1 Kings 5

1Tlanahuatijquetl Hiram ipan tlali Tiro nochipa eliyaya inelhuampo Tlanahuatijquetl David. Huan quema Hiram quimatqui para Salom'on eliyaya tlanahuatijquetl ipan nochi tlali Israel, quintitlanqui itlatequipanojcahua ma quiilhuica Salom'on para nelpaquiyaya pampa Salom'on mochijtoya tlanahuatijquetl. 2Huan teipa Salom'on quititlanili Tlanahuatijquetl Hiram ni tlajtoli ica itlatequipanojcahua, quiijto: 3"Ta tijmati notata David ax huelqui quichijchihua se tiopamitl para TOTECO Dios, pampa quipixqui miyac tlatehuijcayotl ica miyac tlaltini tlen quiyahualojtoyaj. ax huelqui quichijchihua se tiopamitl hasta TOTECO quichijqui ma quintlani nochi icualancaitacahua. 4Pero ama, quena, noTECO Dios techmacatoc tlasehuilistli ica nochi tlaltini campa hueli. Ax nijpiya niyon se nocualancaitaca ipan seyoc tlali huan notlal ehuani nojquiya nochi paquij. 5Huajca ama nimotemacatoc nijchijchihuas se tiopamitl campa tlacame quitlepanitase itoca TOTECO, pampa queja nopa TOTECO quiilhui notata David ma nijchihua. Pampa TOTECO quiilhui notata para na, niicone, tlen yajaya quitlalisqu'ia para tlanahuatis ipan isiya David, najaya nijchijchihuasqu'ia se tiopamitl campa quitlepanitase itoca. 6"Huajca ama nimitztlajtlan'ia xinechpalehui ipan ni tequitl huan xiquinnahuati motlatequipanojcahua ma nechtzontequilica tiocuatini ipan nopa cuatitlamitl nepa ipan tlali L'ibano. Notlatequipanojcahua quinpalehuise motlatequipanojcahua huan na nimitzmacas tlen ta tinechilhuis para xitlahuac para niquintlaxtlahuis. Cuali tijmati para axaca quimati quema huan quejatza cuatequis queja inSid'on ehuani." 7Quema nopa Tlanahuatijquetl Hiram quicajqui itlajtol Salom'on, tlahuel yolpajqui huan quiijto: "¡Tlascamati TOTECO, pampa tijmacatoc David se icone tlen tlahuel tlalnamiqui para elis tlanahuatijquetl ica nochi nopa miyac israelitame!" 8Huan Tlanahuatijquetl Hiram quinanquili Salom'on ica ni amatlajtoli tlen ica quiilhui: "Nijselijtoc nopa tlajtoli tlen tinechtitlanili, huan nijchihuas nochi tlen tinechtlajtlan'ia. Nimitzmacas nochi cuatini tlen tiocuahuitl huan tlen cipr'es tlen tijnequi. 9Notlatequipanojcahua huelis quinhuicase nopa cuatini tlen nopa cuatitlamitl L'ibano hasta nopa hueyi atl. Nopona quinilpise para quichihuase cuatlapechtli huan yase iixco hueyi atl hasta campa ta tinechilhuis. Huan nopona quimalacanise huan ta tiquinselis huan tiquinhuicas. Huan huelis tinechtlaxtlahuis ica tlacualistli para nochaj ehuani." 10Huajca Tlanahuatijquetl Hiram quimacac Salom'on nochi cuahuitl tlen tiocuahuitl huan tlen cipr'es tlen motlajtlanijtoya. 11Huan huajca Salom'on quititlaniliyaya Tlanahuatijquetl Hiram sesen xihuitl 4 millones 400 mil litros tlen trigo huan 4 mil 400 litros tlen aceite para nochi ichaj ehuani. 12Huan TOTECO quimacac tlalnamiquili Salom'on queja quiilhuijtoya. Huan Tlanahuatijquetl Hiram huan Salom'on mohuampochijque huan quisencajque se tlajtoli san sejco para nochipa itztose ica cuali se ica seyoc. 13Teipa Tlanahuatijquetl Salom'on quintemo 30 mil tlacame tlen campa hueli ipan nochi tlali Israel para quichihuase comun tequitl. 14Huan quintitlanqui ipan nopa hueyi cuatitlamitl ipan tlali L'ibano. Huan mopatlatiyajque 10 mil tlacame sesen metztli. Queja nopa itztoyaj se metztli nepa ipan L'ibano huan ome metztli ipan ininchajchaj. Huan Adoniram quinyacanqui nopa tlacame ipan nopa tequitl. 15Nojquiya Salom'on quintequimacac 70 mil tlacame para tlasasacase huan 80 mil tlen quitejtequiyayaj tetl nopona campa tepetini. 16Huan quintequitlali 3 mil 300 tlayacanani para quitlachilise nopa tequitl huan quintequimacase sequinoc. 17Huan Salom'on quinnahuati nopa tlacame ma quiquixtica huejhueyi tetini ipan tepetini huan ma quintejtequica sesen para monamiquise cuali ipan itzinpehualtil nopa tiopamitl. Huan nopa tetini quisqui tlahuel patiyo. 18Huan tlacame tlen altepetl Gebal quinpalehuijque inincalchijcahua Salom'on huan Hiram para quicualtlalise nochi cuatini huan tetini para nopa tiopamitl.

will be added

X\