajqui malacantoc ipan 27 itequi nopa metztli majtlactli huan ome ipan toisraelita calendario. 28Huan quicamahui ica yejyectzi, huan quicahuili ma mosehuis campa quipiyayaya m'as tlatlepanitacayotl que ne sequinoc tlanahuatiani tlen quintlantoyaj huan quinhuicatoyaj tlali Babilonia. 29Huan quimacac iyoyo tlen yancuic queja ipatlaca tlen quitequihuiyaya ipan tlatzactli. Huan quicahuili ma tlacua ihuaya mojmostla para nochi iyolis. 30Nojquiya nopa tlanahuatijquetl quimacayaya tlacualistli huan tlen monequi para mopanoltis hasta mijqui.

will be added

X\