1 Kings 2

1Quema monechcahuiyaya nopa tonal para miquis David, quiconsejomacac icone, Salom'on, huan quiilhui: 2"Na ya nimiquis queja pano ica nochi tlacame ipan tlaltepactli. Ximotetili huan ximochihua se titlacatl. 3Xijtoquili nochi itlanahuatilhua TOTECO Dios. Xinejnemi ipan iojhui huan xijchijtinemi nochi tlen ya quipact'ia. Xijchihua sesen itlanahuatilhua, ileyes, itlamachtilhua huan inemachiltijhua tlen quiijcuilo Mois'es para nochi quisas cuali para ta ica tlen tijchihuas huan campa tiyas. 4Huan intla tijchihuas nochi ya ni, huajca TOTECO quichihuas tlen nechtencahuili. Nechilhui intla noconehua huan noixhuihua teipa ehuani nemise cuali iixtla huan quitoquilise ica nochi ininyolo, huan ica nochi inialma huan quichihuase san tlen melahuac, huajca se noixhui nochipa mosehuis ipan nosiya yejyectzi para tlanahuatis ipan ni tlali Israel. 5"Ta ya tijmati tlen nechchihuili Joab tlen icone Sarvia. Quinmicti nopa ome huejhueyi tlayacanani tlen nosoldados. Quimicti Abner tlen icone Ner huan Amasa, icone Jeter. Quinmicti quema oncayaya tlasehuilistli. Huan yeca ica tlen quichijqui, quichijqui ma nesi queja onca se tlatehuijcayotl. Huan inieso quipajqui itzinquechilpica huan itecac. 6Ta tiitztoc se titlacatl tlen tlalnamiqui, huajca temachtli tijmatis tlaque tijchihuas. Amo xijcahuilis para Joab huehuejmiquis ica paquilistli. 7"Xijpiya hueyi moyolo ica iconehua Barzilai tlen ehua tlali Galaad. Xiquincahuili ma tlacuaca campa momesa mojmostla pampa nechpalehuijque miyac quema nicholohuayaya tlen moicni Absal'on. 8Nojquiya amo xiquilcahua Simei, icone Gera, tlen se iteipa ixhui Benjam'in huan ehua altepetl Bahurim. Yajaya nechtelchijqui ica tlajtoli tlen m'as fiero quema nicholohuayaya ipan ojtli para Mahanaim. Huan teipa quema nimocuepqui, nechseli nepa ipan atentli Jord'an huan nijtestigojquetzqui TOTECO para ax nijmictisqu'ia na. 9Pero yonque niquilhui ya nopa, noja quihuica tlajtlacoli iixpa TOTECO. Huajca monequi tijmictis huan amo xijtlapojpolhui. Ta titlalnamiqui huan tijmatis cuali tlaque tijchihuas ica ya. Xijsencahua para ma quitoyahuas ieso huan ma miqui." 10Huan teipa David mijqui huan quitlalpachojque ipan Jerusal'en ipan nopa barrio tlen itoca Ialtepe David. 11Huan David quinnahuati israelitame 40 xihuitl. Chicome xihuitl mosehui para tlanahuatis ipan altepetl Hebr'on huan 33 xihuitl mosehui ipan altepetl Jerusal'en. 12Huan teipa mosehui Salom'on ipan isiya yejyectzi, huan pejqui tlanahuat'ia huan elqui temachtli itequihuejcayo. 13Teipa se tonal hualajqui Adon'ias, icone Haguit, tlen eliyaya seyoc isihua David. Huan quiitaco Betsab'e tlen eliyaya inana Tlanahuatijquetl Salom'on. Huan Betsab'e quiilhui: --¿Tihualajtoc ica cuali? Huan Adon'ias quiilhui: --Quena, nihualajtoc ica cuali. 14San nijnequi xinechchihuili se favor. Huan Betsab'e quiijto: --Xinechilhui tlaque tijnequi. 15Huan quiijto Adon'ias: --Ta tijmati para nochi israelitame quinequiyayaj na ma nieli niinintlanahuatijca. Pero nochi mopatlatoc, huan ama nopa tequihuejcayotl quipiya noicni pampa queja nopa quinejqui TOTECO. 16Huajca ama san nijnequi nimitztlajtlanis xinechchihuili se hueyi favor. Amo xinechilhui para axtle. Huan Betsab'e quiijto: --Xinechilhui tlaque tijnequi. 17Huajca Adon'ias quiilhui: --Na nijnequi xijtlajtlani nopa Tlanahuatijquetl Salom'on ma nechmaca para nosihua Abisag, nopa ichpocatl tlen ehua altepetl Sunem. Nijmati para yajaya ax mitzilhuis, axtle, pampa tiinana. 