2 Kings 13

1Quema Tlanahuatijquetl Jo'as yohuiyaya para 23 xihuitl ipan itlanahuatilis ipan tlali Jud'a, pejqui tlanahuat'ia Tlanahuatijquetl Joacaz, icone Jeh'u, ipan tlali Israel. Mosehui para tequitis ipan altepetl Samaria huan tlanahuati 17 xihuitl. 2Pero quichijqui tlen ax cuali iixtla TOTECO pampa quichijqui san se tlajtlacoli queja quichijqui Tlanahuatijquetl Jeroboam, icone Nabat, tlen quinnextili israelitame ma quihueyichihuaca TOTECO ica teteyome. Huan Joacaz ax quicajtejqui ni tlajtlacoli. 3Huan tlahuel cualanqui TOTECO ica nopa tlacame tlen tlali Israel, huan quintemactili imaco Tlanahuatijquetl Hazael tlen tlali Siria huan imaco Ben Adad tlen eliyaya icone. 4Huajca Tlanahuatijquetl Joacaz momaijto ica TOTECO para ma quipalehui. Huan TOTECO quitlacaquili tlen quitlajtlani pampa TOTECO quiitac quejatza nopa Tlanahuatijquetl tlen tlali Siria quintlaijiyohuiltiyaya israelitame. 5Huan TOTECO quinmacac nopa tlali Israel ehuani se temaquixtijquetl huan queja nopa israelitame momaquixtijque ininmaco tlali Siria ehuani. Huan teipa nopa tlali Israel ehuani itztoyaj ica cuali ipan inintlal queja achtohuiya eliyaya. 6Pero nopa tlali Israel ehuani quisenhuiquilijque tlajtlacolchijque pampa quitoquilijque nopa fiero ojtli tlen Tlanahuatijquetl Jeroboam tlen tenextilijtoya ma quinpiyaca tlaixcopincayome tlen pilhuacaxtzitzi para ica quihueyitlalise TOTECO. Huan tlali Israel ehuani tlahuel tlajtlacolchijque huan quiquetzque se fiero tlaquetzali tlen nopa tiotzi Asera ipan altepetl Samaria. 7Huan teipa Tlanahuatijquetl Joacaz san quinpixtoya 50 isoldados tlen nejnemij cahuajtipa, 10 tlatehuijca carros ica cahuayojme huan 10 mil soldados tlen san iniicxipa nemij pampa nopa tlanahuatijquetl tlen tlali Siria quinmictijtoya nochi sequinoc huan quinchijtoya queja tlaltejpoctli tlen ipan nejnemiyaya. 8Nochi tlen panoc ipan itequi Tlanahuatijquetl Joacaz huan nochi tlen quichijqui huan quejatza motemacac ipan tlatehuilistli eltoc ijcuilijtoc ipan nopa amatlapohuali itoca Tlen Quichijque Nopa Tlanahuatiani Ipan Tlali Israel. 9Huan mijqui Tlanahuatijquetl Joacaz huan quitlalpachojque ica itatahua ipan altepetl Samaria. Huan pejqui tlanahuat'ia Jo'as tlen eliyaya icone. 10Quema Tlanahuatijquetl Jo'as, icone mijcatzi Tlanahuatijquetl Ocoz'ias, yohuiyaya para 37 xihuitl ipan itequi ipan tlali Jud'a, pejqui tlanahuat'ia seyoc tlen nojquiya itoca Jo'as, pero elqui icone Joacaz, ipan tlali Israel. Huan ni Jo'as mosehui para tlanahuatis ipan altepetl Samaria huan tlanahuati 16 xihuitl. 11Pero ni Jo'as ipan tlali Israel quichijqui tlen ax cuali iixtla TOTECO. Ax quinejqui quicahuas nopa tlajtlacoli para quihueyichihuase TOTECO ica teteyome tlen nopa mijcatzi Tlanahuatijquetl Jeroboam, icone Nabat, quinnextilijtoya tlali Israel ehuani ma quichihuaca. 12Huan nochi tlen panoc ipan itequi Tlanahuatijquetl Jo'as huan nochi tlen quichijqui, huan quejatza tlatehui ica Amas'ias, nopa tlanahuatijquetl tlen tlali Jud'a, nochi eltoc ijcuilijtoc ipan nopa amatlapohuali tlen itoca Tlen Quichijque Nopa Tlanahuatiani Ipan Tlali Israel. 