1 Samuel 23

1Huan se tonal nopa filisteos calajque altepetl Keila, huan quinichtequiliyayaj inintrigo tlen yancuic quiyolquixtijtoyaj, huan David quimatqui. 2Huajca David quitlajtlani TOTECO tlaque ipaquilis, quiilhui: --¿Tijnequi ma niyas niquintehuiti nopa filisteos? Huan TOTECO quiilhui: --Quena, xiya huan xiquintehuiti nopa filisteos huan xijmanahui nopa altepetl. 3Pero nopa tlacame tlen itztoyaj ihuaya David, quiilhuijque: --Ya tiitztoque ica majmajtli nica ipan tlali Jud'a. Huan achi m'as timajmahuise intla tiyase altepetl Keila para tiquintehuitij nochi ininsoldados nopa filisteos. 4Huajca David sampa quitlajtlani TOTECO, huan TOTECO quiilhui: --Ximocualtlalica huan xiyaca altepetl Keila, pampa na nimechmactilis imomaco nopa filisteos. 5Huajca David huan nochi nopa tlacame tlen itztoyaj ihuaya, yajque altepetl Keila. Huan quintehuijque nopa filisteos huan quintzontlamiltijque, huan quincuilijque nochi inintlapiyalhua. Huan queja nopa David quinmanahui nochi tlen ehuayayaj altepetl Keila. 6Huan nopa totajtzi Abiatar, icone Ahimelec, yajqui ihuaya David ipan altepetl Keila huan quihuicac nopa yolixpantzajcayotl ica nopa piltetzitzi tlen momatque quitequihu'iaj para quimatise tlaque TOTECO quinequiyaya ma quichihuaca. 7Huan quema Sa'ul quicajqui para David itztoya ipan altepetl Keila, quiijto: "Toteco Dios quitlahuelcajtoc David huan nechmactilijtoc nomaco pampa calactoc ipan nopa altepetl tlen tzactoc ica se tepamitl yahualtic." 8Huan nimantzi Sa'ul quinnotzqui nochi isoldados tlen campa hueli altepetini para yase Keila para quiyahualotij David huan nochi nopa tlacame tlen itztoyaj ihuaya ipan altepetl Keila. 9Huan quema David quimatqui para Sa'ul quinequiyaya quichihuilis tlen fiero, huajca quiilhui Abiatar para ma quihualiquili nopa pantzajcayotl para quimatisqu'ia tlaque quinilhuisqu'ia TOTECO. 10Huan David quiijto: --TOTECO ta tlen titoDios tiisraelitame, nijcactoc para temachtli Sa'ul quinequi hualas nica ipan altepetl Keila huan quinequi quixolehuas ni altepetl pampa niitztoc nica. 11¿Nel'ia hualas queja nijcactoc? Huan quema ajsis, ¿nechtemactilise imaco ni tlacame tlen ni altepetl Keila? TOTECO, nimitztlajtlan'ia xinechilhui. Huan TOTECO quiilhui: --Sa'ul, quena, hualas. 12Huan David quitlajtlani TOTECO: --Huan ¿quena, techtemactilise ni Keila ehuani huan nochi nosoldados imaco Sa'ul? Huan TOTECO quinanquili: --Quena, inmechtemactilise. 13Huajca David huan nochi nopa tlacame tlen yajtoyaj ihuaya tlen eliyayaj 600 tlacame, quisque altepetl Keila huan nejnenque campa hueli campa ax m'as mahuilili. Huan quema Sa'ul quimatqui para David quistoya tlen nopa altepetl huan mochololtijtoya, huajca moyolcuepqui huan ax yajqui altepetl Keila. 