18Huan Betsab'e quiilhui: --Cualtitoc, huajca nijtlajtlanis. 19Huajca Betsab'e yajqui quicamahuito Tlanahuatijquetl Salom'on ipampa Adon'ias. Huan nopa tlanahuatijquetl moquetzqui huan quiseli inana ica yejyectzi. Teipa nimantzi mosehui ipan isiya yejyectzi huan tlanahuati ma quihualiquilica se siya yejyectzi para inana. Huan Betsab'e mosehui ica inejmatl Salom'on. 20Huan quiilhui: --Nijnequi nimitztlajtlanis se favor. Amo xinechilhui para axtle. Huan Tlanahuatijquetl Salom'on quiijto: --Xinechtlajtlani nochi tlen tijnequi, nonana. Ax nimitzilhuis para axtle. 21Huan inana quiijto: --Xijcahuili moicni Adon'ias ma mosihuajti ica Abisag tlen altepetl Sunem tlen quimocuitlahui motata David. 22Huan Tlanahuatijquetl Salom'on quiilhui inana: --¿Para tlen tinechtlajtlan'ia nopa ichpocatl Abisag para Adon'ias? ¿Ax tijmachil'ia? Intla noicni nechtlajtlan'ia nopa ichpocatl tlen nochi quiitaj queja elisqu'ia se isihua notata pampa quimocuitlahui, huajca eltoc queja tinechtlajtlan'ia ma nijmaca noicni nohueyi tlanahuatijcayo para quinahuatis. Tijmati para yajaya tlen achtohui ejquetl huan quinequiyaya tlanahuatis queja nopatlaca. Huan tijmati para Joab huan nopa totajtzi Abiatar ya mosejcotilijque ihuaya. 23Huajca Tlanahuatijquetl Salom'on quitestigojquetzqui TOTECO huan quiijto: "Ma Toteco Dios nechtlatzacuilti intla ax nijchihuas ma miqui Adon'ias ama ni tonal ipampa ni tlamantli tlen mitzilhuijtoc xinechtlajtlaniqui. 24Yajaya TOTECO tlen nechmacatoc ni tequihuejcayotl huan nechsehui ipan isiya yejyectzi notata David para ma nitlanahuati. Huan yajaya quichijtoc nochaj ma eli se familia tlen tlanahuatiani ica se nocone tlen nechtoquilis ipan ni hueyi tequihuejcayotl huan teipa iconehua huan iixhuihua tlen tlacajtiyase. Huajca temachtli ama ni tonal Adon'ias miquis." 25Huajca Tlanahuatijquetl Salom'on quinahuati Bena'ia ma quiitzqui Adon'ias. Huan yajaya quiitzqui huan quimicti. 26Huan teipa Tlanahuatijquetl Salom'on quiilhui nopa totajtzi Abiatar: "¡Xiya mochaj ipan pilaltepetzi Anatot! Quinamiqui nimitzmictisqu'ia nojquiya, pero ax nimitzmictis ama pampa tijhuicac icaxa TOTECO Tlen Quipiya Nochi Tlanahuatili quema notata itztoya. Nojquiya titlaijiyohui ihuaya quema quipanoyaya miyac cuesoli." 27Huajca queja nopa Salom'on quiquixti Abiatar ipan itequi huan ayoc tequitic queja ihueyi totajtzi TOTECO. Huan ica ya nopa tlanqui nopa tlajtoli tlen TOTECO quiijtojtoya ipan Silo para niyon se iixhui totajtzi El'i ax quitlamiltisqu'ia itequi queja totajtzi. 28Huan quema Joab quimatqui para Salom'on quimictijtoya Adon'ias, tlahuel momajmati. Joab ax quipalehuijtoya Absal'on, icone David tlen achtohui mosisini ihuaya itata, pero quena, Joab quipalehuijtoya Adon'ias quema quinequiyaya mochihuas tlanahuatijquetl. Huajca Joab motlalojtejqui huan yajqui campa itlaixpa Toteco ipan nopa yoyon tiopamitl huan momatlatzquili ipan icuacua nopa tlaixpamitl pampa moilhui huelis ax quimictisqu'iaj yoyon tiopan calijtic. 29Huan quimatiltijque Tlanahuatijquetl Salom'on para Joab itztoya campa tlaixpamitl. Huan Salom'on quinahuati Bena'ia ma yohui quitzontlamiltiti. 30Huajca Bena'ia yajqui campa tlaixpamitl yoyon tiopan calijtic huan quiilhui Joab: --Totlanahuatijca quiijtohua, xiquisa. Huan Joab quinanquili: --¡Ax niquisas! ¡Nica nimiquis! Huajca Bena'ia quiilhuito Tlanahuatijquetl Salom'on tlen quiijto. 