1 Kings 9

1Huajca Salom'on tlanqui quichihua nopa hueyi tiopamitl para TOTECO huan tlanqui quichihua nopa seyoc cali tlen ipan itztos huan tequitis huan para tlanahuatiani tlen quiselise itequi. Huan tlanqui quichihua nochi sequinoc tlamantli tlen quinequiyaya quichihuas. 2Huan teipa TOTECO sampa monexti iixpa Salom'on queja monextijtoya achtohui nepa ipan tepetl Gaba'on. 3Huan TOTECO quiilhui: "Na nijcactoc motlamaijtol huan nochi tlen tinechtlajtlanijtoc tlen tijchijtoc noixtla. Na niquiyocatlalijtoc para elis tlatzejtzeloltic ni cali tlen tijchijtoc tlen quihuicas notoca para nochipa. Nochipa nijtlachilijtos mojmostla huan nijmocuitlahuis. 4"Huan ta intla tinemis noixtla queja nenqui motata David, huan tijchihuas tlen xitlahuac huan tlen cuali ica nochi moyolo, tijchihuas nochi tlen nimitznahuat'ia, huan tijneltocas nochi notlanahuatilhua, 5na nijchihuas para tijpiyas se familia tlen tlanahuatiani tlen tlacajtiyase ipan moteipa ixhuihua. Huan se moixhui elis tlanahuatijquetl ipan israelitame para nochipa san queja niquilhui motata David. Niquilhui se tlen iixhuihua para nochipa elis tlanahuatijquetl ipan israelita tlacame. 6"Pero intla ta o moconehua innechcahuase, o ax inquichihuase notlanahuatilhua huan notlajtol tlen nimechmacatoc, o intla imojuanti inquinhueyichihuase tiotzitzi huan inquinitase queja dios, 7huajca na niquinquixtis nochi israelitame tlen itztoque ipan ni tlali tlen niquinmactilijtoc. Huan ni tiopamitl tlen niquiyocatlalijtoc para na, nijmajcahuas huan ayoc nijchihuilis cuenta. Huan ni tlali Israel elis se lugar tlen tlacame quixolehuase. Huan quihuetzquilise nochi altepetini. 8Huan quema sosolihuis ni tiopamitl huan quicajtose san tetl montonijtoc, nochi tlacame tlen panose nica quiitase huan quihuetzquilise. Huan motlajtlanise para tlen queja nopa niimoTECO nijchijqui ica ni tlali Israel huan ica ni tiopamitl. 9"Huan sequinoc quinnanquilise para queja nopa elqui pampa nopa israelitame quitlahuelcajque ininTECO Dios tlen quinquixti ininhuejcapan tatahua ipan tlali Egipto huan pejque quinhueyichihuaj tlaixcopincayome tlen quinitayayaj queja dioses. Yeca ininTECO quichijqui ma quinajsi ni tlamantli tlen ax cuali." 10Huan tlanqui nopa 20 xihuitl tlen monequiyaya para Salom'on ma quisencahua nopa ome caltini. Quichijqui nopa tiopamitl para TOTECO huan se caltlanahuatili para nopa tlanahuatijquetl ma ipan itztos huan ma ipan tequitis. 11Huan Tlanahuatijquetl Salom'on quimacac Hiram, nopa tlanahuatijquetl tlen tlali Tiro, 20 altepetini ipan tlali Galilea pampa yajaya quimacatoya nochi cuatini tlen tiocuahuitl huan tlen cipr'es huan nochi oro tlen quinequiyaya para nopa caltini. 12Pero quema Hiram yajqui quitlachilito nopa altepetini tlen quimacatoya Salom'on, ax quipacti. 13Huan quiijto: "¿Tlaque ni altepetini tlen tinechmacatoc, noicni?" ¡Ax tleno ipati! Huajca quitocajti nopa tlali Cabul. (Cabul quinequi quiijtos Ax Tleno Ipati.) Huan hasta ama queja nopa itoca. 14Huan Hiram quititlanilijtoya nopa Tlanahuatijquetl Salom'on miyac oro. Ietica nopa oro eliyaya queja 3 mil 960 kilos. 