14Huan David yajqui campa huactoc tlali huan quitemo campa itztose temachtli ipan mijca ostotl huan nopona mocajqui. Huan mocajqui ipan se tepetl ipan nopa huactoc tlali Zif. Huan yonque Sa'ul nel'ia quitemohuayaya mojmostla, Toteco Dios ax quitemactili David imaco Sa'ul. 15Huan se tonal quema David itztoya nechca Hores ipan huactoc tlali Zif, quimatqui para Sa'ul hualayaya ipan ojtli para quimictis. 16Huan ajsico Jonat'an, icone Sa'ul, ipan Hores, huan quiyolchicajqui David para ma motemachi ipan Toteco Dios. 17Huan quiilhui: --Amo ximajmahui, pampa notata Sa'ul ax huelis mitzajsis. Ta tielis titlanahuatijquetl ipan tlali Israel. Huan na niitztos mohuaya huan nielis motemach, huan ya nopa hasta notata Sa'ul quimati. 18Huan queja nopa, nopa ome sampa quiyancuilijque tlen achtohui motlajtolcahuilijtoyaj iixpa TOTECO. Huan teipa Jonat'an mocuepqui ichaj huan David mocajqui ipan Hores. 19Pero nopa tlacame tlen altepetl Zif yajque altepetl Gabaa campa itztoya Sa'ul huan quiilhuijque: --Tlanahuatijquetl Sa'ul, timitzyolmelahuaj para David motlatijtoc ipan totlal ipan nopa mijca ostotl nechca Hores ipan tlachiquili Haquila tlen mocahua ica tlatzintla tlen huactoc tlali. 20Huan quema tijnequis tiyas tijtemoti, timitzmactilise momaco. 21Huajca Tlanahuatijquetl Sa'ul quinilhui: --Ma TOTECO inmechtiochihua pampa innechtlasojtlatoque. 22Huajca ama, xiyaca huan ximotemachica intla nel'ia itztoc campa inquiitaque pampa nechilhuijtoque nel'ia quimati quejatza tlacajcayahuas. 23Huajca ximomacaca cuenta cuali nochi campa motlatijtinemi, huan xinechilhuiquij tlen temachtli. Huan na niyas imohuaya para nijpantis yonque monequi nijtemojtiyas tlatlajco tlen nochi nopa miyac tlacame ipan nochi tlali Jud'a. 24Huan nopa tlacame quiyacantiyajque Sa'ul huan mocuepque ipan altepetl Zif para quitemose David. Huan David huan nochi isoldados itztoyaj ipan huactoc tlali Ma'on ipan nopa tlamayamitl tlen mocahua ica tlatzintla. 25Huan Sa'ul huan nochi isoldados yajque quitemotoj David, pero nimantzi sequin yajque quiilhuitoj David para Sa'ul hualayaya. Huajca David ixtemoc tlen nopa tepetl campa itztoya. Huan mocajqui ipan nopa tepexitl tlen mopantiyaya ipan tlali Ma'on. Huan quema Sa'ul quimatqui, nojquiya yajque ipan huactoc tlali Ma'on para quitemotij. 26Huan Sa'ul huan nochi isoldados yahuiyayaj ipan se lado tlen nopa tepetl, huan David huan nochi isoldados yahuiyayaj ipan nopa seyoc lado nopa tepetl. Huan David moisihuiltiyaya pampa quinequiyaya mochololtis imaco Sa'ul, pero ax huelqui pampa Sa'ul quinyahualojtoya huan ya eltoya para quiitzquise. 27Pero ipan nopa tlalochtli ajsico se tlacatl tlen quiilhuico Sa'ul: --Ximocuepa totlal nimantzi pampa nopa filisteos calactoque. 28Huajca nimantzi Sa'ul huan nochi isoldados mocuepque para quintehuitij nopa filisteos huan quicajque quitoquil'iaj David. Huan yeca nopa lugar quitocajtijque Sela Hama Lecot. (Sela Hama Lecot quinequi quiijtos Nopa Tetl Campa Quicahuili Ma Cholo.) 29Teipa David tlejcoc ipan nopa tepetini para mocahuato ipan nopa mijca ostotl En Gadi.

will be added

X\