1 Samuel 2

1Huan Ana momaijto ica TOTECO huan quiijto: "TOTECO, nel'ia niyolpaqui ipan ta. Miyac tinechtiochijtoc huan tinechmacatoc yancuic chicahualistli. Huan ama huelis niquinnanquilis nocualancaitacahua, pampa ta, TOTECO, tinechmaquixtijtoc tlen nocuesol. Huan yeca nel'ia niyolpaqui. 2Axaca seyoc tlen tlatzejtzeloltic queja ta, TOTECO. Axaca seyoc Dios. Axaca seyoc tlen hueli temanahu'ia queja ta, san Toteco Dios tiiyojtzi. 3Imojuanti intlacame, amo ximohueyimatica. Amo xicamatica chicahuac. Amo ximotlepanitaca. Pampa TOTECO san yajaya Dios tlen nochi quimati. Yajaya inmechtlajtolsencahuas ica tlen inquichihuaj. 4Tiquinquixtil'ia ininteticayo tlen yolchicahuaque, huan tiquinyolchicahua tlen ax quipiyaj fuerza. 5Tlacame tlen quipixque tlacualistli hasta mocahua ama tlaijiyohu'iaj ica mayantli. Huan tlen mayanayayaj, ama hasta mocahua inintlacualis. Huan nopa sihuatl tlen ax hueli conepiya, ama ya quinpixtoc hasta chicome iconehua. Huan nopa sihuatl tlen quinpiyayaya miyac iconehua, ama ayoc tleno quinpiya. 6TOTECO, ta titemict'ia huan ta titemaca yolistli. Ta titetemohu'ia campa miquistli huan ta tlen titetlejcolt'ia. 7TOTECO, ta tiquinchihua sequin tlacame teicneltzitzi, huan sequin ta tiquinricojchihua. Ta tlen titeicnotlal'ia huan titehueyichihua. 8TOTECO, ta tiquintlalana nopa teicneltzitzi tlen itztoque tlalchi. Quena, tiquintlalana tlen mosehu'iaj campa cuanextli, huan tiquinhueyichihua para ma mosehuica ininhuaya huejhueyi tequitini. Quena, TOTECO tiquinchihua ma mosehuica campa m'as onca tlatlepanitacayotl. Pampa ta tlen m'as tihueyi. Huan ta moaxca nochi tlamantli hasta nopa tlaquetzali ipan tlen tijquetzqui ni tlaltepactli. 9TOTECO, tiquinmocuitlahu'ia tlen tlaiyocatlalilme para ta, pero tlen ax cuajcualme itztose ipan tzintlayohuilotl campa ayoc molinise. Axaca tlatlanis san ica ya ichicahualis. 10TOTECO, tiquintzontlamiltis nochi tlen mitztehu'iaj. Tlatlatzinaltis tlen elhuicactli ininca nocualancaitacahua. Tiquintlajtolsencahuas nochi tlacame campa hueli ipan tlaltepactli. TOTECO, ta tlen tijmacas chicahualistli nopa tlanahuatijquetl tlen tijtlapejpenijtoc. Quena, yajaya tlen ticajaltijtoc para quichihuas itequi, tijhueyichihuas." 11Huan Elcana huan nochi ichampoyohua mocuepque ininchaj ipan altepetl Ram'a, pero nopa conetl Samuel mocajqui huan quitequipano TOTECO queja quinahuati totajtzi El'i. 12Huan itelpocahua El'i nel'ia eliyayaj ax cuajcualme huan niyon quentzi ax quiixmatiyayaj TOTECO. 13Quema tequitiyayaj queja totajtzitzi huan hualayaya se acajya para quitlatis tlacajcahualistli para TOTECO, inijuanti quititlaniyayaj se inintlatequipanojca ica se hueyi tepos huitztli imaco tlen quipixqui eyi cuachijcoli. Huan quema nopa nacatl tlen nopa tlacajcahualistli moloniyaya, 14inintlatequipanojca quicalaquiyaya nopa tepos huitztli ipan chachapali o ipan tlen hueli campa quiicxit'iaj nopa nacatl huan nochi nopa nacatl tlen quiquixtiyaya quinhuiquiliyaya itelpocahua El'i. Huan queja nopa quichijque tlen ax monejqui nochipa ica nochi israelitame tlen ajsiyayaj Silo para quihueyitlalise TOTECO. 