2 Kings 10

1Nopa mijcatzi Tlanahuatijquetl Acab quinpixtoya 70 itelpocahua huan iixhuihua tlen itztoyaj ipan altepetl Samaria. Huajca Jeh'u quiijcuilo amatlajcuiloli huan quintitlanili ipan altepetl Samaria para nopa huejhueyi tlacame huan nopa tequihuejme huan inintlamocuitlahuijcahua iconehua Tlanahuatijquetl Acab, huan nopa amatlajcuiloli quiijtohuayaya: 2"Inquinpiyaj imomaco itelpocahua huan iixhuihua imoteco, nopa mijcatzi Tlanahuatijquetl Acab. Huan inquipiyaj tlatehuijca carros huan tlacame tlen nemij cahuajtipa, huan initztoque ipan se altepetl tzactoc ica tepamitl huan inquipiyaj tepostli para ica intlatehuise. Huajca quema ajsis ni amatlajcuiloli imomaco, 3xijtlapejpenica nopa icone Acab tlen inquiitaj para elis imotlanahuatijca huan xijtlalica campa mosehuiyaya itata para tlanahuatis. Huan ximocualtlalica para intlatehuise para tlen eliyaya itlanahuatilis Acab." Queja nopa quiijto nopa amatlajcuiloli. 4Pero nopa tlacame ipan altepetl Samaria tlahuel momajmatijque huan quiijtojque: "Intla ome huejhueyi tlanahuatiani ax huelque quitlanque ni Jeh'u, ¿quejatza huelis tijtlanise tojuanti?" 5Huajca nopa tlamocuitlahuijquetl tlen icaltlanahuatil nopa tlanahuatijquetl, huan nopa huejhueyi tequihuejme ipan altepetl Jezreel, huan nopa tlayacanani huan inijuanti tlen quinmocuitlahuiyayaj iconehua Acab, nochi quiyolmelajque Jeh'u: "Tojuanti timitztequipanose huan tijchihuase tlen titechnahuatis, pero axaca tijtlalise para tlanahuatijquetl. Xijchihua nica tlen achi m'as mitzpact'ia." 6Huan ica ompa Jeh'u quintlajcuilhui huan quinilhui: "Intla initztoque ica na huan inquinequij inquineltocase notlanahuatil, xiquinquechtzontequica nochi iconehua Acab, yajaya tlen eliyaya imoteco. Huan mostla ipan ni hora xinechhualiquilica nica ipan altepetl Jezreel." Huan nopa tlayacanani ipan altepetl Samaria quinmocuitlahuijtoyaj nopa 70 iconehua huan iixhuihua nopa tlanahuatijquetl hasta quema pilsiltzitzi huan quiniscaltijtoyaj. 7Pero quema quiselijque nopa amatlajcuiloli, quincuique nopa 70 iconehua huan quinmictijque, huan inintzonteco quitlalijque ipan se quesqui cuachiquihuitl huan quintitlanilijque nepa ipan altepetl Jezreel. 8Huan se tlayolmelajquetl yajqui quiilhuito Jeh'u para quihualicatoyaj inintzonteco iconehua huan iixhuihua nopa mijcatzi Tlanahuatijquetl Acab. Huajca Jeh'u quinilhui: --Xijchihuaca ome monton campa puerta ipan itepa ni altepetl huan nopona xijcahuaca inintzonteco hasta mostla. 9Huan hualmostla quisqui Jeh'u huan moquetzqui huan tlamiyacapa quincamahui nochi tlacame tlen ehuaj nopa altepetl. Quiijto: --Imojuanti ax inquipiyaj tlajtlacoli. Na tlen nimoiyocatlali tlen notlanahuatijca huan nijmicti ya, pero ¿ajqueya quinmicti nochi iconehua? Yajaya Toteco tlen quichijtoc ma quinmictica, 10pampa nochi tlen TOTECO quiijto ica itlatequipanojca, El'ias para ininpantis iteixmatcahua Acab, ya nopa mochijtoc. 