1 TESALONICENSES 1

1Na niPablo, ininhuaya Silvano huan Timoteo, timechtlajcuilhu'iaj imojuanti ipan nopa tiopamitl tlen tlaneltocani ipan altepetl Tesal'onica. Intlatzquijtoque ipan Toteco Totata huan ipan Toteco Jesucristo. Toteco ma quipiya hueyi iyolo ica imojuanti huan ma inmechmaca tlasehuilistli. 2Ajachica tijtlascamatij Toteco imopampa imojuanti huan tijtlajtlan'iaj ma inmechtiochihua. 3Nochipa quema timomaijtohuaj ica Toteco Totata ipampa imojuanti, tiquilnamiquij quejatza intequitij chicahuac pampa inquineltocaj, huan quejatza inquitequipanohuaj pampa inquiicnel'iaj, yonque tlahuel insiyahuij. Tiquilnamiquij nojquiya quejatza mojmostla inquichiyaj para sampa hualasoc Tohueyiteco Jesucristo. 4Toicnihua, tijmatij para temachtli Toteco inmechicnel'ia huan inmechtlapejpenijtoc para inelise iniaxcahua. 5Huan quema titlacamanalojque nopa cuali tlajtoli campa imojuanti, ax san timechilhuiyayaj tlajtoli tlen ax ipati. Timechilhuijque itlajtol Toteco huan nopa tlajtoli quipixqui chicahualistli pampa Itonal Toteco inmechnextiliyaya ipan imoyolo para tlen tiquijtojque nel'ia elqui melahuac. Huan inquimatij tonemilis quema tiitztoyaj nepa imohuaya inmechnextili para melahuac totlajtol, pampa tijnequiyayaj xijneltocaca Toteco. 6Huan intechtoquilijque tlen tojuanti tijchijtoque huan tlen Tohueyiteco quichijqui, pampa yonque inmechtlaijiyohuiltiyayaj sequinoc tlacame, inquiselijque itlajtol Toteco ica paquilistli tlen Itonal Toteco inmechmacac. 7Huan yeca inquinnextilijtoque nochi tlaneltocani ipan tlali Macedonia huan ipan tlali Acaya tlen cuali para nojquiya quichihuase. 8Huan tlen imojuanti, ax san mosemoyajtoc itlajtol Toteco ipan tlaltini Macedonia huan Acaya, ama yajtoc hasta tlacame ipan campa hueli tlali, pampa campa hueli quitlacaquilijtoque quejatza ica nochi imoyolo inquineltocaj Toteco. Yeca ayoc monequi tiquinilhuise tlen imojuanti, 9pampa nopa tlacame ininseltitzitzi techpohuil'iaj tlen quicactoque para panoc quema timechpaxalojque. Techilhu'iaj quejatza inmoyolpatlaque huan inquincajque inquinhueyichihuaj nopa totiotzitzi tlen tlacame quinchijtoyaj ica ininma, huan pejqui inquitequipanohuaj Toteco tlen itztoc huan tlen temachtli. 10Huan techilhu'iaj quejatza ama inquichiyaj para Jes'us, icone Toteco, sampa ma huala tlen elhuicac. Quena, Toteco Dios quiyoliti Jes'us quema mictoya, huan yajaya Jes'us tlen techmanahu'ia para ax techajsis ihueyi cualancayo Toteco tlen teipa monextis.

will be added

X\