2 Chronicles 14

1Huan mijqui Ab'ias huan quitlalpachojque ica ihueyi tatahua ipan Ialtepe David. Huan icone tlen itoca Asa pejqui tlanahuat'ia ipan tlali Jud'a. Huan oncac tlasehuilistli ipan nopa achtohui 12 xihuitl tlen itequi queja tlanahuatijquetl. 2Huan Tlanahuatijquetl Asa quichijqui nochi tlen xitlahuac iixpa TOTECO Dios tlen elqui iTeco. 3Quinijcueni nochi nopa tlaixpamitl campa quintlatiliyayaj tlacajcahualistli nopa tlaixcopincayome ipan tepetini. Quintlapanqui nochi nopa teteyome huan nojquiya nochi tlamantli tlen teilnamiquilti tlen nopa tiotzi Asera. 4Huan nojquiya quinnahuati nochi Jud'a ehuani ma motemachica ipan TOTECO Dios tlen eliyaya ininTeco ininhuejcapan tatahua. Huan quinilhui ma quichihuaca nochi itlanahuatilhua TOTECO huan nochi tlen titechilhuijtoya. 5Huan ipan nochi altepetini ipan tlali Jud'a, quinijcueni nochi pilcaltzitzi para tiotzitzi huan nochi tlaixpamitl para quintlatil'iaj copali. Huan oncac tlasehuilistli para miyac xihuitl quema Asa tlanahuatiyaya. 6Huan quema oncayaya tlasehuilistli huan inincualancaitacahua ax quintehuiyayaj, Tlanahuatijquetl Asa quicualtlali nochi inintepa altepetini ipan Jud'a pampa TOTECO quinmacatoya tlasehuilistli. 7Tlanahuatijquetl Asa quinilhui nopa Jud'a ehuani: "Ma tiquincualtlalica nochi ni altepetini huan ma tiquinyahualoca ica tepamitl. Ma tiquinchihuilica torres huan ma tiquintlalilica puertas tlen motzacuas cuali ica tepostli. Timotemachijtoque ipan Toteco Dios huan ama yajaya techmacatoc tlasehuilistli ica tocualancaitacahua tlen campa hueli tlaltini." Huan Jud'a ehuani quichijque nochi nopa tequitl tlen moilhuijque quichihuase huan nochi quisqui cuali. 8Huan Asa quinpixqui 300 mil soldados tlen tlali Jud'a huan nochi quipixtoyaj ininyolixtzajcahua huan inincuatlaminhua tlen huehueyac huan tlen tlasencahuali tlen tepostli. Nojquiya quipixtoya seyoc pamitl tlen 280 mil soldados tlen ejque ipan tlali Benjam'in huan nochi quihuicayayaj ininyolixtzajcahua huan inincuahuitolhua. Huan nochi ome pamitl eliyayaj tlacame tlen tlahuel yolchicahuaque. 9Se tonali hualajqui se tlacatl tlen tlali Etiop'ia tlen itoca Zera huan quinhualicac se mill'on soldados huan 300 tlatehuijca carros. Huan inijuanti ajsicoj hasta altepetl Maresa para quintehuise tlali Jud'a ehuani huan Tlanahuatijquetl Asa. 10Pero quema Asa momacac cuenta para ajsicoj, mocualtlali huan quisqui ica nochi isoldados para quinnamiquiti. Huan mochijque ipan nopa tlamayamitl Sefata nechca Maresa. 11Huan Asa momaijto ica TOTECO Dios tlen elqui iTeco huan quiilhui: "TOTECO, san ta hueli tiquinpalehu'ia tlen ax quipiyaj chicahualistli para monamiquise ica tlen nel'ia chicahuac. Huajca xinechpalehui TOTECO Dios, ta tlen toTeco, pampa tojuanti timosiyajcahuaj ipan ta. Ica motequiticayo ta tiyohuij tiquintehuitij ni miyac soldados pampa ipan ta timotemachijtoque. TOTECO Dios, ta titoTeco. Amo xiquincahuili para tlen itztoque san tlacame mitztlanise." 12Huajca TOTECO pejqui quinmict'ia nopa Etiop'ia ehuani iixpa Asa huan iixtla nochi Jud'a ehuani. Huan nopa Etiop'ia ehuani cholojque. 13Pero Asa huan isoldados quintoquilijque hasta altepetl Gerar ipan tlali filisteo huan quinmictijque tlahuel miyac inijuanti hasta ayoc huelque tlatehuijque pampa TOTECO huan isoldados quintzontlamiltijque. Huan nopa Jud'a ehuani quincuilijque miyac tlamantli tlen nelcuali. 14Huan teipa Asa huan isoldados nojquiya calajque ipan nochi nopa altepetini tlen eliyaya nechca Gerar huan quiquixtijque miyac tlamantli pampa TOTECO quichijqui para nochi tlacame nopona tlahuel ma momajmatica ipampa tlen TOTECO quichijtoya. 15Nojquiya nopa Jud'a ehuani calajque campa quinpixtoya ininhuacaxhua huan quinhuicaque miyac borregojme huan camellos huan mocuepque altepetl Jerusal'en ica nochi tlen quitlantoyaj.

will be added

X\