1 Samuel 3

1Huan nopa piloquichpiltzi Samuel quipalehuiyaya El'i huan quej nopa quitequipanohuayaya TOTECO. Huan ipan nopa tonali ax m'as TOTECO quinnojnotzayaya tlacame para quinilhuis se tlajtoli. Ax ajachica quincamahuiyaya queja achtohuiya. 2Huan El'i ya eliyaya nelhuehuentzi huan ya popoyotiyaya. Huan se tonal El'i mosiyajcajtoya ipan ichaj, 3huan Samuel cochtoya ipan itiopa TOTECO campa icaxa Toteco Dios. Huan tlajco yohual quema nopa tlahuili tlen tiopan calijtic noja tlahuijtoya, 4TOTECO quinojnotzqui Samuel: --¡Samuel! Huan Samuel tlananquili: --Nica niitztoc. 5Huan nimantzi mejqui huan yajqui quiitato El'i huan quiilhui: --Nica niitztoc. ¿Para tlen tinechnotztoc? Huan El'i quinanquili: --Na ax nimitznotztoc. Xiya ximotecati sampa. Huajca Samuel sampa motecato. 6Huan TOTECO sampayano quinojnotzqui huan quiijto: --¡Samuel! Huan Samuel sampa yajqui quiitato El'i huan quiilhui: --Nica niitztoc. ¿Para tlen tinechnotztoc? Huajca El'i quinanquili: --Na ax nimitznotztoc. Xiya ximotecati sampa. 7Huan Samuel aya quiixmatiyaya TOTECO pampa ax quema quinojnotztoya. 8Huan TOTECO sampa quinojnotzqui Samuel ica expa, huan sampa Samuel yajqui quiitato El'i huan quiilhui: --Nica niitztoc. ¿Tlaque tijnequi ma nijchihua? Huajca El'i quimachili para eliyaya TOTECO tlen quinojnotzayaya Samuel, 9huajca quiilhui: --Xiya huan ximoteca. Huan intla sampa mitznojnotzas, huajca xiquijto: 'TOTECO, xinechilhui tlaque tijnequi pampa nimotlatequipanojca huan nimitzcactoc.' Huajca queja nopa Samuel yajqui huan motejqui sampa. 10Huan TOTECO hualajqui sampa, huan moquetzqui nopona huan quinojnotzqui queja achtohuiya. Huan quiilhui: --¡Samuel, Samuel! Huajca Samuel quinanquili: --TOTECO, xinechilhui tlaque tijnequi pampa nimotlatequipanojca huan nimitzcactoc. 11Huajca TOTECO quiilhui Samuel: --Xiquita, nijchihuas se tlamantli ipan tlali Israel, huan aqui quicaquis hasta itlacaquilis quicocos. 12Nijchihuas nochi tlamantli fiero tlen niquilhuijtoc El'i para nijchihuas ica ichaj ehuani. 13Niquilhuijtoc para niquintlatzacuiltis nochi ichaj ehuani para nochipa ipampa inintlajtlacol itelpocahua tlen ya quimati. Itelpocahua nechahuilmajtoque huan yajaya ax quintlacahualtijtoc. 14Huan ya niquilhuijtoc El'i para ax quema niquintlapojpolhuis nopa tlajtlacoli tlen quichijtoque yonque nechmacase miyac tlacajcahualistli o ofrendas para ma nimoyoltlali. 15Teipa Samuel motejqui sampa hasta tlanesqui. Huan huajca mejqui huan caltlapo ipan tiopamitl queja momajtoya quichihua nochipa, pero majmahuiyaya quipohuilis El'i tlen TOTECO quiilhuijtoya. 16Pero El'i quinotzqui huan quiilhui: --¡Nocone, Samuel! Huajca Samuel quinanquili: --Nica niitztoc. 17Huajca El'i quiilhui: --¿Tlaque mitzilhuijtoc Toteco Dios? Nimitztlajtlan'ia para ax tinechtlatili niyon tleno tlen TOTECO mitzilhuijtoc. Intla tinechtlatilis tlenijqui, ma TOTECO mitztlatzacuilti. 18Huajca Samuel quiilhui El'i nochi tlen TOTECO quiilhuijtoya huan ax tleno quitlatili. Huajca El'i quiilhui: --Yajaya TOTECO tlen mitznojnotztoc. Ma quichihua tlen yaja quiita para cuali quichihuas. 19Huan Samuel moscaltijtiyajqui huan TOTECO itztoya ihuaya huan quipalehuiyaya. Huan panoc nochi nopa tlajtoli tlen TOTECO quiilhuijtiyajqui Samuel para teyolmelahuas. 20Huan nochi israelitame tlen tlali Dan ica huejcapa huan hasta altepetl Beerseba ica tlatzintla quimatque para nel'ia Samuel eliyaya se itiocamanalojca TOTECO tlen itztoc xitlahuac. 21Huan TOTECO monextijtinenqui iixpa Samuel ipan altepetl Silo para ma quiixmati. Huan quimacayaya tlajtoli para teyolmelahuas.

will be added

X\