2 Chronicles 22

1Huajca nopa tlacame tlen altepetl Jerusal'en quichijque Ocoz'ias, icone Joram tlen teipa ejquetl, para ma eli inintlanahuatijca ipan tlali Jud'a. San yajaya mocajqui yoltoc quema nopa 'arabes tlen san nejnemiyayaj campa hueli hualajtoyaj huan quinmictijque nochi iicnihua tlen achtohui ehuani. Huajca Ocoz'ias, icone Joram, elqui tlanahuatijquetl tlen Jud'a. 2Huan Ocoz'ias quipiyayaya 22 xihuitl quema pejqui tlanahuat'ia huan san tlanahuati se xihuitl ipan altepetl Jerusal'en. Inana itoca eliyaya Atal'ia huan eliyaya iixhui Tlanahuatijquetl Omri tlen tlali Israel. 3Huan Ocoz'ias quichijqui tlen fiero queja Tlanahuatijquetl Acab quichijtoya pampa inana quitlalnamicti ma quichihua tlen fiero. 4Quena, Ocoz'ias quichijqui tlen fiero iixpa TOTECO queja quichijqui Tlanahuatijquetl Acab pampa quema mijqui itata Ocoz'ias, inijuanti tlen ichan ehuani Acab quiconsejomacayayaj para ma quichihua tlen fiero. Huan quihuicaque ipan se ojtli tlen ax cuali. 5Huan Ocoz'ias quintlacaquili ichan ehuani Acab huan mosejcotili ihuaya Tlanahuatijquetl Joram tlen tlali Israel tlen elqui icone Acab. Huan yajqui quitehuitoj Hazael. Hazael elqui tlanahuatijquetl tlen tlali Siria huan itztoya ipan altepetl Ramot ipan tlali Galaad. Pero nopa Siria tlacame tlahuel quicocojque Tlanahuatijquetl Joram ipan nopa tlatehuijcayotl. 6Huan Tlanahuatijquetl Joram mocuepqui altepetl Jezreel para mopajtis pampa tlahuel quicocojque ipan nopa tlatehuijcayotl tlen oncac ipan Ramot ica nopa tlanahuatijquetl tlen tlali Siria. Huan Tlanahuatijquetl Ocoz'ias yajqui altepetl Jezreel para quipaxaloti Joram. 7Pero Toteco Dios ya quisencajtoya ma miqui Tlanahuatijquetl Ocoz'ias quema yasqu'ia quipaxaloti Tlanahuatijquetl Joram. Huan quema ajsito Ocoz'ias nopona campa Joram, nimantzi quisqui ihuaya para quitehuitij Jeh'u, icone Nimsi. Pero TOTECO ya quitlapejpenijtoya Jeh'u para quintzontlamiltis nochi iixhuihua nopa mijcatzi Tlanahuatijquetl Acab para axaca ica ieso mocahuasqu'ia para tlanahuatis. 8Huajca Jeh'u quintemojtinemiyaya nochi iixhuihua Acab para quinmictis. Huan quinpanti nopa tlayacanani tlen tlali Jud'a ininhuaya sequin iteixmatcahua Tlanahuatijquetl Ocoz'ias, pampa nojquiya yajtoyaj ihuaya ipan nopa tlatehuijcayotl. Huajca Jeh'u nochi quinmicti. 9Huan Jeh'u quinilhui isoldados ma quitemotij Tlanahuatijquetl Ocoz'ias tlen Jud'a. Huan quipantitoj motlatijtoc ipan altepetl Samaria. Huajca quiitzquijque huan quihuicaque iixpa Jeh'u huan yajaya quimicti. Huan quitlalpachoto Tlanahuatijquetl Ocoz'ias ipan Ialtepe David campa quintlalpachojtoyaj sequinoc tlanahuatiani pampa yajaya elqui iixhui Tlanahuatijquetl Josafat tlen ica nochi iyolo motemachi ipan TOTECO. Huan axaca tlen mocajqui tlen iteixmatca Ocoz'ias quipixqui fuerza para mochihuas tlanahuatijquetl ipan tlali Jud'a. 10Huan quema Atal'ia, inana Tlanahuatijquetl Ocoz'ias, quimatqui para ya mijqui, quinejqui quintzontlamiltis nochi iconehua tlen quipiyayayaj tlanahuatili para teipa huelis tlanahuatise ipan tlali Jud'a. 11Pero Josabet tlen eliyaya iichpoca Tlanahuatijquetl Joram quicuito Jo'as, ipilcone Ocoz'ias, huan quiiyocatlali tlen nopa iconehua Tlanahuatijquetl Ocoz'ias tlen inana quinmictiyaya. Huan quitlati nopa pilconetzi ihuaya se sihua tequipanojquetl ipan se cuarto. Huan queja nopa quimanahuijque Jo'as huan ax quimictijque. Josabet eliyaya iichpoca mijcatzi Tlanahuatijquetl Joram huan iicni Ocoz'ias, huan eliyaya isihua nopa totajtzi Joiada. 12Huan queja nopa quitlatijque Jo'as ipan se cuarto ipan itiopa Toteco Dios para chicuase xihuitl ipan nochi nopa tonali quema nopa sihuatl Atal'ia tlanahuatiyaya ipan tlali Jud'a.

will be added

X\