1 Samuel 9

1Itztoya se tlacatl ipan iixhuihua Benjam'in tlen itoca eliyaya Cis. Yajaya nel'ia tominpiyayaya huan nochi quitlepanitayayaj. Huan Cis elqui icone Abiel, tlen elqui icone Zeror. Huan Zeror huejcajquiya elqui icone Becorat tlen elqui icone Af'ia tlen eliyaya se iixhui Benjam'in. 2Huan Cis quipixtoya se icone tlen itoca eliyaya Sa'ul. Huan Sa'ul eliyaya se telpocatl yejyectzi, huan niyon se telpocatl ax quiaxiliyaya iyejca huan itlachiyalis ipan nochi tlali Israel. Huan Sa'ul eliyaya huejcapantic. Nochi sequinoc tlacame san quiaxiliyaya campa iajcolpa. 3Huan se tonal Cis quinpolo iburrojhua huan quititlanqui itelpoca Sa'ul ihuaya se itlatequipanojca ma quintemotij. 4Huan inijuanti nejnentiyajque campa tepetini ipan tlali Efra'in, huan teipa panotoj tlali Salisa, huan ax quinajsique. Huan panotiyajque nojquiya ipan tlali Saalim huan teipa ipan tlali Benjam'in, huan ax cana quinajsique. 5Huan quema ajsique ipan tlali Zuf huan ax quinajsique, huajca Sa'ul quiilhui itlatequipanojca tlen ihuaya nemiyaya: --Ya ma timocuepaca para tochaj pampa huelis notata ya mocuesojtos topampa tojuanti, huan ayoc san mocuesojtos por iburrojhua tlen polijtoque. 6Huajca itlatequipanojca quinanquili: --Nica ipan ni altepetl itztoc se tiocamanalojquetl tlen nochi quitlepanitaj pampa nel'ia mochihua nochi tlen quiijtohua. Ma tiquitatij pampa huelis techilhuis canque itztoque nopa burrojme. 7Huajca Sa'ul quiilhui: --Cualtitoc, ma tiyaca. ¿Pero tlaque huelis tijhuiquilise nopa tlacatl? Ax tleno tijpiyaj. Ya tlanqui topantzi, huan ax tleno onca, huajca ¿tlaque tijmacatij nopa tiocamanalojquetl? 8Huan itlatequipanojca quiilhui: --Nijpixtoc se pilplata tomintzi tlen huelis tijmacase nopa tiocamanalojquetl para ma techilhui canque itztoque nopa burrojme. 9(Achtohuiya quema se quinequiyaya quimatis se tlenijqui huajca quiijtohuayayaj: "Ma tiquitatij yajaya tlen tlachiya"; pampa tlen ama itoca Tiocamanalojquetl, achtohuiya quintocajtiyayaj Tlachiyani.) 10Huajca Sa'ul quiilhui itlatequipanojca: --Cualtitoc, ma tiyaca tijtemotij. Huajca calajque ipan nopa altepetl campa itztoya nopa tiocamanalojquetl. 11Huan quema ixtlejcotiyahuiyayaj ipan se tepetl, quinnamijque se quesqui ichpocame tlen yajtoyaj atlacuitoj, huan quintlajtlanijque: --¿Nica itztoc nopa tlen tlachiya? 12Huan inijuanti tlananquilijque: --Quena, pero ximoisihuiltica xiyaca pampa amantzi onajsico ipan ni altepetl para quimacase TOTECO tlacajcahualistli ipan se tepetl para tlacame tlen ni altepetl. 13San quema incalaquise ipan altepetl, nimantzi xijtemoca pampa huelis nimantzi quisas para yas campa tepetl para tlacuas. Pampa nopa tlacame ax tlacuase hasta quema ajsiti pampa yajaya tlen quitiochihuas nopa tlacajcahualistli huan teipa tlacuase nopa tlanotzalme. Huajca xiisihuica xitlejcoca para inquipantise. 14Huajca Sa'ul huan itlatequipanojcahua ixtlejcoque ipan nopa tepetl huan ajsitoj ipan nopa altepetl. Huan quema sanoc onajsitoyaj quinamijque Samuel tlen quistihualayaya para yasqu'ia ipan nopa tepetl campa oncasqu'ia tlacualistli. 