2 Chronicles 32

1Teipa quema ya panotoya se quesqui xihuitl quema Tlanahuatijquetl Ezequ'ias quichihuayaya miyac tlamantli tlen cuali, hualajqui Senaquerib, nopa tlanahuatijquetl tlen tlali Asiria. Huan calajqui ipan tlali Jud'a para quitehuis. Huan quinyahualo nopa altepetini tlen quipiyayayaj tepamitl huan quinnahuati isoldados para quitlapanase nopa tepamitl huan calaquise ipan nopa altepetini para moaxcatis. 2Huan quema Tlanahuatijquetl Ezequ'ias momacac cuenta para Senaquerib quinequiyaya calaquis nojquiya ipan Jerusal'en, 3quinnotzqui itlayacancahua ipan icaltlanahuatil huan nopa tlacame tlen quinyacanayayaj isoldados huan san sejco nochi moilhuijque para cuali quitzacuase nochi ameli tlen eltoya iteno itepa nopa altepetl. 4Huan mosentilijque tlahuel miyac tlacame para tequitise, huan quitzajque nochi nopa ameli huan nojquiya nopa pilatlajtzi tlen eltoya tlatzintla inintlal. Quichijque pampa ax quinequiyayaj para nopa tlanahuatiani tlen Asiria quipantisqu'iaj miyac atl quema hualasqu'iaj. 5Huan Tlanahuatijquetl Ezequ'ias nojquiya quichijqui m'as chicahuac nopa tepamitl tlen quiyahualo Jerusal'en pampa quicualtlali campa sosolijtoya huan quichijqui torres para ipan tlamocuitlahuise huan quichijque seyoc tepamitl calteno tlen nopa tepamitl tlen ya eltoya. Nojquiya quicualtlali itzintepanyo tlen quipalehuiyaya nopa tepamitl tlen quiyahualo Ialtepe David para ax huetzis. Quicualtlali tlahuel miyac tepostli para ica tlatehuise huan quichijqui miyac yolixtzajcayotl tlen tepostli. 6Huan quintlali tlayacanani tlen soldados para ma quinnahuatica israelitame tlen ax soldados. Quinsentili nochi nopa tlacame ipuertajteno nopa altepetl campa oncayaya se piso huan quinilhui: 7"Ximoyoltetilica huan ximosemacaca. Amo xiquimacasica nopa tlanahuatijquetl tlen tlali Asiria, niyon amo ximomajmatica ipampa nopa miyac soldados tlen ihuaya hualahuij. Pampa ica tojuanti itztoc se tlen m'as quipiya tetili que nopa tlanahuatijquetl. 8Yonque nopa tlanahuatijquetl quinpiya miyac isoldados, inijuanti san tlacame. TOTECO Dios itztoc tohuaya tojuanti. Yajaya toDios huan yajaya techpalehuis huan tlatehuis topampa tojuanti." Huan quema nopa israelitame quicajque itlajtol nopa tlanahuatijquetl, nel'ia moyolchicajque. 9Teipa quema nopa Tlanahuatijquetl Senaquerib tlen tlali Asiria noja quiyahualohuayaya nopa altepetl Laquis, quintitlanqui itlatequipanojcahua ipan Jerusal'en para ma quiilhuiti Tlanahuatijquetl Ezequ'ias huan nochi tlacame tlen tlali Jud'a tlen itztoyaj altepetl Jerusal'en, ni tlajtoli: 10"Quej ni quiijtohua Senaquerib, tlanahuatijquetl tlen tlali Asiria: '¿Para tlen inmoilhu'iaj huelis inquiijiyohuise ipan altepetl Jerusal'en quema timechyahualose? 11Intla Ezequ'ias inmechilhu'ia para imoTECO inmechmanahuis nomaco, inmechcajcayahua. Yajaya san quinequi inmechpixtos nopona para ximayancamiquica huan xiapismiquica. 