11Huan teipa Jeh'u quinmicti nochi iteixmatcahua Acab tlen noja itztoyaj ipan altepetl Jezreel, ininhuaya nochi itequiticahua, ihuampoyohua huan itotajtzitzi. Ax quicajqui niyon se ma itzto tlen moixmatiyaya ihuaya, niyon tlen eliyaya ihuampo. 12Teipa Jeh'u yajqui altepetl Samaria. Huan ipan ojtli ajsito ipan se cali campa tequitiyayaj tlen quinmocuitlahu'iaj huan quinximaj borregojme. 13Huan nopona quinpanti iicnihua nopa mijcatzi Tlanahuatijquetl Ocoz'ias tlen elqui tlanahuatijquetl ipan tlali Jud'a. Huan Jeh'u quintlajtlani: --¿Ajqueya imojuanti? Huan quiilhuijque: --Tojuanti tiiicnihua Ocoz'ias, huan tiyohuij tiquinpaxalotij itelpocahua nopa mijcatzi tlanahuatijquetl Acab huan nopa sihua tlanahuatijquetl Jezabel. 14Huajca Jeh'u quinnahuati itlatoquilijcahua: --Xiquinitzquica yoltoque. Huajca quinitzquijque yoltoque nochi nopa 42 tlacame huan quinhuicaque hasta nechca se ameli tlen eltoc ipan Bet Equed huan nopona quinquechtzontejque. Huan ax mocajqui yoltoc, niyon se. 15Quema Jeh'u quisqui nopona, mopanti ihuaya nopa Jonadab, icone Recab. Huan quitlajpalo huan teipa quiilhui: --¿Cuali moyolo ica na, san queja na noyolo cuali ica ta? Huan Jonadab quiilhui: --Quena. Huan Jeh'u quiilhui: --Huajca xinechmaca moma. Huajca Jonadab quimacac ima huan Jeh'u quichijqui para ma tlejco ipan itlatehuijca carro, 16huan quiilhui: --Xihuala nohuaya huan tiquitas tlen ya nijchijtoc pampa nijtoquil'ia nochi tlen nechnahuat'ia noTeco Dios. Huajca Jonadab yajqui ihuaya. 17Huan quema calactiyohuiyaya ipan altepetl Samaria, Jeh'u quinmicti nochi iteixmatcahua Acab tlen mocajtoyaj nopona. Huajca quintzontlamilti nochi iteixmatcahua Acab san queja TOTECO quitencahuilijtoya ica El'ias para panos. 18Teipa Jeh'u quinsentili nochi altepetl Samaria ehuani huan quinilhui: --Acab tlahuel quentzi quihueyichijqui nopa tiotzi Baal, pero na, quena, tlahuel nijhueyichihuas. 19Huajca nimantzi xiquinnotzaca ma hualaca nochi itiocamanalojcahua Baal, nochi itlatequipanojcahua, huan nochi itotajtzitzi. Ma ax mocahua niyon se pampa nijpiya se hueyi tlacajcahualistli para Baal. Intla se tlen quihueyichihua Baal polihuis, quipiya para miquis. Pero Jeh'u quisencajtoya nopa tlacajcahualistli para tecajcayahuas. Queja nopa, ica sampa, huelis quintlamiltis nochi tlen nopona ehuaj tlen quihueyichihuaj Baal. 20Huajca tlanahuati Jeh'u ma oncas se hueyi tlasentilistli huan ilhuitl para Baal huan queja nopa quichijque. 21Huan quintitlanqui tlayolmelahuani ipan nochi tlali Israel para quinnotzase tlen quitoquiliyayaj Baal. Huan nochi hualajque huan tlahuel temic itiopa Baal tlen se lado hasta seyoc. 