2 CORINTIOS 6

1Tojuanti tlen tiitequipanojcahua Toteco, ica nochi toyolo timechtlajtlan'iaj xijselica ica yejyectzi ni cuali tlajtoli pampa hueyi iyolo Toteco ica tlacame. Amo xijcahuaca se lado queja ax tleno elisqu'ia, 2pampa ijcuilijtoc ipan Itlajtol Toteco campa yajaya quiijtohua: "Quema ajsis nopa hora tlen cuali, nimechcaquis quema innechnotzase. Ipan nopa tonal nimechpalehuis huan nimechmaquixtis tlen imotlajtlacolhua." Quej nopa quiijto Toteco Dios. Pero xiquitaca, ama ajsic hora para inquitlajtlanise Toteco ma inmechpalehui. Ama ni tonal, nopa tonali quema Toteco quinequi inmechmaquixtis tlen imotlajtlacolhua. 3Xijchihuaca campeca para xijchihuaca nochi tlen cuali para axaca ma quihuejcamajcahuas Toteco ipampa tlen tijchihuaj. Ax tijnequij para niyon se ma techijilnamiqui, niyon quitlaijilhui totequi ipampa tijchijtoque tlen ax monequi. 4Quena, nochi tlen tijchihuaj, quinext'ia para melahuac tiitequipanojcahua Toteco. Tijpiyaj toyolo yonque techtlaijiyohuilt'iaj tlacame, o ax tijpiyaj tlen ica tipanose, o tijpanoj miyac trabajojyotl. 5Tiquijiyohu'iaj yonque tlacame techmaquil'iaj, techtzacuaj, o mosentlanchihuaj tohuaya. Quemantzi titequitij hasta campa ayoc tihuelij. Quemantzi ax techcahuaj ma ticochica huan quemantzi timayanaj pampa ax tleno tijpiyaj para tijcuase. 6Pero tojuanti titenextil'iaj para tijpiyaj se nemilistli tlen tlapajpactic huan para cuali tiquixmatij Itlajtol Toteco. Nochi quiitaj para tijpiyaj toyolo ica nochi tlacame huan tiquinchihuil'iaj tlen cuali. Nempa nesi para Itonal Toteco tequiti ipan toyolo huan para titeicnel'iaj miyac. 7Ica cuali toyolo titeyolmelahuaj tlen senquistoc melahuac, huan tlacame quiitaj para ichicahualis Toteco Dios tequiti ipan tonemilis. Huan pampa tiitztoque tixitlahuaque iixpa Toteco, tijpiyaj nochi tlen monequi para titlatehuise huan timomanahuise ica yajaya tlen ax cuali. 8Tojuanti tijtequipanohuaj Toteco yonque tlacame techtlepanitaj, o techcocol'iaj. Ax tijquetzaj totequi yonque tlacame camatij cuali tlen tojuanti huan techtlascamatil'iaj, o techtlaijilhu'iaj. Yonque sequin tlacame techitaj queja titlacajcayahuani, tojuanti ticamatij tlen senquistoc melahuac. 9Yonque nochi tlacame campa hueli techixmatij, miyac techitaj queja ax techixmatij. Quemantzi timopant'iaj nechca miquistli, pero noja tiitztoque. Quemantzi tlahuel techtlatzacuilt'iaj huan quinequij techtzontlamiltise, pero noja ax techmictijtoque. 10Yonque tijpanoj cuesoli, nochipa tipactoque. Yonque titeicneltzitzi, pero tiquinricojchihuaj miyac tlacame para ma quipiyaca tlen tlahuel ipati nepa iixpa Toteco. Quemantzi nesi para ax tleno tijpiyaj, pero tijpiyaj nochi tlamantli tlen m'as monequi. 11Noicnihua tlen initztoque ipan altepetl Corinto, nimechcamahuijtoc tlen senquistoc melahuac, huan ax tleno nijtlatijtoc. Huan nijnequi xijmatica para nel'ia nimechicnel'ia ica nochi noyolo. 12Intla ax cuali timohuicaj, ax totlajtlacol tojuanti, pampa miyac timechicnel'iaj. Elisqu'ia imotlajtlacol imojuanti pampa san pilquentzi intechicnel'iaj. 13Na nimechcamahu'ia queja inelisqu'iaj inconeme. Nijnequi xitechicnelica queja tojuanti timechicnel'iaj. 14Amo ximosentilica ihuaya se tlen ax quineltoca Toteco, pampa tlacame tlen quichihuaj tlen xitlahuac ax tleno quipiyaj ininhuaya tlen motemactilijtoque ica tlajtlacoli. Huan tlen nemij ipan tlahuili ax tleno quipiyaj ica tlen nemij ipan tzintlayohuilotl. 15Tohueyiteco Cristo ax tleno quipiya ica Axcualtlacatl. Huan se tlen quineltoca Tohueyiteco Cristo ax tleno quipiya ica se tlen ax quinequi quineltocas. 16Nojquiya itiopa Toteco ax tleno quipiya ica totiotzitzi tlen tlacame quinmachijchijtoque. Nochi tojuanti tiitztoque tiitiopaj Toteco tlen yoltoc pampa yajaya mocahua ipan toyolo. Eltoc queja Toteco Dios quiijto ipan Itlajtol campa ijcuilijtoc: "Nimochantis ipan tlacame tlen nechneltocaj, huan ninejnemis tlatlajco inijuanti. Na nielis niininTeco, huan inijuanti elise notlacajhua." 17Yeca Toteco Dios quiijtohua: "Xiquintlalcahuica tlacame tlen ax quineltocaj Toteco. Ximoiyocatlalica. Amo xijnechcahuica tlen ax cuali tlen inijuanti quichihuaj. Huan na nimechselis ica cuali. 18Huan na nielis niimoTata, huan imojuanti inelise innotelpocahua huan innoichpocahua. Quej nopa quiijtohua Toteco Dios tlen Quipiya Nochi Tlanahuatili."

will be added

X\