2 CORINTIOS 1

1Na niPablo niitlayolmelajca Jesucristo pampa Toteco ica ipaquilis nechtlapejpeni para niteilhuis itlajtol. Na ihuaya toicni Timoteo timechtlajcuilhu'iaj imojuanti tlen initiopa Toteco ipan altepetl Corinto huan nojquiya tiquintlajcuilhu'iaj nochi tlaneltocani tlen itztoque ipan imotlal Acaya. 2Toteco Totata huan Toteco Jesucristo ma quipiyaca hueyi ininyolo ica imojuanti huan ma inmechmacaca tlasehuilistli ipan imoyolo. 3Ma tijtlascamatica Toteco Dios, yajaya tlen iTata Tohueyiteco Jesucristo. Yajaya tlen techtlasojtla huan ajachica techyoltlal'ia. 4Yajaya techyoltlal'ia ipan nochi nopa trabajojyotl tlen techpanotihuala huan queja nopa quichihua para tojuanti nojquiya tihuelise tiquinyoltlalise sequinoc tlen itztoque ipan tlaohuijcayotl san se queja Toteco techyoltlalijtoc. 5Quema tojuanti miyac titlaijiyohu'iaj pampa tiiaxcahua Cristo, Toteco miyac techtiochihua huan Cristo miyac techyoltlal'ia. 6Huan tojuanti titlaijiyohuijtoque miyac pampa tijnequij imojuanti xiyolpactoca huan para nel'ia ximomaquixtica ipan Jesucristo. Huan quema Toteco techyoltlal'ia, queja nopa quichihua para tojuanti nojquiya huelis timechyoltlalise huan timechpalehuise para inquipiyase fuerza huan ax inhuetzise quema inpanose ipan tlaijiyohuilistli queja tojuanti. 7Tojuanti timotemach'iaj ipan Toteco para yajaya inmechyoltlalis queja techyoltlalijtoc pampa nojquiya intlaijiyohu'iaj queja tojuanti. 8Noicnihua, nijnequi xijmatica para tojuanti tijpanoque miyac trabajojyotl ipan tlali Asia. Tlahuel miyac trabajojyotl tijpixque hasta ayoc tijpixque chicahualistli para huelis tiquijiyohuise. Tijmachiliyayaj para timiquisqu'iaj. 9Quena, timoilhuiyayaj para temachtli nimantzi techmictisqu'iaj. Ya nopa techpanoc para ma ax timotemachica ipan toseltitzi, pero para ma timotemachica ipan Toteco tlen quinyolit'ia mijcatzitzi. 10Quena, Toteco techmanahui quema nopa tlacame mocualtlaliyayaj para techmictise. Huan yajaya mojmostla techmanahu'ia. Huan timotemach'iaj ipan ya para teipa techmanahuis tlen nopa miquistli tlen m'as mahuilili. 11Huan imojuanti nojquiya intechpalehu'iaj quema inmomaijtohuaj. Intla miyac tlen imojuanti inmomaijtohuaj ica Toteco topampa, huajca quema Toteco techmanahuis, miyac tlen imojuanti nojquiya inquihueyimatise huan inquitlascamatise. 12Ica miyac paquilistli huan ica se toyolo tlen ax techteilhu'ia, nimechilhu'ia para nochipa tijchijtoque tlen senquistoc cuali huan tlen xitlahuac iixpa Toteco. Niyon se tlamantli ax tijchijtoque san ica totlalnamiquilis tojuanti. Pero Toteco quena, pampa hueyi iyolo noca na, nechpalehuijtoc para nijchihuas tlen nel'ia xitlahuac ica tlacame ipan ni tlaltepactli tlen ax quineltocaj Toteco huan achi m'as nijchijtoc tlen xitlahuac ica imojuanti. 13Ipan noamatlajcuilol san nimechtlajcuilhu'ia xitlahuac tlen ax ohui para inquipohuase huan inquimachilise. Ax tleno nijtlatiyaya para san sequin ma quimachilica. Nijnequi se tonal xijmachilica nochi tlen tojuanti, 14yonque ama san se pilquentzi inquimachil'iaj tlen tojuanti. Huan queja nopa ipan nopa tonal quema sampa hualas Tohueyiteco Jesucristo, huelis inpaquise pampa intechixmatij, queja nojquiya tipaquise pampa timechixmatij. 15Huan pampa nimotemach'ia para sampa inpaquise tohuaya, nijnequiyaya niyas nimechitati ome hueltas, para ome hueltas inquiselijtosqu'iaj tlatiochihualistli. 16Nijnequiyaya nimechitas quema niyasqu'ia ipan ojtli para tlali Macedonia huan teipa quema nimocuepasqu'ia. Nimoilhui para queja nopa innechpalehuijtosqu'iaj ica tlen monequiyaya ipan ojtli para tlali Judea, pero ax quisqui. 17Huajca huelis intlajtlanise para tlen nijpatlac notlalnamiquilis intla nel'ia nimoilhuiyaya para niyas nepa. O huelis inmoilhu'iaj para nicamati queja tlacame ipan ni tlaltepactli tlen quiijtohuaj, "quena", pero ipan ininyolo quiijtohuaj, "axtle". 18Pero ax quej nopa, noicnihua. Toteco Dios quimati para na ax niquijtojtosqu'ia, quena, nijchihuas se tlamantli, intla ya nijmati para ax nijchihuas. 19Pampa Jesucristo, Icone Toteco, yajaya tlen Timoteo, Silvano huan na timechcamahuijtoque, ax quema quiijtosqu'ia quichihuas se tlamantli tlen quimati ipan iyolo para ax quichihuas. Yajaya nochipa quiijtohua quichihuas huan, quena, quichihua. 20Huan nojquiya Jesucristo temachtli quichihuas senquistoc nochi tlen Toteco techtencahuilijtoc para quichihuas. Yeca tijhueyichihuaj huan tijtlascamatij Toteco pampa tiquitaj para nel'ia temachtli. Yeca quema tijhueyichihuaj Toteco huelis tiquijtose: "Quej nopa ma eli" ica nochi nopa tlamantli tlen yajaya techtencahuilijtoc. 21Huan Toteco Dios yajaya tlen techchijtoc tojuanti huan imojuanti para ma tielica titemachme ipan Tohueyiteco Cristo. Yajaya nojquiya techmacac Itonal para techiyocacahuas para ma tielica tiiaxcahua. 22Quena, Toteco quitlalijtoc isello ipan tojuanti para ma nesi tiiaxcahua. Huan yajaya techmacatoc Itonal ipan toyolo queja se tlayacanca tomi tlen technextil'ia para temachtli techmacas nochi tlen techtencahuilijtoc yonque noja polihui para techmacas. 23Nijtestigojquetza Toteco para senquistoc melahuac tlen nimechilhu'ia ama. Melahuac ax niyajqui nimechitato ipan altepetl Corinto pampa ax nijnejqui nimechtlacahualtiti ica tlajtoli tlen nelchicahuac. 24Ax nijnequi nimechnahuatis quejatza monequi xijneltocaca queja nielisqu'ia niimoteco. Tojuanti tijnequij titequitise san sejco ica imojuanti huan timechpalehuise para noja m'as xipaquica huan ximochihuaca intemachme.

will be added

X\