15Huan Salom'on quinfuerzajhui miyac tlacame ma quichihuaca comun tequitl para quichihuase nopa tiopamitl para TOTECO huan nojquiya para quichihuase nopa caltlanahuatili para ichaj. Nojquiya quichijque tlen itoca Milo elqui seyoc tepamitl para quitlaquechis nopa tepamitl nechca ichaj. Huan quitlamilti nopa tepamitl tlen monequiyaya para quiyahualos Jerusal'en huan quichijchijqui nopa altepetini tlen Hazor, Meguido huan Gezer. 16Nopa Fara'on tlen eliyaya tlanahuatijquetl ipan tlali Egipto quitlantoya altepetl Gezer. Huan teipa quitlati nopa altepetl huan quinmicti nochi nopa cananeos tlen itztoyaj nopona. Huan quimacac queja se regalo nopa iichpoca quema mochijqui isihua Salom'on. 17Huajca Salom'on sampa quisencajqui altepetl Gezer. Huan nojquiya quisencajqui altepetini Bet Hor'on tlen mocahua tlazintla. 18Nojquiya quisencajqui altepetini Baalat huan Tamar tlen mocahua ipan nopa huactoc tlali ipan tlali Jud'a. 19Nojquiya Salom'on quinsencajqui nochi altepetini campa quiajcocuiyaya tlacualistli. Nojquiya quisencajqui altepetini campa quiajcocuiyaya itepos carrojhua huan icahuayojhua. Nochi tlen quinequiyaya quisencahuas ipan tlen hueli pilaltepetzitzi nechca altepetl Jerusal'en, o ipan nopa cuatitlamitl tlen itoca L'ibano campa hueli ipan nopa tlaltini tlen eltoya imaco, yajaya quichijqui. 20Noja itztoyaj sequin tlacame ipan itlal Salom'on tlen ax israelitame. Itztoyaj nopa amorreos, heteos, ferezeos, heveos huan jebuseos. 21Inijuanti eliyayaj iniixhuihua nopa tlacame tlen israelitame ax huelque quintzontlamilt'iaj. Huajca Salom'on quinchihualti para ma quichihuaca tequitl tlen etic huan queja nopa noja quichihuaj hasta ama. 22Pero Salom'on ax quifuerzajhui niyon se israelita para ma tequiti chicahuac. Quinchijqui israelitame ma elica soldados, huejhueyi tequihuejme, tlanahuatiani, tlayacanani tlen soldados huan quinchijqui ma yaca ipan itepos carros huan ma elica tlen nejnemij ipan cahuayos. 23Nojquiya Salom'on quintlali 550 israelitame tlen quitlachiliyayaj nochi nopa tlamantli tlen quichijchihuayayaj huan nopa miyac tlacame tlen tequitiyayaj ipan sesen lugar. 24Teipa Salom'on quihualicac isihua tlen elqui ichpoca Fara'on tlen campa itoca Ialtepe David hasta ipan nopa yancuic cali para tlanahuatiani tlatlajco Jerusal'en. Teipa quisencajqui nochi tlen itoca Milo tlen quitlaquechiyaya nopa cali. 25Eyi huelta ipan se xihuitl, Salom'on quimacayaya tlacajcahualistli TOTECO queja monejqui ipan nopa tlaixpamitl tlen quichijtoya para TOTECO. Nojquiya quitencajqui tlacajcahualistli tlatlatili huan tlacajcahualistli para ma onca tlayoltlalili ica TOTECO huan para quitlascamatis. Nojquiya quitlati copali iixpa TOTECO. Queja nopa quichijqui quema ya quisencajtoya nopa tiopamitl. 26Teipa Tlanahuatijquetl Salom'on nojquiya quichijchijqui huejhueyi barcos nepa ipan altepetl Ezi'on Geber tlen eltoc inechca nopa pilaltepetzi Elot tlen eltoc iteno nopa Hueyi Atl Chichiltic ipan tlali Edom. 27Hiram quintitlanqui tlacame tlen tlahuel quimatij quinejnemilt'iaj barcos para quinejnemiltise ibarcos Salom'on ipan hueyi atl ininhuaya itlatequipanojcahua Salom'on. 28Nejnenque huan ajsitoj tlali Ofir campa quicuique nechca 14 toneladas tlen oro, huan quihuiquilijque Tlanahuatijquetl Salom'on.

will be added

X\