1 Samuel 20

1Pero David ya quistoya ipan pilaltepetzi Naiot nechca Ram'a. Yajaya yajqui campa itztoya Jonat'an huan quiilhui: --¿Tlaque nijchijtoc? ¿Para tlen motemacatoc motata para temachtli nechmictis? 2Huan Jonat'an quinanquili: --Ax neli quinequi mitzmictis. Notata ax quichihuas se tlamantli hueyi o pilsiltzi intla ax nechmachiltis achtohui. ¿Para tlen nechtlatilis notata ni tlamantli? Ax nijneltoca. 3Pero David sampa quiilhui Jonat'an: --Motata quimati cuali para ta huan na timohuampochijtoque. Yeca ax quinequi mitzilhuis pampa moilhu'ia para timocuesos. Pero melahuac nimitzilhu'ia para ya nieltoc para nimiquis. 4Huajca Jonat'an quiilhui David: --Huajca ¿quejatza huelis nimitzpalehuis? San xinechilhui huan nijchihuas mopampa ta. 5Huajca David quinanquili Jonat'an: --Xiquita, mostla pehuas nopa ilhuitl tlen nopa metztli yancuic. Huan monequi para niitztos ihuaya motata para titlacuase san sejco queja timomajtoque. Pero xinechcahuili nimotlatis cuatitla huan nimocahuas nopona hasta hualhuiptlatis ica tiotlac. 6Huan intla motata nechtemos huan mitztlajtlanis tlen na, huajca xiquilhui para nimitztlajtlani miyac hueltas para xinechcahua ma niya ipan noaltepe Bel'en pampa nochi nochaj ehuani mosentil'iaj sesen xihuitl para ilhuichihuase quema temacaj inintlacajcahualis. 7Huan intla motata quiijtos para cualtitoc, huajca nijmatis para nochi cuali eltoc. Pero intla motata cualanis, huajca nijmatis para motemacatoc para nechmictis. 8Huajca nimitztlajtlan'ia xinechchihuili ni favor, pampa tijchijtoque se tlajtolsencahuali iixpa TOTECO para ax quema timotlahuelcahuase. Intla nitlajtlacolchijtoc, huajca ta xinechmicti, pero amo xinechhuica iixpa motata. 9Pero Jonat'an quinanquili: --¡Na ax quema nimitzchihuilis ya nopa! Intla nijmatis para nel'ia notata motemacatoc mitzmictis, huajca nimitzilhuis. 10Huajca David quitlajtlani Jonat'an: --¿Huan ajqueya yas nechilhuiti intla motata mitznanquilis cualantoc? 11Huan Jonat'an quiilhui: --Xihuala nohuaya ma timoiyocaquixtica. Huajca san sejco yajque campa huelque camatij san inijuanti ome. 12Huan nopona Jonat'an quiilhui David: --Nijtestigojquetza TOTECO toDios tiisraelitame para mostla o huiptla, nijcamahuis notata para nijmatis tlaque moilhu'ia. Intla nochi eltos cuali para ta, huajca nimitzmachiltis. 13Pero intla notata cualantos huan nel'ia quinequi mitzmictis, ma TOTECO nechtlatzacuilti chicahuac intla ax nimitzilhuis para huelis timochololtis. Huan ma TOTECO itzto mohuaya queja achtohuiya itztoya ihuaya notata. 14Huan intla noja niitztos teipa, xinechtlasojtla queja TOTECO mitztlasojtlatoc, huan xinechcahuili ma niitzto. 15- 16Huan intla nimiquis huan TOTECO ya quintzontlamiltijtos nochi mocualancaitacahua ipan ni tlaltepactli, se favor xiquintlasojtla nochaj ehuani. Huajca quej ni Jonat'an quichijqui se tlajtolsencahuali ihuaya David. 17Huan Jonat'an quichijqui David sampa ma quitestigojquetza TOTECO para mopalehuisqu'iaj huan quichihuasqu'iaj nochi tlen quiijtojtoyaj pampa Jonat'an nel'ia quiicneliyaya David queja ya moicneliyaya. 18Teipa Jonat'an quiilhui David: --Mostla quiilhuichihuilise nopa metztli yancuic, huan mitztemose pampa axaca itztos ipan mosiya campa mesa para nopa tlacualistli. 19Huan para huiptla achi m'as nochi mitztemose. Huajca xiya ximotlatiti campa timotlatij achtohuiya campa nopa miyac tetl tlen itoca Ezel. 20Huan niyas nopona nechca huan nijmajcahuas eyi cuatlamintli, queja nijmajcahuilisqu'ia se tlenijqui. 21Huan teipa niquilhuis notlatequipanojca: 'Xiya, xijtemoti nopa cuatlamintli.' Huan intla tijcaquis para niquilhuis: 'Nopa cuatlamintli mocajtoc achi nica, xijcuiti', huajca huelis tiquisas pampa tijmatis para onca tlasehuilistli ica notata huan ax tleno fiero mopantis. 22Pero intla tijcaquis para niquilhuis notlatequipanojca: 'Xiya m'as para neca pampa nopa cuatlamintli nopona achi neca huetzqui', huajca monequi ticholos nimantzi pampa TOTECO quinequi xicholo. 