2 Chronicles 12

1Huan quema Roboam mohueyichijqui huan ya eltoya temachtli ipan itequi queja tlanahuatijquetl, quitlahuelcajqui itlanahuatilhua TOTECO huan nochi israelitame quitoquilijque ipan itlajtlacol. 2Huan pampa mosisinijtoya ica TOTECO, Sisac, nopa tlanahuatijquetl tlen tlali Egipto yajqui quintehuito israelitame ipan altepetl Jerusal'en quema Roboam yahuiyaya para macuili xihuitl ipan itequi queja tlanahuatijquetl. 3Huan Sisac hualajqui ica mil 200 tlatehuijca carros, 60 mil soldados tlen yahuiyayaj ipan cahuajme huan iyoca tlahuel miyac soldados tlen icxinejnemiyayaj. Nojquiya quinhualicac miyac m'as tlacame tlen inintoca libios, suquienos huan eti'opes. 4Huan Sisac huan isoldados calajque ipan nopa altepetini tlen quipixtoyaj tepamitl ipan tlali Jud'a huan quintlanque huan teipa ajsitoj hasta altepetl Jerusal'en. 5Huan nopa tiocamanalojquetl Sema'ias yajqui quiitato Tlanahuatijquetl Roboam huan nopa tlayacanani tlen Jud'a pampa nochi inijuanti mosentilijtoyaj ipan altepetl Jerusal'en para momanahuise tlen Sisac. Huan Sema'ias quinilhui nopa tlajtoli tlen TOTECO quimacatoya. Quinilhui: --Imojuanti inquitlahuelcajtoque TOTECO huan yeca yajaya quiijtohua para nojquiya inmechtlahuelcahuas huan inmechtemactilis imaco Sisac. 6Huajca nochi nopa tlayacanani tlen israelitame huan Tlanahuatijquetl Roboam moicnonejque huan quiijtojque: --Nel'ia xitlahuac TOTECO para quej ni tinechchihuilis. 7Huan quema TOTECO quiitac para nel'ia moyolcueptoyaj, quiilhui nopa tiocamanalojquetl Sem'ias: "Pampa moicnonectoque, ax nijcahuilis Sisac senquistoc ma quintzontlamilti. Ica se quentzi tonali niquinmanahuis. Huan ax nijtequihuis Sisac para quinnextilis nochi nocualancayo. 8Pero inijuanti quitequipanose Sisac para momacase cuenta para m'as cuali nechtequipanose na, huan ax quintequipanose nopa tlanahuatiani ipan sequinoc tlaltini." 9Huan Sisac, tlanahuatijquetl tlen tlali Egipto, calajqui altepetl Jerusal'en huan quicuic nochi tlamantli tlen oro huan nochi tlamantli tlen pajpatiyo tlen eltoya ipan ichaj TOTECO huan tlen eltoya ipan nopa caltlanahuatili. Nojquiya quihuicac nochi nopa yolixtzajcayotl tlen oro tlen quichijtoya Salom'on. 10Huan teipa Roboam, tlanahuatijquetl tlen tlali Jud'a quichijqui sequinoc yolixtzajcayotl tlen bronce huan quinmactili nopa tlayacanani tlen soldados tlen tlamocuitlahuiyayaj ipan ipuertas nopa caltlanahuatili. 11Huan nochipa quema nopa tlanahuatijquetl yahuiyaya ichaj TOTECO, nopa soldados yahuiyayaj ihuaya huan quinhuicayayaj nopa yolixtzajcayotl tlen bronce. Huan teipa quema mocuepayaya sampa quinhualicayayaj nopa yolixtzajcayotl huan quinajcocuiyayaj ipan nopa cuarto campa quiajcocuij nochi inintlatehuijca teposhua. 12Huan pampa nopa tlanahuatijquetl nel'ia moicnonejqui TOTECO ayoc cualanqui ihuaya huan ax senquistoc quintzontlamilti. Huan teipa yonque miyac tlamantli tlen fiero quinpanti tlen itztoyaj ipan Jud'a, sampa oncac tlamantli cuali nopona. 13Huan Tlanahuatijquetl Roboam sampa mohueyichijqui huan quichijqui temachtli sampa ipan itequi queja tlanahuatijquetl ipan altepetl Jerusal'en. Roboam quipixqui 41 xihuitl quema pejqui itequi tlen tlanahuatijquetl huan tlanahuati 17 xihuitl ipan Jerusal'en, nopa altepetl tlen TOTECO quitlapejpeni tlen nochi altepetini tlen nopa huejhueyi familias tlen israelitame para nopona nochi ma quihueyichihuaca para nochipa. Huan inana Roboam itoca eliyaya Naama huan hualajqui tlen tlali Am'on. 14Pero Roboam elqui se tlanahuatijquetl tlen ax cuali pampa ax motemacac para quitoquilis TOTECO ica nochi iyolo. 15Huan nochi tlen quichijqui Roboam tlen ipejya huan hasta quema mijqui eltoc ijcuilijtoc ipan nopa amatlapohuali tlen quiijcuilo tiocamanalojquetl Sema'ias, huan tlen quiijcuilo tiocamanalojquetl Iddo huan campa eltoc ijcuilijtoc quejatza tlacame tlacajtihualajque. Huan ipan nochi xihuitl tlen itequi Roboam oncac miyac tlatehuijcayotl ica Tlanahuatijquetl Jeroboam ica norte. 16Huajca mijqui Roboam huan mosiyajcajqui ica ihueyi tatahua. Huan quitlalpachojque ipan Ialtepe David. Huan Ab'ias, icone, mochijqui tlanahuatijquetl.

will be added

X\