1 Samuel 24

1Teipa Sa'ul tlanqui quintehu'ia nopa filisteos huan quiilhuijque para David itztoya ipan huactoc tlali En Gadi. 2Huajca quinhuicac 3 mil israelita soldados tlen m'as tlapejpenilme huan yajque quitemotoj David huejcapa ipan nochi nopa tepetini san campa oncayaya huejhueyi tetl, huan campa san hueli nemij chivojme tlen momajtoque nemij ipan tepetini. 3Huan ipan iojhui ajsito campa se corral tlen borregojme huan nechca eltoya se ostotl. Huan Sa'ul calajqui nopona para quichihuas itechmonequi. Huan David huan nochi isoldados itztoyaj nopona m'as calijtic ipan nopa tlacacahuaya. 4Huan nopa tlacame quiilhuijque David: --TOTECO ya mitzilhuijtoc para mitzmactilis momaco mocualancaitaca para tijchihuilis tlen tiquitas para cuali, huan ama ya ajsic hora pampa itztoc momaco para tijmictis. Huajca David monechcahui yolicatzi huan quitzontequili se quentzi iyoyo Sa'ul ipan nopa tzintlayohuilotl. 5Pero teipa David moyolcoco pampa quitequilijtoya iyecapa iyoyo Sa'ul. 6Huan quinilhui nochi nopa tlacame tlen itztoyaj ihuaya: --Ma TOTECO nechtlapojpolhui pampa nijchihuili tlen fiero Sa'ul, yaja tlen noteco. Nijchihuili tlen ax monequi yajaya tlen TOTECO quitlapejpenijtoc para elis tlanahuatijquetl huan ax nijchijtosqu'ia. 7Huan queja nopa David quinchihualti isoldados para ma ax quimictica Sa'ul. Huan teipa Sa'ul quisqui ipan nopa mijca ostotl huan yajqui. 8Huan David moquetzqui huan yajqui iica Sa'ul huan quitzajtzili huan quiilhui: --Noteco, Tlanahuatijquetl Sa'ul. Huan quema Sa'ul moicancuepqui, David moixhuijtzonqui hasta tlalchi ica hueyi tlatlepanitacayotl. 9Huan quiilhui: --¿Para tlen tiquintlacaquil'ia inijuanti tlen mitzilhu'iaj nijnequi nimitzmictis? 10Hueli tiquita ama para ax neli pampa yonque TOTECO mitztemactili nomaco ipan ni mijca ostotl huan nochi nosoldados nechilhuiyayaj ma nimitzmicti, ax nijnejqui. Nimoilhui para ax hueli nijmictis nopa tlanahuatijquetl tlen TOTECO quitlapejpeni huan quitequitlali. 11"Pero xiquita tlaque nijpixtoc nomaco. Nica eltoc iyecapa moyoyo tlen nijtzontejqui, pero ax nimitzmicti. Huajca ximomaca cuenta para ax nimoilhu'ia para nimitzchihuilis tlen fiero, niyon ax nimitzixpanotoc. Pero ta, quena, tinechtoquil'ia huan tijnequi tinechmictis. 12Ma TOTECO techtlajtolsencahua tojuanti tiome. Huan ma mitztlatzacuilti ipampa tlen tijnequi tinechchihuilis, pero xijmati para ax quema nimomatlalanas ica ta para nimitzchihuilis tlen fiero. 13Eltoc queja quiijtohua nopa tlajtoli tlen huejcajquiya quitequihu'iaj: 'Tlamantli tlen fiero quisa ipan tlacame tlen fierojtique.' Pero yonque ya nopa, ax nimomatlalanas na para nimitzchihuilis tlen fiero. 14Huan ¿para tlen ta tlen titlanahuatijquetl ipan tlali Israel tinechtoquil'ia na tlen ax tleno nopati? Na niitztoc queja se chichi tlen mictoc, o queja se tecpimitl. 15Huajca ma TOTECO techtlajtolsencahua na huan ta. Huan ma quitlatzacuilti tlen quipiya tlajtlacoli. Yajaya notlamanahuijca ma nechtlasojtla huan ma nechmanahui momaco." 16Huan quema David tlanqui camati, Sa'ul quiijto: --¿Nel'ia eltoc ta, tinocone David, tlen ticamati? Huan pejqui choca Sa'ul, 17huan quiilhui: --Ta nel'ia tixitlahuac huan na, axtle, pampa tinechtlaxtlahuijtoc ica tlen cuali, yonque tlen fiero nimitzchihuilijtoc na. 18Ama nijmachil'ia para ta nel'ia tinechtlasojtlac pampa yonque TOTECO nechtemactili momaco ta ax tinechmicti. 19Axaca seyoc tlen quipantis icualancaitaca huan quicahuas ma yas ica cuali. Ma TOTECO mitztlaxtlahui hueyi pampa tinechtlasojtlatoc ama ni tonal. 20Huan ama nimomaca cuenta para ta tielis titlanahuatijquetl huan nochi tlali Israel eltos ipan motlanahuatilis, huan eltos temachtli momaco. 21Xinechilhui ama iixpa TOTECO para ax tiquintzontlamiltis nochaj ehuani, niyon noixhuihua huan queja nopa ax tlamis notoca. 22Huajca David tlatestigojquetzqui para ax quema quichihuasqu'ia ya nopa, huan teipa Sa'ul mocuepqui ichaj. Huan David huan nochi nopa tlacame tlen itztoyaj ihuaya mocuepque sampa campa mochijtoyaj ipan nopa tlacacahuaya.

will be added

X\