23Huan xiquilnamiqui para TOTECO techcactoc huan mocahua testigo ica nochi tlen tiquijtojtoque ama huan queja timocajtoque. Huan yaja techtlatzacuiltis intla ax tijtlamichihuase totlajtol. 24Huajca David motlatito campa achtohui motlatijtoya. Huan quema ajsic nopa ilhuitl tlen metztli yancuic, huajca Tlanahuatijquetl Sa'ul mosehui campa mesa para tlacuas. 25Huan Sa'ul mosehui campa ipa mosehuiyaya nechca nopa tlapepecholi, huan Jonat'an mosehui iixmelac itata. Huan Abner mosehui inacastla Sa'ul. Pero campa David momatqui mosehu'ia mocajqui cactoc. 26Huan ipan nopa tonal Sa'ul ax tleno quiijto tlen David, pampa moilhui huelis quiajsitoya se tlenijqui tlen quichijqui ax tlapajpactic iixpa TOTECO huan aya mopajpactoya. 27Pero hualmostla sampayano mocajqui cactoc campa momatqui mosehu'ia David, huan eliyaya nopa ompa tonal ipan nopa ilhuitl para nopa metztli yancuic. Huajca Sa'ul quitlajtlani icone, Jonat'an: --¿Para tlen ax hualajtoc tlacuaqui icone Isa'i niyon yalohua huan niyon ama? 28Huan Jonat'an quinanquili Sa'ul: --David nechtlajtlani ma nijcahuas yas ialtepe Bel'en, 29pampa ichaj ehuani quichihuase se ilhuitl ica nopa tlacajcahualistli ipan ialtepe. Huan iicni quiilhui monequi ma yas. Huajca nechilhui ma nijchihuili se favor huan ma nijcahua yas paxaloti ipan ichaj. Yeca ax hualajtoc para tlacuas mohuaya. 30Huajca Sa'ul cualanqui huan quiilhui Jonat'an: --¡Tihuihuitic queja motlajtlacolchijca nana! ¿Timoilhu'ia ax nijmati para tijtlapejpenijtoc timohuampochihuas ica David yonque queja nopa timopinahualtis ta huan tijpinahualtis monana? 31Pampa intla tijcahuas ma itzto ipan ni tlali David tlen icone Isa'i, ta ax quema huelis tielis titlanahuatijquetl. Huajca ama xitlanahuati ma quitemotij huan ma nechhualiquilica para nijmictis. 32Huajca Jonat'an quiilhui: --Huan ¿para tlen tijmictis? ¿Tlaque ax cuali quichijtoc? 33Huajca Sa'ul nimantzi quimajcahuili Jonat'an icuatlami tlen huehueyac para quimictis. Huan Jonat'an quimachili para nel'ia itata quisencajtoya quimictis David. 34Huajca Jonat'an quisqui campa imesa huan ax tlacuajqui nopa ompa tonali ipan ilhuitl pampa nel'ia mocuesohuayaya ipampa David. Huan mocuesohuayaya pampa eliyaya se pinahualistli tlen itata quichihuayaya. 35Huan hualmostla Jonat'an quisqui nel ijnaltzi huan quihuicac se oquichpil ihuaya huan quichijqui nochi queja mocajtoya ihuaya David. 36Huan Jonat'an quiilhui nopa oquichpil: --Ximotlalo para tijtemoti nopa cuatlamintli tlen nijmajcahuas. Huan quema nopa oquichpil motlalojtiyohuiyaya, Jonat'an quimajcajqui nopa cuatlamintli huan quichijqui para ma huetzis m'as huejca tlen iixmelac. 37Huan quema nopa oquichpil ajsito campa huetztoya nopa cuatlamintli, huajca Jonat'an quitzajtzili chicahuac ica nochi ifuerza huan quiilhui: --¿Ax huetztoc nopa cuatlamintli m'as para neca? 38Huan sampa Jonat'an quitzajtzili nopa oquichpil huan quiilhui: --Ximoisihuilti ximotlalo huan xijcuiti. Amo ximoquetza. Huan nopa oquichpil quinsentili nopa cuatlamintli, huan quihualiquili Jonat'an. 39Huan nopa oquichpil ax tleno quimatqui tlaque oncac, san Jonat'an ihuaya David quimatiyayaj tlaque quinequiyaya quiijtos. 40Huan teipa Jonat'an quimactili nochi nopa cuatlamintli huan icuahuitol nopa oquichpil, huan quinahuati ma quihuiquili nochi ipan altepetl. 41Huan quema nopa oquichpil ya yajtoya, David quisqui campa motlatijtoya iica nopa huejhueyi tetini ica tlatzintla ipan nopa tlali. Huan moixhuijtzonqui eyi hueltas huan icuaixpa ajsiyaya hasta tlalchi iixmelac Jonat'an. Huan teipa moquetzqui huan motzoponijque ica hueyi tlatlepanitacayotl huan chocaque san sejco hasta ayoc huelqui choca David. 42Huan Jonat'an quiilhui David: --Xiya ica tlasehuilistli ipan moyolo pampa timoilhuijtoque iixpa TOTECO para ax quema timoilcahuase para nochipa. Huan tijtlajtlanijtoque TOTECO ma itzto tohuaya huan ica toconehua para nochipa para ma moicnelise, huan yajaya ya nopa quichihuas. Huajca David yajqui huan Jonat'an mocuepqui ipan ialtepe.

will be added

X\