2 Kings 24

1Ipan nopa tonali quema tlanahuatiyaya Joacim ipan tlali Jud'a, Tlanahuatijquetl Nabucodonosor tlen tlali Babilonia hualajqui ica isoldados huan calajque ipan tlali Jud'a. Huan Joacim motemacac ica ya. Huajca elqui itlatequipanojca huan quichijqui nochi tlen quinahuati para eyi xihuitl. Pero teipa Tlanahuatijquetl Joacim moyolajcomanqui ica Nabucodonosor para tlali Jud'a ma ayoc elis imaco. 2Pero TOTECO quintitlanqui ipan tlali Jud'a miyac soldados tlen caldeos, sirios, moabitame huan amonitame para tlaxtequise huan para quixolehuase tlali Jud'a queja tlayolmelajqui ica itiocamanalojcahua para panos. 3Melahuac nochi ya ni ipantic tlali Jud'a pampa TOTECO tlanahuatijtoya para queja ni ma pano, pampa quinequiyaya quitlahuelcahuas tlali Jud'a ipampa itlajtlacolhua Tlanahuatijquetl Manas'es. 4Pampa Manas'es quinmicti miyac tlacame tlen ax tleno quichijtoyaj huan elqui queja quitemiti altepetl Jerusal'en ica estli iixtla TOTECO. Huan yeca TOTECO ayoc quinejqui quintlapojpolhuis Jud'a ehuani. 5Nopa sequinoc tlamantli tlen panoc ipan itequi Tlanahuatijquetl Joacim huan nochi tlen quichijqui eltoc ijcuilijtoc ipan nopa amatlapohuali tlen itoca Tlen Quichijque Nopa Tlanahuatiani Ipan Tlali Jud'a. 6Huan quema mijqui Joacim, pejqui tlanahuat'ia icone tlen itoca eliyaya Joaqu'in. 7Huan teipa ayoc quema mocuepqui nopa tlanahuatijquetl tlen tlali Egipto ipan tlali Jud'a. Pampa ama nopa Tlanahuatijquetl tlen tlali Babilonia moaxcatijtoya nopa tlali tlen nopa atlajtli tlen tlali Egipto hasta nopa atemitl tlen itoca 'Eufrates. 8Huan Tlanahuatijquetl Joaqu'in quipiyayaya 18 xihuitl quema pejqui tlanahuat'ia huan tlanahuati ipan altepetl Jerusal'en eyi metztli. Inana itoca eliyaya Nehusta huan yajaya elqui iichpoca Elnat'an tlen ejqui ipan Jerusal'en. 9Huan Joaqu'in quichijqui tlen ax cuali iixtla TOTECO queja quichijtoya itata. 10Ipan itequi Tlanahuatijquetl Joaqu'in tlen tlali Jud'a, isoldados Tlanahuatijquetl Nabucodonosor tlen tlali Babilonia ajsicoj huan quiyahualojque altepetl Jerusal'en huan pejque quitehu'iaj. 11Quema quitehuiyayaj nopa altepetl, ajsitihuetzico Tlanahuatijquetl Nabucodonosor. 12Huajca Tlanahuatijquetl Joaqu'in ipan Jerusal'en quisqui ipan altepetl ihuaya inana, itlatequipanojcahua, huan nochi itlapalehuijcahua para quinamiquise nopa tlanahuatijquetl tlen tlali Babilonia huan motemacase ica ya. Huan Tlanahuatijquetl Nabucodonosor quinitzqui huan quinilpi. Tlanahuatijquetl Nabucodonosor yohuiyaya para chicueyi xihuitl tlanahuat'ia ipan Babilonia quema quiitzqui Tlanahuatijquetl Joaqu'in. 13Huan queja TOTECO quiijtojtoya para mochihuas, Nabucodonosor quiquixti nochi tlen yejyectzi huan patiyo ipan itiopa TOTECO huan ipan ichaj tlanahuatijquetl huan quihuicac ipan itlal. Huan nopa huejhueyi tlamantli tlen oro tlen huejcajquiya Salom'on, nopa tlanahuatijquetl tlen nochi israelitame, quisencajtoya ipan tiopamitl monejqui quintejtejque para huelque quinhuicaque. 14Huan Tlanahuatijquetl Nabucodonosor quinhuicac 10 mil tlacame ilpitoque tlen altepetl Jerusal'en. Ininhuaya itztoyaj nochi tlayacanani ipan nopa tlali, huan nochi tlayacanca soldados, calchihuani huan teposchihuani. Huajca san mocajque ipan tlali Jud'a nopa tlacame tlen m'as teicneltzitzi, huan tlen ax tleno quimatij quichihuase. 15Huajca nopa Tlanahuatijquetl Nabucodonosor quinhuicac ilpitoque Tlanahuatijquetl Joaqu'in, ihuaya inana, isihuajhua, itlapalehuijcahua huan nopa tlacame tlen m'as tlayacanayayaj ipan nopa tlali Jud'a hasta itlal tlen itoca Babilonia. 16Ica nochi quinhuicac 7 mil soldados tlen m'as yajatij huan mil calchihuani huan teposchihuani tlen m'as quimatque, huan nochi tlacame tlen m'as tetique para yase ipan tlatehuilistli. 17Teipa Tlanahuatijquetl Nabucodonosor tlen tlali Babilonia quitequimacac Matan'ias para elis tlanahuatijquetl ipan tlali Jud'a huan quitocajpatlac huan quitocajti Sedequ'ias. Tlanahuatijquetl Matan'ias o Sedequ'ias elqui it'io Tlanahuatijquetl Joaqu'in tlen Nabucodonosor quihuicac ihuaya ilpitoc ipan Babilonia. 18Sedequ'ias quipiyayaya 21 xihuitl quema pejqui tlanahuat'ia, huan tlanahuati ipan altepetl Jerusal'en 11 xihuitl. Inana itoca eliyaya Hamutal huan yajaya eliyaya iichpoca nopa Jerem'ias tlen ejqui altepetl Libna. 19Pero Tlanahuatijquetl Sedequ'ias quichijqui tlen ax cuali iixtla TOTECO queja quichijtoya ihueyi tata, Joacim. 20Huajca ica ni tlamantli fiero tlen quichijtoya, cualanqui TOTECO ica altepetl Jerusal'en huan tlali Jud'a ehuani huan quiijto quintlahuelcahuas huan ya nopa quichijqui. Teipa Tlanahuatijquetl Sedequ'ias mosisini ica nopa Tlanahuatijquetl Nabucodonosor tlen tlali Babilonia para ayoc quitequipanos.

will be added

X\