2 Kings 1

1Teipa quema ya mictoya Tlanahuatijquetl Acab, moyolajcomanque tlali Moab ehuani ica tlali Israel ehuani. 2Huan Tlanahuatijquetl Ocoz'ias tlen tlali Israel huetzqui tlen se ventana huejcapa ipan ichaj nepa ipan altepetl Samaria huan tlahuel mococo. Huan quintitlanqui itlatequipanojcahua ma yaca itiopa Baal Zebub, nopa tlaixcopincayotl tlen altepetl Ecr'on para quitlajtlanitij intla mochicahuas o axtle. 3Pero se ielhuicac ejca TOTECO quiyolmelajqui El'ias, tlen ejqui altepetl Tisbe, tlaque quichihuayaya nopa tlanahuatijquetl. Huan quiilhui ma quinnamiquiti itlatequipanojcahua Tlanahuatijquetl Ocoz'ias huan ma quinmaca ni tlajtoli. Huan El'ias quinilhui ni tlajtoli para ma quiilhuitij ininteco: "¿Para tlen monequi titlatitlanis ma quitlajtlanitij tlaque panos nopa teteyotl Baal Zebub ipan tlali Ecr'on? ¿Ax tijmati para Toteco Dios itztoc ipan ni tlali Israel para tijtlajtlanis? 4Huajca pampa tijchijtoc ni, TOTECO quiijtohua: 'Ayoc timehuas ipan motlapech, pero nopona temachtli timiquis.' " Huan teipa El'ias mocuepqui ichaj. 5Huan itlatitlanilhua Tlanahuatijquetl Ocoz'ias mocuepque campa itztoya huan yajaya quintlajtlani: --¿Para tlen nimantzi inmocueptoque? 6Huan inijuanti quinanquilijque: --Tijnamijque se tlacatl tlen techilhui ma timocuepaca. Techilhui ma timitzyolmelahuaca para TOTECO quiijtojtoc: '¿Para tlen monequi titlatitlanis ma quitlajtlanitij Baal Zebub, nopa teteyotl ipan tlali Ecr'on? ¿Ax tijmati para Toteco Dios itztoc ipan ni tlali Israel para tijtlajtlanis ya? Huajca pampa tijchijtoc ya ni, ayoc timehuas ipan motlapech, pero nopona temachtli timiquis.' 7Huajca nopa tlanahuatijquetl quintlajtlani: --¿Quejatza eliyaya nopa tlacatl tlen inquinamijque huan inmechilhui nopa tlajtoli? 8Huan quinanquilijque: --Eliyaya se tlacatl ica iyoyo tlen quisencajtoya ica iniijhuiyo tlapiyalime, huan motlajcoilpitoya ica se cintur'on tlen cuetlaxtli. Huan nopa tlanahuatijquetl quiijto: --¡Yajaya nopa El'ias tlen ehua altepetl Tisbe! 9Huajca nimantzi quititlanqui se tlayacanquetl ica 50 isoldados para ma quicuitij El'ias. Huajca nopa tlayacanquetl tlejcoc hasta campa itztoya huan quema quipantitoj, El'ias mosehuijtoya itzonpac se tepetl. Huajca nopa tlayacanquetl tlen nopa soldados quiilhui: --¡Ta tiitlatequipanojca Toteco Dios, xitemo! Nopa hueyi tlanahuatijquetl quinequi xihuala tohuaya. 10Huan El'ias quinanquili nopa tlayacanquetl tlen 50 soldados: --Intla na nel'ia niitlatequipanojca Toteco Dios, ma huetzi tlitl tlen elhuicac huan ma mitztlati ica nochi 50 mosoldados. Huan nimantzi huetzqui tlitl tlen elhuicac huan quitlamitlati ica nochi 50 isoldados. 11Huan nopa tlanahuatijquetl quititlanqui seyoc tlayacanquetl ica 50 isoldados ma quiitatij El'ias huan quiilhuijque: --¡Ta tlen tiitlatequipanojca Toteco Dios, nimantzi xitemo pampa queja nopa quiijtohua nopa hueyi tlanahuatijquetl! 12Huan El'ias quinnanquili: --Intla na niitlatequipanojca Toteco Dios, ma huetzi tlitl tlen elhuicac huan ma mitztlati ininhuaya nochi nopa 50 mosoldados. Huan nimantzi huetzqui tlitl tlen elhuicac huan quitlamitlati ininhuaya nopa 50 soldados. 13Teipa sampayano nopa tlanahuatijquetl quititlanqui seyoc tlayacanquetl ica sequinoc 50 isoldados. Pero nopa expa tlayacanquetl tlen soldados tlejcoc hasta campa itztoya El'ias, huan motlancuaquetzqui iixtla huan ica nochi iyolo quiilhui: --Tiitlatequipanojca Toteco Dios, nimitztlajtlan'ia chicahuac, xinechtlasojtla na huan ni 50 soldados tlen timotlatequipanojcahua. ¡Amo xitechmicti! 14Tijmatij tiquinpolo nopa sequinoc soldados ica tlitl tlen huetzqui tlen elhuicac, pero tojuanti xitechtlasojtla huan xitechcahua tiitztose. 15Huan ielhuicac ejca TOTECO quinojnotzqui El'ias huan quiilhui: --Xiya ihuaya, amo xiquimacasi. Huan El'ias motlalanqui huan temoc ipan nopa tepetl, huan yajqui ihuaya nopa tlayacanquetl para quiitati nopa hueyi tlanahuatijquetl. 16Huan El'ias quiilhui: --Queja ni quiijtohua TOTECO: 'Pampa tiquintitlanqui motlatitlanilhua ma quitlajtlanitij Baal Zebub, nopa tlaixcopincayotl tlen altepetl Ecr'on, ayoc timehuas ipan motlapech, pero nica temachtli timiquis pampa tijchijtoc queja ax tijmati intla niitztoc niimoTeco Dios ipan ni tlali Israel para tinechtlajtlanisqu'ia.' 17Huajca mijqui Tlanahuatijquetl Ocoz'ias san queja TOTECO quiilhuijtoya ica El'ias. Huan Joram tlen eliyaya iicni mochijqui tlanahuatijquetl pampa Ocoz'ias ax quipixqui icone. Huan Joram pejqui tlanahuat'ia ipan tlali Israel quema ne seyoc Tlanahuatijquetl Joram tlen eliyaya icone Josafat yohuiyaya para ome xihuitl tlanahuat'ia ipan tlali Jud'a. 18Huan nochi sequinoc tlamantli tlen panoc ipan itequi Tlanahuatijquetl Ocoz'ias huan nochi tlen quichijqui eltoc ijcuilijtoc ipan nopa amatlajcuiloli tlen itoca Tlen Quichijque Nopa Tlanahuatiani Ipan Tlali Israel.

will be added

X\