31Huan Tlanahuatijquetl Salom'on quiilhui: --Xijchihua queja yajaya quiijtohua. Nopona xijmicti huan teipa xijhuica xijtlalpachoti. Huan queja nopa ayoc nijhuicas tlajtlacoli na, niyon ichaj notata pampa ax tijmictijtoque Joab, pampa yajaya achtohuiya quinmicti tlen ax tleno quichijtoyaj. 32Huajca ama TOTECO quicuepilis Joab pampa quinmicti ome tlacame tlen m'as cuajcualme huan m'as xitlahuaque que ya. Ax tleno tlen nopa tlamantli quimatiyaya notata hasta teipa. Joab quimicti Abner, icone Ner, tlen elqui nopa hueyi tlayacanquetl tlen soldados ipan tlali Israel. Huan nojquiya Joab quimicti Amasa, icone Jeter, tlen elqui nopa hueyi tlayacanquetl tlen soldados ipan tlali Jud'a. 33Huajca Joab huan iixhuihua quihuicase tlajtlacoli para nochipa ipampa ni ome tlen quinmicti. Pero para nochipa ma onca itlasehuilis TOTECO ica notata David huan ica nochi iixhuihua teipa ehuani huan ica nochi tlen mosehuise para tlanahuatise ipan isiya. 34Huajca Bena'ia yajqui campa itztoya Joab huan quimicti. Teipa quitlalpachojque nechca ichaj ipan nopa huactoc tlali campa ax tleno eli. 35Huan Tlanahuatijquetl Salom'on quitlali Bena'ia para ma eli nopa hueyi tlayacanquetl tlen isoldados queja ipatlaca Joab. Huan para hueyi totajtzi, Salom'on quitlali Sadoc queja ipatlaca Abiatar. 36Teipa Salom'on tlatitlanqui ma quinotzatij nopa tlacatl Simei, tlen David quiilhuijtoya ma quimicti huan quiilhui: --Xijchihua se cali nica ipan altepetl Jerusal'en huan xiitzto nica, pero ax quema xiquisa tlen ni altepetl. 37Pampa intla tiquisas tlen altepetl Jerusal'en huan tiquixpanos nopa pilatlajtzi Cedr'on, xijmati cuali para timiquis huan elis ta motlajtlacol. 38Huajca Simei quinanquili nopa tlanahuatijquetl: --Cualtitoc. Xitlahuac ni tlatzacuiltili tlen tiquijtojtoc huan ya nopa nijchihuas. Huajca Simei mocajqui para itztos miyac tonali nepa ipan Jerusal'en. 39Pero quema panotoya eyi xihuitl, cholojque ome itlatequipanojcahua tlen quincojtoya. Inijuanti cholojtoyaj hasta campa itztoya nopa hueyi tlanahuatijquetl Aquis ipan tlali Gat. Huan quiyolmelajque Simei para itlatequipanojcahua itztoyaj nopona. 40Huajca Simei moquetzqui huan quipejpechti iburro huan yajqui tlali Gat campa itztoya Tlanahuatijquetl Aquis para quintemoti itlatequipanojcahua. Huan quema quinajsic, sampa quinhuicac hasta altepetl Jerusal'en. 41Huan quema Salom'on quimatqui para quistoya Simei ipan altepetl Jerusal'en, huan yajqui tlali Gat huan ya mocueptoya; 42tlanahuati ma quinotzatij Simei para ma monexti iixtla. Huan Salom'on quiilhui: --¿Ax nimitzchijqui xijtestigojquetza TOTECO para timocahuasqu'ia nochipa ipan ni altepetl Jerusal'en? ¿Ax niquijto intla se tonal tiquisasqu'ia para tiyas sejcoyoc, temachtli timiquis? Huan ¿ax ta tinechilhui para xitlahuac nopa tlatzacuiltili tlen nimitzmacac huan san ya nopa tijchihuasqu'ia? 43Huajca ¿para tlen tijchijtoc tlen tijtestigojquetzqui TOTECO para ax tijchihuas? ¿Para tlen ax tijtlacaquili tlen nimitznahuati? 44Huan nojquiya Salom'on quiilhui: --Nijmati tiquilnamiqui nochi nopa fiero tlamantli tlen tijchihuili notata David. Huajca ama TOTECO mitzcuepilis tlen fiero tijchijqui. 45Ma TOTECO nechtiochihua huan ma quitiochihua itequihuejcayo notata huan se iixhui ma quipiyas tequihuejcayotl para nochipa para tlanahuatis ipan isiya. 46Huan teipa Tlanahuatijquetl Salom'on quinahuati Bena'ia ma quiitzqui Simei huan ma quimicti. Huajca quiquixti huan quimicti. Huan nopa hueyi tequihuejcayotl tlen Tlanahuatijquetl David achtohuiya quipixqui mocajqui temachtli imaco Salom'on.

will be added

X\