12¿Ax inquimatij para yajaya Tlanahuatijquetl Ezequ'ias tlen quintlapanqui nochi itlaixpahua tlen eltoyaj ipan tepetini huan inmechilhuijtoc nochi intlali Jud'a ehuani huan inaltepe Jerusal'en ehuani para huelis inquihueyitlalise imoTECO ipan san setzi tlaixpamitl huan san nopona hueli inquitlatilise copali? 13" '¿Ax inquimatij tlen na huan notatahua tijchijtoque ipan sequinoc altepetini tlen sequinoc tlaltini? Inindioses ax huelque quinmanahu'iaj tlen nochicahualis. Huelis ax inquimachil'iaj para niyon se tlen inijuanti ax quema techtlantoc niyon se huelta. 14San xiquijtoca ajqueya nopa tiotzi tlen nochi tlaltini tlen notatahua quintzontlamiltijtoque tlen huelqui quimanahu'ia itlal tomaco. Ax oncatoc niyon se tiotzi tlen hueltoc quinmanahu'ia itlacajhua. Huajca ¿para tlen inmoilhu'iaj para imoTeco Dios huelis inmechmanahuis tlen nochicahualis? 15Huajca ma ax inmechcajcayahua Ezequ'ias. Amo xijneltocaca. Ya nimechilhuijtoc para niyon se teteyotl tlen sequinoc tlaltini ax hueltoc quinmanahu'ia itlacajhua tlen nochicahualis huan tlen ichicahualis notatahua. Huajca ¿quejatza inmoilhu'iaj para imoTeco Dios huelis inmechmanahuis?' " 16Huan itlatequipanojcahua Senaquerib tlen quihualicaque nopa amatlajcuiloli nojquiya tlahuel quimahuispolohuayayaj TOTECO Dios huan Tlanahuatijquetl Ezequ'ias tlen itlatequipanojca. 17Huan nojquiya Senaquerib quiijcuilo sequinoc amatlajcuiloli campa quitlaijilhuiyaya TOTECO Dios tlen toTeco tiisraelitame huan quiijtohuayaya quej ni: "Queja ininteteyohua nopa tlacame ipan sequinoc tlaltini ax huelque quinmanahuijque tlen nochicahualis, queja nopa nojquiya yajaya tlen iTeco o iDios Ezequ'ias ax huelis quinmanahuis itlacajhua tlen na nochicahualis." 18Huan itlatequipanojcahua Senaquerib tlen quihualicayayaj nopa amatlajcuiloli, tzajtzique chicahuac nochi ya ni ipan tlajtoli hebreo para quinmajmatise nopa israelitame tlen itztoyaj iixco nopa tepamitl tlen quiyahualo altepetl Jerusal'en para huelis nimantzi quincuilise nopa altepetl. 19Huan itlatequipanojcahua quitlaijilhuijque Toteco Dios tlen iaxca altepetl Jerusal'en queja elisqu'ia se tlaixcopincayotl tlen nopa sequinoc tlaltini tlen quinmachijchijtoque tlacame. 20Pero Tlanahuatijquetl Ezequ'ias huan nopa tiocamanalojquetl Isa'ias, tlen icone Amoz, momaijtojque huan quitlajtlanijque TOTECO ipan elhuicac ma quinpalehui. 21Huajca TOTECO quititlanqui se elhuicac ejquetl tlen quinmictico nochi nopa soldados tlen tlali Asiria ica inintlayacancahua huan nochi inintequichijcahua. Queja nopa Senaquerib mocuepqui ipan itlal ica miyac pinahualistli. Huan quema ajsito huan calajqui ipan itiopa idios, nopona iconehua quimictijque ica machete. 22Huajca queja nopa TOTECO quimanahui Ezequ'ias huan nochi Jerusal'en ehuani tlen ichicahualis Senaquerib, tlanahuatijquetl tlen tlali Asiria. Huan quinmanahui tlen nochi nopa tlacame tlen hualajtoyaj ihuaya para quintehuise. Huan TOTECO quimacac tlasehuilistli Ezequ'ias huan itlacajhua huan niyon se icualancaitaca ax quicuatotoni. 