15Nojquiya quemantzi nopa tequitiquetl ajsiyaya quema aya quitlatiyayaj ichiyajca nopa nacatl ipan tlaixpa, huan quinilhuiyaya tlen temacaj tlacajcahualistli: "Xinechmaca nacatl para nijcacatzhuiliti nopa totajtzi pampa yajaya ax quiselis intla ya icsitoc. Yajaya quinequi xoxohuic para quicacatzos." 16Huan quemantzi nopa tlacame quinanquiliyayaj quej ni: "Huelis tijhuicas tlen tijnequis, pero achtohui xijcahua ma tlatla ichiyajca queja quiijtohua tlanahuatili, huan huajca huelis tijcuis". Huan quema queja nopa quinanquiliyayaj, huajca nopa tetlatequipanojquetl quiijtohuayaya: "Xinechmaca amantzi pampa intla ax tinechmacas nimitzquixtilis ica cualantli." 17Huajca nel'ia se hueyi tlajtlacoli tlen quichihuayayaj ni telpocame iixpa TOTECO, pampa san quiahuilmatiyayaj nopa tlacajcahualistli tlen nopa israelitame quihualicayayaj para quimacase TOTECO. 18Huan nopa piloquichpiltzi Samuel quitequipanohuayaya TOTECO tiopan calijtic huan moyoyontiyaya ica se pilyolixpantzajcayotzi tlen lino yoyomitl queja moyoyont'iaj totajtzitzi. 19Huan sesen xihuitl inana quichihuiliyaya seyoc pilpantzajcayotzi huan quihuiquiliyaya quema yahuiyaya campa tiopamitl ihuaya ihuehue para quimacati TOTECO nopa tlacajcahualistli tlen monejqui sesen xihuitl. 20Huan sesen xihuitl nopa totajtzi El'i quitiochijqui Elcana ihuaya isihua, itatahua Samuel huan quiilhuiyaya Elcana: "Ma TOTECO mitztiochihua huan ma mitzmaca m'as coneme ica ni sihuatl pampa quimactilijtoc ni icone para quitequipanos TOTECO." Huan teipa inijuanti mocuepayayaj ininchaj. 21Huan TOTECO quitiochijqui Ana huan quimacac eyi ioquichpilhua huan ome isihuapilhua. Huan Samuel moscaltijtiyajqui ipan itiopa TOTECO. 22Huan El'i eliyaya nel'ia huehuentzi. Huan quimatiyaya nochi tlen fiero quinchihuiliyayaj itelpocahua nopa israelitame. Quimatqui quejatza cochiyayaj ininhuaya nopa sihuame tlen quimocuitlahu'iaj nopa cuapuerta ipan nopa Yoyon Tiopamitl campa TOTECO mopantiyaya ininhuaya. 23Huajca El'i quinilhui itelpocahua: "¿Para tlen inquichihuaj tlen nel'ia fiero? Nijcactoc nochi tlen itlacajhua TOTECO mopohuil'iaj para inquichihuaj. 24Noconehua, monequi xijcahuaca. Nel'ia ax cuali tlen inquichihuaj. Inquintlajtlacolt'iaj itlacajhua TOTECO. 25Intla se quichihuil'ia seyoc tlacatl tlen fiero, quiselis se tlatzacuiltilistli. Pero imojuanti inquichihuaj tlen fiero ica TOTECO, huajca ¿ajqueya huelis inmechmanahuis tlen nopa hueyi tlatzacuiltili tlen inmechajsis?" Pero itelpocahua El'i ax quinejque quitlacaquilise tlen inintata quinilhuiyaya pampa TOTECO ya motemacatoya para quintzontlamiltis. 26Pero nopa oquichpil Samuel moscaltiyaya huan Toteco Dios quipactiyaya nochi tlen quichihuayaya, huan nojquiya nochi tlacame quicualitayayaj. 