1 Samuel 19

1Teipa Sa'ul quiilhui icone, Jonat'an, huan nochi itlatequipanojcahua para ma quimictica David. Pero Jonat'an nel'ia quiicneliyaya David huan elqui inelhuampo. 2Huajca nimantzi quiyolmelajqui David tlen itata moilhuiyaya huan quiilhui: --Notata Sa'ul quitemohua quejatza huelis mitzmictis. Huajca mostla ica ijnaloc ximomocuitlahui huan ximotlati cuatitla campa axaca mitzitas huan nopona ximocahua. 3Huan niquisas ihuaya notata hasta campa timotlatijtos, huan nijcamahuis tlen nochi tlen cuali tijchijtoc para nijmatis tlaque moilhu'ia tlen ta. Huan teipa nimitzmachiltis. 4Huan hualmostla Jonat'an quicamahui itata Sa'ul huan quiilhui: --Ax tleno tlen fiero xijchihuili motlatequipanojca David pampa yaja ax tleno ax cuali mitzchihuilijtoc. Mitzpalehuijtoc miyac. 5Elqui ya tlen motemacac huan quimicti nopa huejcapantic filisteo yonque hueltosqu'ia mictosqu'ia nopona. Pero nopona ica David, TOTECO quichijqui se hueyi tlamantli huan techmanahui nochi tiisraelitame ininmaco tocualancaitacahua queja ta tiquitac huan tiyolpajqui. Huajca ama ¿para tlen tijnequi tijmictis David yonque ax tleno fiero mitzchihuilijtoc? Nochi tlen quichihua mitzpalehu'ia. 6Huajca Sa'ul quitlacaquili tlen quiilhui icone, Jonat'an, huan quiijto: --TOTECO nechcaqui para ama niquijtohua para ax miquis David. 7Huajca quema quisqui itata, Jonat'an quinotzqui David huan quiilhui nochi tlen itata quiijtojtoya. Huan teipa quihuicac iixpa Sa'ul huan David quitequipanohuayaya Sa'ul queja achtohui. 8Teipa sampa oncac seyoc tlatehuicajyotl ica nopa filisteos, huan David sampa yajqui huan quintehuito huan quintlanqui. Quinmicti miyac huan sequin cholojtejque. 9Huan teipa iajaca Axcualtlacatl tlen TOTECO quititlanilijtoya sampa calajqui ipan Sa'ul quema mosehuijtoya ipan ichaj ica se cuatlamintli tlen huehueyac imaco huan David tlatzotzonayaya. 10Huan Sa'ul quimajcahuili David icuatlami tlen huehueyac pampa quinequiyaya quitlatzquiltis ipan tlapepecholi. Pero David mijcuini huan ax quiajsic huan ipan nopa yohuali cholojtejqui. 11Huan Sa'ul quinnahuati isoldados ma yaca ichaj David para ma quichiyaca hasta quisas ica ijnaloc huan huajca, quena, ma quimictica. Pero Mical, isihua, quimatqui huan quiilhui David: --Monequi timochololtis amantzi ni yohuali pampa mostla mitzmictise. 12Huan teipa Mical quitemohui David ipan se ventana, huan mochololti. 13Huan nimantzi Mical quicuito se teteyotl huan quitlali ipan itlapech huan quitlalili itzonteco tlen quipiyayaya iijhuiyo se borrego para ma nesi queja itzoncal huan quipijqui ica se itlaque. 14Huan quema Sa'ul quinnahuati isoldados para ma quiitzquitij, Mical quinilhui para David mococohua. 15Huan sampa Sa'ul quintitlanqui tlacame para ma quitemotij David huan quinilhui: --Xinechhualiquilica ipan itlapech para nijmictis. 16Huajca quema ajsicoj nopa tlacame tlen quintitlantoya Sa'ul, calajque ipan ichaj David campa itlapech huan quipantijque se hueyi teteyotl huan ipan itzonteco quipixtoya iijhuiyo se borrego. 17Huajca teipa Sa'ul quiilhui Mical: --¿Para tlen tinechcajcayajtoc? Tijcajtoc para ma mochololti yaja tlen nocualancaitaca. Huan Mical quinanquili: --Nijchijqui pampa nechilhui para nechmictisqu'ia intla ax nijpalehuisqu'ia ma mochololti. 18Huajca queja nopa David huelqui mochololti, huan yajqui quiitato Samuel ipan altepetl Ram'a. Huan quipohuili nochi tlen Sa'ul quichihuilijtoya. Teipa David huan Samuel yajque itztotij ipan pilaltepetzi Naiot. 19Huan quema Sa'ul quimatqui para David itztoya ipan Naiot nechca Ram'a, 20huajca quintitlanqui isoldados ma quiitzquitij. Pero quema isoldados ajsitoj nopona, quinitaque miyac tiocamanalohuani tlen quiseliyayaj tlajtoli tlen Toteco Dios huan teyolmelahuayayaj tlen quiseliyayaj. Nojquiya quiitaque para nopona itztoya Samuel ininhuaya huan para yajaya quinyacanayaya para quiselise tlajtoli tlen Toteco Dios. Huan nimantzi Itonal Toteco Dios hualajqui ipan nopa soldados tlen Sa'ul quintitlantoya. Huan inijuanti nojquiya pejque quisel'iaj tlajtoli tlen Toteco huan teyolmelahuayayaj tlen quiseliyayaj. 21Huajca quema Sa'ul quimatqui ya ni, sampa quintitlanqui sequinoc tlacame huan inijuanti nojquiya pejque tlayolmelahuaj tlajtoli tlen TOTECO quinmacayaya. Huan ica expa Sa'ul quintitlanqui sequinoc tlacame, huan inijuanti nojquiya ininpantic. 22Huajca Sa'ul motemacac para yajaya yas altepetl Ram'a. Huan quema ajsito campa se ameli tlen eltoc campa itoca Sec'u tlajtlanqui canque itztoya Samuel ihuaya David. Huan quiilhuijque para itztoyaj ipan Naiot nechca Ram'a. 23Huajca yajqui nopona. Pero ipan ojtli Itonal Toteco Dios calajqui ipan Sa'ul huan yajaya nojquiya pejqui quisel'ia tlajtoli tlen Toteco huan pejqui tlayolmelahua nopa tlajtoli huan queja nopa quichijqui hasta ajsito ipan Naiot nechca Ram'a. 24Huan Sa'ul moquixtili iyoyo huan itztoya xolotl. Huan mocajqui xolotl iixpa Samuel nochi nopa tonal huan nopa yohuali quiseliyaya tlajtoli tlen Toteco. Yeca nopona pejqui nopa tlajtoli tlen tlacame motlajtlaniyayaj: "¿Sa'ul nojquiya itztoc se tiocamanalojquetl o axtle?"

will be added

X\