23Huan teipa nochi tlacame tlen nochi tlaltini nopona nechca tlahuel quitlepanitayayaj Tlanahuatijquetl Ezequ'ias. Huan miyac tlacame tlen campa hueli quihuicaque tlacajcahualistli para TOTECO ipan Jerusal'en. Huan nojquiya quihuiquiliyayaj Ezequ'ias miyac tlamantli tlen patiyo. 24Teipa pejqui tlahuel mococohua Ezequ'ias ica se cocolistli tlen nel'ia fiero huan ya itztoya para miquis. Pero yajaya momaijto huan quitlajtlani TOTECO ma quichicahua huan TOTECO quitlacaquili. Quichicajqui huan nojquiya para se tlanescayotl para nel'ia mochicahuas, quichihuili se hueyi chicahualis nescayotl. 25Pero yonque quiseli tlen cuali, Ezequ'ias ax quitlascamatili TOTECO niyon ax moicnonejqui iixpa TOTECO. Yajaya tlahuel mohueyimatqui ipan iyolo. Huajca Toteco nel'ia cualanqui ihuaya Ezequ'ias huan ica nochi tlen ehuani ipan Jud'a huan ipan Jerusal'en. 26Huan teipa Ezequ'ias moicnonejqui iixpa TOTECO huan ayoc mohueyimatqui. Nojquiya moicnonejque nopa Jerusal'en ehuani huan yeca TOTECO quiijto para ax quintlatzacuiltis quema Ezequ'ias noja itztoya. 27Huan Tlanahuatijquetl Ezequ'ias nel'ia moricojchijqui huan nochi tlacame campa hueli quitlepanitayayaj. Quipixqui miyac tlamantli tlen plata, oro huan miyac piltetzitzi tlen pajpatiyo. Nojquiya quipixqui miyac tlaajhuiyacayome huan yolixtzajcayotl tlen tepostli huan miyac sequinoc tlamantli tlen tlahuel pajpatiyo. 28Huan nojquiya quichijqui miyac caltini para ipan quiajcocuis trigo, xocomeca atl huan aceite. Huan quichijqui nojquiya miyac caltini para nochi itlapiyalhua huan miyac tlatzactli para iborregojhua huan ichivojhua. 29Huan nojquiya quichijqui miyac altepetini huan quinpixqui miyac huacaxme, huan borregojme pampa Toteco Dios nel'ia quitiochijqui miyac. 30Huan elqui Ezequ'ias tlen quitzajqui nopa atl tlen quisayaya ipan Gih'on huan quiojti tlalijtic ipan se tubo para quisas iquespa Ialtepe David para campa calaqui tonati. Huan queja nopa nochi tlen Ezequ'ias quichijqui, quisqui cuali. 31Pero quema tlacame tlen tlali Babilonia hualajque quipaxalocoj para quimatise quejatza panotoya nochi nopa huejhueyi tlamantli ipan itlal, Toteco Dios quicahuili para ma quichihuas tlen quipinahualtis para quiyejyecos Ezequ'ias huan quinextis tlaque eltoc ipan iyolo. 32Huan nochi sequinoc tlamantli tlen quichijqui Ezequ'ias eltoc ijcuilijtoc ipan Nopa Amatlapohuali tlen Quiijcuilo Nopa Tiocamanalojquetl Isa'ias, icone Amoz, huan ipan Nopa Amatl tlen Tlanahuatiani tlen Tlali Jud'a huan tlen Tlali Israel. 33Huan quema mijqui Ezequ'ias quitlalpachojque campa quintlalpachojtoyaj itatahua tlen tlanahuatiani. Huan quitlalpachojque campa m'as nesiyaya ipan campo santo. Huan nochi tlacame tlen Jud'a huan Jerusal'en quinextilijque Ezequ'ias miyac tlatlepanitacayotl quema mijqui. Huan icone tlen itoca Manas'es pejqui tlanahuat'ia ipan tlali Jud'a.

will be added

X\