1 Samuel 16

1Teipa TOTECO quiilhui Samuel: --¿Hasta quema tlamis timocuesos ipampa Sa'ul? Ayoc xichoca pampa na ayoc nijnequi para elis tlanahuatijquetl ipan Israel. Xijtemiti se cuacuajtli ica aceite tlen ica titetequitlal'ia nopampa na pampa nijnequi xiya ichaj Isa'i tlen itztoc altepetl Bel'en. Nimotlapejpenilijtoc se icone para ma elis notlanahuatijca. 2Huajca Samuel quitlajtlani TOTECO: --Huan ¿quejatza nijchihuas para niyas? Intla quimatis Sa'ul, huajca nechmictis. Huan TOTECO quiilhui: --Xijhuica se pilhuacaxtzi huan tiquijtos para tiyajtoc tinechmacati tlacajcahualistli nimoTECO. 3Huan tijnotzas Isa'i campa tijtlatis nopa tlacajcahualistli huan na nimitzilhuis tlaque tijchihuas. Huan nimitznextilis ajqueya tlen iconehua ticajaltis ica aceite para tijtequitlalis. 4Huajca Samuel quichijqui queja TOTECO quiilhui huan quema ajsito pilaltepetzi Bel'en nopa huehue tlacame tlen nopa altepetl quisque quinamiquicoj huihuipicayayaj. Huan quiilhuijque: --¿Tijchijtoque tlen ax cuali, o san ica mopaquilis tihualajtoc? 5Huan Samuel quinnanquili: --Quena, nihualajtoc para nijmacas tlacajcahualistli TOTECO. Ximoiyocatlalica para TOTECO huan xihualaca nohuaya para tijmacase tlacajcahualistli. Huan Samuel quiniyocatlali Isa'i huan iconehua huan quinpajpajqui queja quiijto tlanahuatili. Teipa quinnotzqui ma yase quimacatij tlacajcahualistli TOTECO. 6Huan quema calajque Isa'i huan iconehua, Samuel quitlachili itelpoca tlen itoca Eliab huan moilhui para temachtli ya nopa tlacatl tlen TOTECO quitlapejpeni para tlanahuatijquetl. 7Pero TOTECO quiilhui Samuel: "Amo xijtlachili iyejca se tlacatl, niyon quejatza ihuejcapanca para tiquixmatis ajqueya nijtlapejpenijtoc pampa ni telpocatl tlen moixpa itztoc ax nijnequi. Na niimoTECO ax nitetlachil'ia queja tlacame teitaj para nijmatis ajqueya cuali. Tlacame quitlachil'iaj itlachiyalis se tlacatl huan iyejca itlacayo, pero na nijtlachil'ia iyolo." 8Huajca Isa'i quinotzqui Abinadab huan quinexti iixpa Samuel, huan Samuel quiilhui: --Niyon ya ax tlen quitlapejpenijtoc TOTECO. 9Teipa Isa'i quinexti Sama iixpa Samuel huan Samuel quiijto: --Niyon ya ax tlen quitlapejpenijtoc TOTECO. 10Huan Isa'i quinnexti chicome iconehua iixpa Samuel huan ica sesen Samuel quiilhui Isa'i para niyon se inijuanti ax elqui tlen TOTECO quitlapejpenijtoya. 11Huajca teipa Samuel quiilhui Isa'i: --¿Ayoc tiquinpiya m'as moconehua? Huan Isa'i quinanquili: --¡Quena! Polihui se tlen teipa ejquetl. Pero yajaya ax cana yajtoc, san quinmocuitlahu'ia borregojme. Huajca Samuel quiilhui Isa'i: --Xitlatitlani ma quinotzatij pampa ax huelis titlacuase hasta quema ya ajsiqui. 12Huajca nimantzi Isa'i tlanahuati ma quinotzatij. Huan yaja quipixqui itzoncal quentzi chichiltic huan iixtiyol tlen nel'ia yejyectzi huan itlacayo tlen nel'ia cuali. Huan TOTECO quiilhui Samuel: --Yajaya tlen nijtlapejpenijtoc. Xicalti ica aceite para tijtequimacas. 13Huan Samuel quicuic nopa cuacuajtli tlen quipiyayaya aceite huan ax tleno quiijto, san quitlalili ipan itzonteco David iniixpa nochi iicnihua. Huan ipan nopa tonal Itonal TOTECO calajqui ipan David para quimacas hueyi chicahualistli. Huan teipa Samuel mocuepqui ichaj ipan altepetl Ram'a. 14Huan Itonal TOTECO ya quitlahuelcajtoya Sa'ul huan ipan ya hualayaya se iajaca Axcualtlacatl tlen TOTECO quititlantoya. Huan nopa ajacatl quitlaijiyohuilti Sa'ul. 15Huan itlatequipanojcahua Sa'ul quiilhuiyayaj: --Tijpiya se iajaca Axcualtlacatl tlen Toteco Dios mitztitlanili. 16Huajca xitechcahuili timotlatequipanojcahua ma timitztemolise se tlen hueli tlatzotzona ica arpa huan quema hualas nopa ajacatl tlen ax cuali huan mitztlaijiyohuiltis, yajaya quitzotzonas nopa arpa huan ica ya nopa timomachilis m'as cuali. 17Huajca Sa'ul quinnanquili itlatequipanojcahua: --Cualtitoc, huajca xinechtemolica se tlen tlatzotzona cuali huan techhualiquilica. 18Huan se itlatequipanojca quiijto: --Na niquitztoc se icone Isa'i tlen hueli tlatzotzona cuali nepa altepetl Bel'en. Yajaya motemaca huan quimati tlatehu'ia huan tlalnamiqui para camati cuali. Se telpoca tlacatl tlen nel'ia yejyectzi huan TOTECO itztoc ihuaya. 19Huajca Sa'ul quintitlanqui tlacame ma quiilhuiti Isa'i: "Xinechtitlanili mocone David tlen quinmocuitlahu'ia borregojme." 20Huan Isa'i quititlanqui icone, David, ihuaya se burro tlen quitlamamalti ica pantzi, huan se cuetlaxtli temitoc ica xocomeca atl, huan se pilchivojtzi para se ofrenda. 21Huan David ajsico iixpa Sa'ul huan Sa'ul nel'ia quiicneli huan quitequimacac ma eli itlamocuitlahuijca. 22Huan teipa Sa'ul quititlanili se amatlajcuiloli Isa'i huan quiilhui ma quicahuili David ma mocahua para quitequipanos pampa nel'ia quipactiyaya. 23Huan quema calaquiyaya ipan Sa'ul nopa iajaca Axcualtlacatl tlen Toteco Dios quititlanilijtoya, David nimantzi quicuiyaya iarpa huan quitzotzonayaya. Huan nopa ax cual ajacatl quistehuayaya, huan Sa'ul momachiliyaya m'as cuali.

will be added

X\