1 Samuel 29

1Huan nochi nopa filisteo soldados mosentilijque ipan se lugar tlen itoca Afec. Huan nopa israelitame mochijtoyaj nechca nopa ameli tlen itoca Jezreel. 2Huan nopa filisteos moxelojtoyaj ininsoldados ica pamitl. Sequin pamitl quipixqui 100 tlacame huan sequin ica se mil huan tlayacantiyahuiyayaj. Huan David huan itlacajhua yohuiyayaj iniica ihuaya Tlanahuatijquetl Aquis. 3Huan nopa tlayacanca filisteos quiilhuijque Tlanahuatijquetl Aquis: --¿Tlaque quichihuaj nica ni tlacame hebreos? Huan Aquis quinanquili: --Ya ni David tlen eliyaya itlatequipanojca Tlanahuatijquetl Sa'ul tlen tlanahuat'ia ipan tlali Israel. Yajaya quipiya se xihuitl itztoc nohuaya huan ax quema nijpantilijtoc niyon se itlaixpanol. 4Pero nopa tlayacanani tlen soldados cualanque ihuaya Tlanahuatijquetl Aquis huan quiilhuijque: --Xijnahuati ni tlacatl ma mocuepa ipan nopa altepetl tlen tijmacatoc. Ma ax yohui tohuaya ipan ni tlatehuicajyotl pampa nopona moyolcuepas huan quinequis techtehuis tojuanti quema ya tiitztose ipan nopa tlatehuicajyotl. Huan iteco Sa'ul quinequis quiselis sampa. Huan intla techmictis huan quinextilis Sa'ul totzonteconhua, huajca ¿ax timoilhu'ia Sa'ul quiselisqu'ia? 5Yajaya David tlen quihuicatiyayaj huan quiijtohuayayaj: 'Mil tlacame quinmicti Sa'ul, pero majtlactli mil quinmicti David.' 6Huajca Aquis quinotzqui David huan quiilhui: --Nimitzilhu'ia iixpa TOTECO para nel'ia tijchihua tlen xitlahuac huan se paquilistli para na para titlatehuiti tohuaya. Ipan ne tonal quema tihualajqui tinechitaco huan hasta ama ax quema nimitzpantilijtoc niyon se tlaixpanoli. Pero nopa filisteo tlayacanani ax mitzcualitaj. 7Huajca m'as cuali para timocuepas. Xiya ica cuali para ax m'as tiquincualancamacas. 8Huan David quinanquili Aquis huan quiilhui: --¿Tlaque nijchijtoc? ¿Tlaque tiquitztoc tlen ax mitzpact'ia ipan nochi ni tonali quema niitztoc mohuaya para niquintehuiti nocualancaitacahua? 9Huan Aquis quiilhui David: --Na cuali nijmati para nel'ia tiyolcuali queja se elhuicac ejquetl, pero nopa tlayacanca filisteos ya motemacatoque para ax tiyas tohuaya ipan ni tlatehuicajyotl. 10Huajca xiquisaca mostla nel ijnaltzi ta huan nochi mosoldados huan ximocuepaca. 11Huajca David huan nochi nopa tlacame tlen itztoyaj ihuaya quisque nel ijnaltzi huan mocuepque inintlal nopa filisteos. Huan nopa filisteos tlejcotiyajque hasta altepetl Jezreel.

will be added

X\