1 Samuel 26

1Huan nopa altepetl Zif ehuani sampa yajque altepetl Gabaa quiitatoj Sa'ul huan quiilhuitoj: "David motlatijtoc ipan nopa tlachiquili Haquila tlen mocahua nechca huactoc tlali." 2Huajca Sa'ul nimantzi quisqui ininhuaya 3 mil soldados tlen m'as tlapejpenilme tlen nochi israelita soldados huan yajque para quitemotij David ipan huactoc tlali Zif. 3Huan Sa'ul mochijqui ipan nopa tlachiquili Haquila nechca nopa ojtli tlen eltoya iteno nopa huactoc tlali ica campa quisa tonati. Huan David itztoya nopona ipan huactoc tlali, huan quicajqui para Sa'ul quitemojtihualayaya. 4Huajca quintitlanqui tlacame para ma quiitatij hasta campa mocajtoya Sa'ul. 5Huan teipa David yajqui campa mocahuayaya huan quipanti Sa'ul ihuaya Abner, icone Ner, yajaya tlen eliyaya itlayacanca tlen quinnahuatiyaya nochi isoldados. Huan David quiitac para Sa'ul cuali cochtoya huan isoldados yahualtic cochtoyaj. 6Huajca David quinotzqui Ahimelec nopa heteo tlacatl, huan quinotzqui Abisai tlen eliyaya icone Sarvia huan iicni Joab; huan quinilhui: --¿Ajqueya quinequi yas nohuaya para ticalaquise campa itztoc Sa'ul? Huan Abisai quiijto: --Na niyas mohuaya. 7Huajca David huan Abisai nimantzi calajque campa itztoyaj isoldados Sa'ul, huan quipantitoj Sa'ul cuali cochtoya huan quitoctoya icuatlami tlen huehueyac tlalchi nechca itzonteco. Huan Abner huan nochi isoldados nojquiya cuali cochtoyaj, huan yahualtic quipixtoyaj Sa'ul. 8Huajca Abisai quiilhui David: --Toteco Dios mitzmactilijtoc mocualancaitaca momaco. Se favor, xinechcahuili na ma nijmictis ama. San se huelta nijsentlapalhuilis ica ne cuatlamintli tlen huehueyac huan mocahuas tlatzquitoc tlalchi. Huan ax monequis ompa nijchihuas. 9Pero David quiilhui: --Axtle, amo xijmicti, pampa axaca hueli quimictis ni tlanahuatijquetl tlen TOTECO quitlapejpenijtoc, huan ax quihuicas tlajtlacoli iixpa TOTECO. 10TOTECO yajaya temachtli, huan se tonal quichihuas para miquis ipan tlatehuicajyotl o pampa san ajsis ihora. 11Pero ma TOTECO nechmanahui para ax quema nijmictis ni itlanahuatijca tlen quitlapejpenijtoc. Pero ma tijcuilica icuatlami tlen huehueyac huan iteco ica atl tlen eltoc nechca itzonteco huan tijhuicase. 12Huajca David quihuicac Sa'ul icuatlami tlen huehueyac huan nopa tecomitl tlen eltoya itzontla huan yajqui. Huan axaca quiitac, niyon quicajqui. Axaca isac pampa nochi cochtoyaj. TOTECO quichijtoya para nochi san ma tlahuel cochisnequica. 13Teipa David quipanoc huan tlejcoc itzonpac seyoc tepetl, huan Sa'ul mocajqui huejca ipan seyoc tepetl. 14Huan nopona David quihualtzajtzili Abner huan nochi nopa soldados: --Abner, xiisa huan xinechnanquili. Huajca Abner quinanquili huan quiilhui: --¿Ajqueya ta tlen titzajtzi huan tiquixit'ia nopa tlanahuatijquetl? 15Huan David quiilhui: --¿Ax ta titlacatl? Nochi quiijtohuaj para axaca mitzaxil'ia ipan nochi tlali Israel. Huajca ¿para tlen ax tijmocuitlahu'ia cuali moteco, yaja tlen tlanahuatijquetl? Se hualajqui para quimictis. 16Nel'ia fiero ni tlamantli tlen tijchijtoc. Nel'ia melahuac quinamiqui timiquis huan quinamiqui ma miquica mosoldados pampa ax inquimocuitlahuijtoque cuali imotlanahuatijca tlen TOTECO quitlapejpenijtoc. Xijtemo ama icuatlami tlen huehueyac nopa tlanahuatijquetl huan nopa tlen ipan quihuica atl tlen eltoya nechca itzonteco. Xiquita intla tijpantis. 17Huan quema Sa'ul quitosmachili para eliyaya David tlen camatiyaya, quiijto: --¿Ax ta motos tlen nijcaqui, tinocone David? Huan David quinanquili: --Quena, noteco huan notlanahuatijca, na tlen nicamati. 18Huan David nojquiya quiilhui: --¿Para tlen tinechtoquil'ia, na nimotlatequipanojca? ¿Tlaque nijchijtoc? Xinechilhui notlajtlacol. 19Nimitztlajtlan'ia titlanahuatijquetl xijtlacaquili tlen nimitzilhu'ia. Intla TOTECO mitzchijtoc tinechcualancaita, huajca nijmacas se tlacajcahualistli para nimoyoltlalis ihuaya. Pero intla se tlacatl mitzchijtoc tinechcualancaita, huajca ma TOTECO mitztelchihua. Pampa imojuanti tlen innechquixtijtoque ipan notlal para ayoc hueli niitztos ica itlacajhua TOTECO. Eltoc queja innechilhuijtosqu'iaj: 'Xiya xiquintequipanoti sequinoc dioses.' 20Ax cuali para tinechfuerzajhuis ma nimiqui ipan seyoc tlali. Ax nijnequi nijcahuas noeso huejca tlen itiopa TOTECO. Nel'ia se huihuiyotl para ta tlen titlanahuatijquetl ipan tlali Israel tihualajtoc tinechtemohua na hasta nica. Na san niitztoc queja se tecpimitl. Axaca yasqu'ia ipan tepetini para quitepotztocas san setzi xacoyotl. 21Huajca Sa'ul quiijto: --David, tinocone, nel'ia nitlajtlacolchijtoc. Nimochijtoc queja nielisqu'ia se nihuihuitic. Nel'ia nitlaixpanotoc, pero ya ximocuepa. Ax tleno tlen fiero nimitzchihuilis pampa ta nel'ia tijnextijtoc para tinechtlepanita. 22Pero David quimachili para ax neli huan quiilhui: --Nica eltoc ne tlanahuatijquetl icuatlami tlen huehueyac. Ma huala se acajya para quihuiquilis. 23Huan ma TOTECO quitlaxtlahui tlen quichihua tlen cuali. Yonque TOTECO mitztemactili ama nomaco, ax nijnejqui nimomatlalanas para nimitzmictis pampa TOTECO mitztlapejpenijtoc. 24Huan queja ama nijmanahuijtoc moyolis, ama ma TOTECO nechmanahui ica nochi tlen fiero para ax nimiquis. 25Huan Sa'ul quiijto: --Ma TOTECO mitztiochihua, tinocone David. Ta tijchihuas huejhueyi tlamantli huan titlatlanis ipan nochi tlamantli tlen tijchihuas. Huajca Sa'ul mocuepqui ichaj, huan David nojquiya yajqui seyoc lugar.

will be added

X\