1 Samuel 28

1Huan se tonal nopa filisteos quinsentilijque nochi ininsoldados para yase quintehuitij israelitame, huan Tlanahuatijquetl Aquis quiilhui David: --Ta huan nochi motlacajhua xihualaca xinechpalehuica ipan se tlatehuicajyotl. 2Huan David quinanquili: --Cualtitoc. Ama tiquitas para, quena, nihueli nimitzpalehuis. Huan Aquis quiilhui: --Intla nel'ia miyac tinechpalehuis, huajca na nimitzchihuas tinotlamocuitlahuijca para nochi noyolis. 3Ipan nopa tonal quema David itztoya ipan seyoc tlali, mijqui Samuel huan nochi israelitame quichoquilijque. Huan quitlalpachojque ipan Ram'a tlen eliyaya ialtepe. Huan Sa'ul ya quinpanquixtijtoya nochi nopa tetlajchihuiani huan tlen momatque quincamahu'iaj mijcatzitzi. 4Huan nopa filisteos mosentilijque ipan se lugar tlen itoca eliyaya Sunem, huan Sa'ul quinsentili nochi israelitame huan mochijque ipan tepetl Gilboa. 5Huan quema Sa'ul quinitac para itztoyaj tlahuel miyac filisteo soldados, nel'ia moyolmajmati. 6Huajca momaijto ica TOTECO para tlajtlanis tlaque quichihuas. Pero TOTECO ax quinanquili. Ax quinextili tlaque eliyaya ipaquilis ipan temictli, niyon ica nopa tlatzejtzeloltijca dados tlen TOTECO quinmacatoya tlen itoca Urim. Niyon ax quinextili ipaquilis ica se itiocamanalojca. 7Huajca Sa'ul quinilhui itlatequipanojcahua: --Xinechtemolica se sihuatl tlen hueli quincamahu'ia mijcatzitzi, huan niyas niquitati. Huan itlatequipanojcahua quiilhuijque: --Ipan altepetl Endor itztoc se sihuatl tlen quiijtohua hueli quinnojnotza mijcatzitzi. 8Huajca Sa'ul moquixtili iyoyo tlen cuali huan moyoyonti queja tlen hueli tlacatl huan quinhuicac ome tlacame ihuaya huan yajque ica tlayohua quiitatoj nopa sihuatl, huan quiilhui: --Nijnequi nicamatis ihuaya se tlen ya mictoc. ¿Huelis tijnotzas itonal nopa mijcatzi tlen nimitzilhuis? 9Huan nopa sihuatl quiilhui: --Tijmati cuali para Tlanahuatijquetl Sa'ul tlanahuati ma quinpanquixtica nochi tetlajchihuiani huan tlen mocamahu'iaj ininhuaya mijcatzitzi. San huelis tijnequi tinechmasiltis huan titeyolmelahuas para ma nechmictica nojquiya. 10Huajca Sa'ul quiilhui iixpa TOTECO para ax tleno fiero ipantis pampa axaca quiilhuisqu'ia. 11Huajca nopa sihuatl quiilhui: --¿Ajqueya nopa mijcatzi tlen tijnequi ma nijnojnotza? Huan Sa'ul quiilhui: --Xijnotza Samuel. 12Huan nimantzi ipan nopa tlalochtli nopa sihuatl quiitac Samuel, huan quitzajtzili chicahuac Sa'ul huan quiilhui: --¿Para tlen tinechcajcayajtoc? ¡Ta tiSa'ul! 13Huan nopa tlanahuatijquetl quiilhui: --Amo ximomajmati. San xinechilhui tlaque tiquitztoc. Huan nopa sihuatl quiilhui: --Niquitztoc se tlacatl queja se mixtli tlen hualtlejco. 14Huan Sa'ul quiilhui: --¿Quejatza itlachiyalis? Huan quinanquili: --Se tlacatl huehuentzi huala tlen mopictoc ica iyoyo huehueyac. Huajca Sa'ul quimachili para eliyaya Samuel huan moixhuijtzonqui hasta tlalchi para quinextilis se hueyi tlatlepanitacayotl. 15Huan Samuel quiilhui: --¿Para tlen tinechcualancamacatoc huan tijchijtoc ma nihuala? Huan Sa'ul quinanquili: --Na tlahuel nitlaijiyohu'ia huan nopa filisteos nechtehu'iaj. Huan Toteco Dios nechtlahuelcajtoc huan ax nechnanquil'ia, niyon ipan temictli huan niyon ica itiocamanalojcahua huan yeca nimitznotztoc pampa nijnequi xinechilhui tlaque nijchihuas. 16Huajca Samuel quinanquili: --¿Para tlen tinechtlajtlan'ia na intla TOTECO mitztlahuelcajtoc huan mochijtoc mocualancaitaca? 17TOTECO ya quichijtoc mohuaya queja ya mitzilhuijtoya achtohui ica na para quichihuas. Ya mitzcuilijtoc motlanahuatilis huan ya quimacatoc David tlen itztoya monechca. 18Pampa ta ax tijtlepanitztoc itlanahuatilhua TOTECO. Ax tiquinmicti nopa amalecitame queja yaja mitznahuati xijchihua. Huan yeca ama TOTECO mitzchihuil'ia ni tlamantli. 19Ama TOTECO mitztemactilis ta huan nochi israelitame ininmaco nopa filisteos. Huan mostla timiquis huan tiitztos nica nohuaya huan moconehua nojquiya. Huan nochi israelitame quintemactilis TOTECO ininmaco nopa filisteos. 20Huan ipan nopa tlalochtli Sa'ul huetzqui ixtlapachijtoc, pampa onpano momajmati ipampa tlen quiilhuijtoya Samuel. Huan ayoc quipixqui fuerza pampa ax tleno quicuajtoya se tonal huan se yohuali. 21Huan nopa sihuatl quiitac para Sa'ul nel'ia tlahuel momajmatijtoya, huan quinechcahuito huan quiilhui: --Nimitztlacaquilijtoc huan nijchijtoc tlen tinechtlajtlani yonque hueltosqu'ia nimictosqu'ia. 22Ama nijnequi para ta nojquiya xijtlacaquili tlen nimitzilhuis. Xinechcahuili ma nimitzcualtlalilis se tlacualistli para tijcuas para tijpiyas fuerza huan huelis tiajsiti campa tiyas. 23Pero Sa'ul ax quinejqui huan quiilhui: --Ax nitlacuas. Pero itlatequipanojcahua huan nopa sihuatl quiilhuijque miyac huelta para ma tlacua. Huan teipa quintlacaquili huan moquetzqui campa huetztoya tlalchi huan mosehui ipan se tlapechtli. 24Huan nopa sihuatl quimicti se becerro tlen quitomajtoya nopona ipan ichaj. Huan quixacualo iharina huan quichijqui pantzi tlen ax quipixqui tlasonejcayotl huan quiicxiti. 25Huan quihualiquili Sa'ul huan itlatequipanojcahua huan nochi tlacuajque. Huan quema tlanque tlacuaj monahuatijque huan yajque ipan nopa yohuali.

will be added

X\