22Huan Jeh'u quiilhui nopa tlacatl tlen quiajcocui nopa yoyomitl para itlatequipanojcahua Baal para ma quinpiya cuidado para senquistoc nochi nopa tlacame ma moquentise nopa yoyomitl tlen monequi para quihueyitlalise Baal. 23Huan teipa calajqui Jeh'u ipan nopa tiopamitl tlen Baal ihuaya Jonadab, icone Recab, huan quinilhui nochi itlatequipanojcahua Baal: --Xijpiyaca cuidado para ma ax itzto niyon se campa imojuanti tlen quihueyichihua TOTECO, san monequi ma itztoca tlen quihueyichihuaj Baal. 24Huajca nochi tlen quihueyichijque Baal calajque ipan nopa tiopamitl para quimacase nopa tlacajcahualistli. Huan Jeh'u quintlali 80 tlacame ica calteno, huan quinilhui: --Intla se quicahuas ma cholo se tlacatl tlen niquintemactilijtoc imomaco, monequi miquis. 25Huan teipa quema tlanque temacaj tlacajcahualistli, Jeh'u quinnahuati nopa tlamocuitlahuiani huan nopa tlayacanani tlen isoldados: --Xicalaquica huan xiquinmictica nochi nopa tlacame. ¡Ma axaca cholo! Huan quinmictijque nochi ica machete, huan quinquixtijque inintlacayohua calteno ipan nopa tiopamitl. Huan teipa calajque campa m'as calijtic huan campa quiitayayaj para m'as tlatzejtzeloltic ipan tiopamitl. 26Huan quinquixtijque nopa teteyome tlen Baal huan quintlatijque. 27Nojquiya quintlamixolejque nopa tlaixcopincayome huan senquistoc nochi itiopa Baal. Huan nopona quichijque ma elis cuitlacaltini para ma quitequihuica nochi altepetl ehuani. Huan queja nopa eltoc hasta ama. 28Queja nopa Jeh'u quitzontlamilti Baal ica nochi nopa tlacame tlen quitoquiliyayaj tlen tlali Israel. 29Pero ax quinxolejqui nopa pilhuacaxtzitzi tlen oro tlen eltoya ipan altepetini Betel huan Dan. Nopa pilhuacaxtzitzi elqui nopa hueyi tlajtlacoli tlen mijcatzi Tlanahuatijquetl Jeroboam, icone Nabat, quinnextilijtoya Israel ehuani ma quichihuaca. Quinilhui ma quihueyichihuaca TOTECO, pero ica nopa teteyome tlen pilhuacaxtzitzi tlen oro. 30Pero yonque Jeh'u ax quinijcueni nopa pilhuacaxtzitzi, TOTECO quiilhui: "Tijchijtoc tlen cuali pampa tiquinmicti nochi iteixmatcahua Acab. Huan huajca mocone, huan moixhui huan icone moixhui elise tlanahuatiani ipan tlali Israel huan mosehuise ipan mosiya yejyectzi para tlanahuatise." 31Pero Jeh'u ax quitoquili itlanahuatilhua TOTECO Dios tlen tiisraelitame ica nochi iyolo. Ax quicajqui nopa tlajtlacoli para quihueyitlalise TOTECO ipampa teteyome. Ya nopa elqui nopa tlajtlacoli tlen Tlanahuatijquetl Jeroboam quinnextili israelitame. 32Huajca ipan nopa tonali TOTECO pejqui quincuil'ia inintlal nopa israelitame. Nopa Tlanahuatijquetl Hazael quincuilijtiyajqui inintlal campa hueli 33ipan sejcoyoc nopa atemitl Jord'an campa quisa tonati huan nojquiya campa hueli tlen tlali Galaad, Gad, Rub'en huan Manas'es. Tlanahuatijquetl Hazael quitlanqui nopa tlali tlen altepetl Aroer inechca nopa atlajtli Arn'on hasta tlali Galaad huan Bas'an para norte. 34Nopa sequin tlamantli tlen panoc ipan itlanahuatilis Jeh'u huan nochi tlen quichijqui eltoc ijcuilijtoc ipan nopa amatlapohuali itoca Tlen Quichijque Nopa Tlanahuatiani Ipan Tlali Israel. 35Huan quema mijqui Jeh'u, quitlalpachojque ipan altepetl Samaria. Huan pejqui tlanahuat'ia icone tlen itoca eliyaya Joacaz. 36Huan Jeh'u elqui tlanahuatijquetl tlen tlali Israel para 28 xihuitl huan mosehui ipan altepetl Samaria para tequitis.

will be added

X\