13Huan quema mijqui Tlanahuatijquetl Jo'as, quitlalpachojque ipan altepetl Samaria ihuaya ihuejcapan tatahua tlen eliyayaj tlanahuatiani ipan tlali Israel. Huan pejqui tlanahuat'ia icone tlen itoca eliyaya nopa ompa Jeroboam. 14Quema tlamiyaya ifuerza Eliseo huan nechca eliyaya para miquis, yajqui quipaxaloto nopa Tlanahuatijquetl Jo'as tlen tlali Israel. Huan Jo'as chocac huan quiquechnahuajqui Eliseo huan quiilhui: --¡Notata, notata, ta tiitztoya ichicahualis ni tlali Israel! M'as tinechpalehui que tlatehuijca carros huan soldados tlen quinnemilt'iaj. 15Huan Eliseo quiilhui: --Xijcuiti se cuahuitoli huan sequin cuatlamintli. Huan nopa tlanahuatijquetl quicuic se cuahuitoli huan sequin cuatlamintli, 16huan Eliseo quiilhui nopa tlanahuatijquetl ipan Israel: --Xijtlali moma ipan nopa cuahuitoli. Huan quitlali ima ipan nopa cuahuitoli. Huajca Eliseo quitlali ima ipan ima nopa tlanahuatijquetl, 17huan quiilhui: --Xijtlapo nopa ventana tlen tlachixtoc ica campa quisa tonati. Huan nopa tlanahuatijquetl quitlapo, huan Eliseo quinahuati: --Ama xijmajcahua. Huajca nopa tlanahuatijquetl tlamotlac ica icuahuitol huan Eliseo quiijto: --Ya ni eltoya icuatlami TOTECO tlen mitzchihuas xiquintlani nopa tlali Siria ehuani ipan altepetl Afec. 18Teipa Eliseo quiilhui nopa tlanahuatijquetl: --Xijcui nopa cuatlamintli huan xijhuitequi nopa tlali. Huan nopa tlanahuatijquetl quihuitejqui eyi hueltas huan moquetzqui. 19Huan nopa tiocamanalojquetl cualanqui huan quiilhui: --¿Para tlen san expa tijhuitejqui? Intla tijhuitectosqu'ia nopa tlali macuili o chicuase huelta, tiquintlanisqu'ia nopa Siria ehuani hasta axaca tijcajtosqu'ia itztoc, pero ama san eyi huelta tiquintlanis nopa Siria ehuani. 20Huan teipa mijqui Eliseo huan quitlalpachojque. Sesen xihuitl quema moselilt'iaj cuatini miyac fiero tlaxtequini tlen tlali Moab hualayayaj ipan tlali Israel para tlaxtequise. 21Huan se tonal tlacame quitlalpachohuayayaj se mijcatzi. Huan quinitaque tlahuel miyac tlaxtequini hualahuij. Huajca nimantzi quicuamajcajtejque nopa mijcatzi ipan nopa itlacacahuaya Eliseo huan cholojtejque tlen nopa tlaxtequini. Huan nopa mijcatzi quiajsito Eliseo iomiyo, huan nimantzi moyoliti huan moquetzqui. 22Nopa Tlanahuatijquetl Hazael tlen tlali Siria quintlaijiyohuiltijtoya Israel ehuani nochi tonali quema tlanahuatiyaya Tlanahuatijquetl Joacaz. 23Pero TOTECO quipixqui hueyi iyolo ica Israel ehuani huan ax quicahuili ma quintzontlamiltis nochi. TOTECO quintlasojtlac pampa quichijtoya se tlajtolsencahuali ica Abraham, Isaac huan Jacob, ininhueyi tatahua. Huan hasta ama TOTECO ax quinequi quintlamipolos nopa Israel ehuani, niyon ax quinequi quinhuejcamajcahuas tlen iixtla. 24Huan teipa Tlanahuatijquetl Hazael tlen tlali Siria mijqui huan icone, Ben Adad, mochijqui tlanahuatijquetl. 25Huajca nopa Tlanahuatijquetl Jo'as ipan tlali Israel tlen elqui icone Joacaz, yajaya tlatlanqui huan quicuili Ben Adad nopa altepetini tlen itata Ben Adad quicuilijtoya tlen ya itata. Huan Jo'as quitlanqui Ben Adad eyi huelta huan quicuic sampa nopa altepetini ipan tlali Israel tlen quincuilijtoya.

will be added

X\