15Huan TOTECO ya quinojnotztoya Samuel se tonal achtohuiya, huan quiilhuijtoya: 16"Mostla ipan ni hora nimitztitlanilis se tlacatl tlen ehua tlali Benjam'in. Yajaya tlen ticajaltis para elis inintlanahuatijca notlacajhua nopa israelitame. Huan quinmanahuis israelitame ininmaco nopa filisteos, pampa niquintlachilijtoc quejatza tlaijiyohu'iaj notlacajhua huan niquincactoc quejatza nechtlajtlan'iaj tlapalehuili huan yeca niquintlasojtlatoc." 17Huan quema Samuel quiitac Sa'ul, TOTECO quinojnotzqui Samuel huan quiilhui: "Nopona tijpixtoc nopa tlacatl tlen yalhuaya nimitzilhui. Yajaya tlen quinnahuatis noisraelita tlacajhua." 18Huan Sa'ul monechcahui campa itztoya Samuel ipan cuapuerta ipan itepa nopa altepetl, huan quiilhui: --Nimitztlajtlan'ia xinechilhui canque eltoc ichaj yajaya tlen tlachiya. 19Huan Samuel quinanquili: --Na ninopa tlen tlachiya. Xitlejco nohuaya ipan ne tepetl, huan titlacuase san sejco. Huan mostla cualca nimitzilhuis nochi tlen tijnequi tijmatis huan teipa nimitznahuatijtehuas. 20Huan amo ximocueso ipampa nopa burrojme tlen polijque huiptlaya pampa ya quinajsique. Huan nojquiya ama nochi israelitame motemachise ipan ta huan mochaj ehuani motata, huan moaxca elis nochi tlen ipati ipan tlali Israel. 21Huan Sa'ul tlananquili: --Pero na nihuala tlen nopa hueyi familia Benjam'in tlen achi m'as pilsiltzi tlen nochi huejhueyi familias ipan tlali Israel, huan axaca techita para tiipatij. Huajca ¿para tlen tinechilhu'ia nochi ya ni? 22Huajca Samuel quihuicac Sa'ul ihuaya itlatequipanojca huan quincalaqui ipan nopa hueyi cali para nopa ilhuitl campa tlacualtlalijtoyaj para tlacuase. Huan quinsehui campa m'as cuali siya iniixpa nopa 30 huejhueyi tlacame tlen mosehuijtoyaj nopona. 23Huan nimantzi Samuel quinahuati ya tlen quintlacualtequiliyaya: --Xijhualica nopa nacatl tlen achi cuali tlen nimitznahuati para xiquiyocaquixti. 24Huajca nopa tlacualchijquetl quihualicac imetztomahuiya nopa tlapiyali tlen eliyaya san nacatl huan quitlali iixpa Sa'ul. Huan Samuel quiilhui: --Ximonechcahui huan xijcua pampa ni nacatl niquiyocaquixtijtoya para ta tijcuas quema aya niquinnotztoya nochi ni tlanotzalme. Huan nopa tonal Sa'ul tlacuajqui ihuaya Samuel. 25Huan quema tlanque tlacuaj, mocuepque sampa ipan nopa altepetl huan Samuel quihuicac Sa'ul ichaj, huan quihuicac calpani tlen ichaj. Huan nopona Samuel quipohuili Sa'ul nochi tlen panosqu'ia. 26Huan Sa'ul cochqui ipan ichaj Samuel huan hualmostla nelcualca Samuel quiixiti Sa'ul huan quiilhui: --Ximehuaya pampa ajsic hora para tiyas. Huan Sa'ul mejqui huan Samuel yajqui ihuaya para quicahuati itenpa altepetl. 27Huan quema temotiyohuiyayaj campa itepa nopa altepetl Samuel quiilhui Sa'ul: --Xiquilhui motlatequipanojca para ma tlayacana huan ta ximochiya se quentzi pampa monequi nimitzyolmelahuas tlen Toteco Dios nechilhuijtoc.

will be added

X\