27Huan se tonal hualajqui se itiocamanalojca Toteco Dios para quipaxaloqui El'i huan quimacac ni tlajtoli tlen TOTECO quiilhuijtiyahuiyaya: "Na nimonexti iniixpa mohuejcapan tatahua quema itztoyaj ipan tlali Egipto huan quitequipanohuayayaj Fara'on san tlapic. 28Huan nijtlapejpeni mohuejcapan tata Lev'i huan iteipa ixhuihua ipan nochi iconehua Israel para inelise nototajtzitzi. Nimechtlapejpeni inquitlatise tlacajcahualistli ipan notlaixpa, huan para inquitlatise copali, huan para noixpa inmotlalilise nopa yoyomitl tlen monequi para se totajtzi. Nojquiya nimechcahuili inquicuase nopa cuali nacatl tlen nochi tlacajcahualistli tlen israelitame nechmacase para nechhueyitlalise. 29Huajca ¿para tlen inquinelihuishu'iaj nopa tlacajcahualistli huan nopa ofrendas tlen nitlanahuatijtoc ma nechhualiquilica ipan notiopa? ¿Para tlen tiquinicnelijtoc m'as motelpocahua huan ax na? ¿Para tlen inmotomajtoque ica nopa achtohui nacatl tlen m'as cuali tlen sesen tlacajcahualistli tlen quihualicaj noisraelita tlacajhua? 30"Huajca ama na tlen niimoTECO Dios nochi inisraelitame niquijtohua para yonque niquijtojtoya para ta huan nochi moteipa ixhuihua nechtequipanosqu'iaj nochipa, ama niquijtohua para ayoc niquincahuilis nechtequipanose tlen ax nechtlepanitaj. Na niquinicnelis inijuanti tlen nechicnel'iaj huan tlen nechcualancaitaj, niquinicnotlalis. Huan nojquiya na tlen niimoTECO inisraelitame nimitzilhu'ia 31para monequi xitlacaqui pampa monechcahu'ia tonali para nimechcuilis nopa chicahualistli tlen inquipiyaj huan nopa chicahualistli tlen quipiyayayaj mohuejcapan tatahua huan ayoc aca tlen imoixhuihua itztos hasta huehuejtiyas. 32Huan timocuesos quema tiquitas queja niquechcapantlalis mochaj huan moixhuihua huan san sampa niquintiochihuas sequinoc israelitame tlahuel miyac. Huan niyon se moixhui ax itztos hasta huehuejtiyas. 33Nopa se quesqui tlen mofamilia tlen niquincahuas yoltoque tlaijiyohuise huan quipiyase hueyi cuesoli huan nochi ininconehua miquise quema noja telpocame. 34Huan para tijneltocas para, quena, temachtli nijchihuas tlen niquijtojtoc, ya ni tlen panos. Ipan se tonal miquise ica se huelta nochi ome motelpocahua, Ofni huan Finees. 35"Huan teipa nijtlalis se totajtzi tlen itztos xitlahuac huan tlen nechtequipanos huan quichihuas senquistoc tlen niquilhuis ma quichihua. Huan niquintiochihuas nochi ichaj ehuani, huan tlen ifamilia para nochipa itztose totajtzitzi tlen nechtequipanose huan itztose iixpa nopa tlanahuatijquetl tlen na nijtlapejpenijtos. 36Huan inijuanti tlen mocajtose tlen mochaj ehuani hualase huan motlancuaquetzase iixpa nopa totajtzi huan quitlajtlanise tomi huan tlen quicuase. Nojquiya moixhuihua quitlajtlanise se tequitl queja totajtzitzi para huelis tequipanose ipan tlaixpamitl huan queja nopa quipiyase inintlacualis." Queja nopa quiijto nopa tiocamanalojquetl.

will be added

X\